再接再厲 - 芝士火鍋

上次失敗既芝士火鍋，令小小耿耿於懷。

今次，索性買現成芝士火鍋底，一定實食無痴牙，去CitySuper買，大約HKD80。
CitySuper有三款，原味，藍芝士，香草，揀番原味最穩陣。



跟據紙盒底既指示，唔使加任何嘢，放入煲慢火加熱至溶哂就得。
師奶小小當然又試直接放入芝士火鍋兜，隔水座溶，
一嚟洗少個煲，二嚟唔會浪費任何一滴芝士。
一路加熱一路覺得唔多對路，芝士係就係溶哂，但杰到不得了，即刻老點財政大臣落街買盒屋仔奶．．．．．．
半份fondue，半盒奶，咁樣先無咁杰。

好！！焗起埋個酥皮湯，灼好啲西蘭花呀，椰菜花呀，雞肶菇呀．．．．．
上次煎牛肉粒完全唔掂，試吓安格斯肉眼粒喇，再買多包現成燒牛肉同香草豬肉，
開動！！

芝士火鍋：原來上次都唔係真係咁失敗，而係食唔慣。
味道同上次自家刨既芝士相差無幾，只係無咁重白酒味，但越食白酒味都係越濃！！
小小投降！！
煎牛肉粒 / 安格斯肉眼粒：煎起放多陣，啲肉汁走哂，嘥咗舊肉，下次完全唔要呢啲肉粒
西蘭花椰菜花雞肶菇：非常穩陣
最估唔到既係，燒牛肉同香草豬肉反而最好，味道又夾，最好係唔使整唔使切，開袋放上碟就攪掂。

可能喫慣咗意粉屋啲港式芝士火鍋，原味食唔慣，下次要諗諗點樣再調個啱自家口味既芝士火鍋。

King Ludwig Beerhall

又嚟一間話去話去，去極都仲未去，隔咗好多年終於去咗既 - 德國菜：King Ludwig Beerhall。
專登等過咗聖誕先去喫，諗住無咁多人。
無訂位，walk-in都可以，但要限時八點交枱，因為有人訂咗枱，是但喇，兩條友仔，俾四個鐘咪又係喫飽唔使兩個鐘就走。

叫咗個1L ($102) 既Maisel Weisse，以為成jar上，傻仔咁問姐姐要兩個杯，醒目姐姐將 1L 分咗兩杯500ml
未試過飲杯成$51咁貴既啤酒，嗒真啲味道，好麥．．．

燒雞沙律 Chicken Romaine ($98) ：得一條雞串咁大把，但都燒得幾好味，羅馬生菜夠爽夠甜

德國腸胼盤伴酸椰菜及薯仔沙律 Sausage Sampler ($215) ：嘩，叫菜都無為意價錢，埋單先知呢幾條腸搭碗酸酸凍凍既薯仔，要成二百蚊

先講拌碟酸椰菜，唔鍾意酸椰菜既朋友，無論係肯德雞既，定係露比星期幾既，定呢度德國式既，都係唔鍾意囉．．．．
碗酸酸凍凍既薯仔沙律，咪睇個樣濕濕咁，味道其實唔錯，喫腸喫到漏漏哋，喫啖酸酸哋既薯仔中和番

跟住到盤雜腸：最粗果條紅色腸，成條司華力腸咁味；最粗既白色腸，唔記得咩味；最長果條紅色腸，有啲胡椒味，仲有．．．．．其他腸全部唔記邊條打邊條
總之全部條皮都煙煙韌 韌 咁，但總括紅色好味過白色
話時話，拌碟既薯仔，對腸唔係咁大興趣既小小呢講，好味過碟腸

脆皮燒豬肘配酸椰菜及薯仔 Pork Knuckle ($175)：其實一坐低已經聞到一陣燒豬手味，因為不斷燒緊
見到一盤盤豬手由左邊焗爐搬到右邊焗爐，咁搬出搬入，成日都飄嚟一陣食物美味，好吸引人落order要番隻豬手
就點一隻試吓喇！！

又有酸棷菜．．．．．唔鍾意酸椰菜起上嚟，佢拌住啲幾香既嘢都係唔鍾意
再嚟薯仔，同頭先碟雜腸一齊既薯仔，好味 （無錯，薯仔小小係大細超架喇，總之就係薯仔好味，酸椰菜唔好食喇）

脆豬手：送到埋枱先切，一路切一路聽到卜卜聲，豬手皮實在太脆喇
聞落好香，第一啖咬，皮脆得嚟有啲偏硬，要用啲力先咬到，無咁硬會好啲，味道無想像中咁咸，幾好，
但喫喫吓有陣臭豬味，小小即刻咩胃口都無哂．．．．，試多舊都仲係喫到陣臭豬味，投降，停手停口
好在財政大臣唔覺陣臭豬味，照喫先喫得哂

非常豐富，肥仔，肥膩既一餐，埋單連加一HKD649，三五七年後，都可以再試既

後話：唔知係杯啤酒，燒雞，肉腸，定係隻豬手，喫完隔兩個鐘，口渴到飛起，唔知係熱氣既口渴定係味精既口渴，要飲成杯蜂蜜綠茶先解到

福丼

丫烏卜痴鬼咗線，明明寫咗個卜唔見鬼咗

發牙痕想喫日本菜，唔想喫板短，見到青衣城有間別府集團既福丼，就去試試。

魚生定食：有飯有麵豉湯
魚生普普通通喇，唔難食但又唔係好好味，但飯就少咗啲
望落去啲飯好似都唔少，但個碗係古惑的碗囉，即係碗底拱起果隻，兩啖飯可以扮好大碗果啲

滑蛋豬扒飯：有飯有湯
豬扒稍薄，炸粉稍厚，雞蛋汁多啲好啲，個汁再甜少少好啲
即刻諗起，咁既價錢有更好既選擇，就係大埔間八戶屋．．．．．

餃子雞翼：唔算好味又唔算難食，味道唔突出到記唔起咩味咩質感．．．．

話說青衣城三樓有間別府集團既拉麵，地下有間別府集團既福丼，小小咁八卦，當然喫飽去八吓有咩咁巴閉，同一商場同一集團開兩間舖自己打自己．．．
一八之下，唓，餐牌一模一樣，連價錢都一模一樣，間無咁起眼既福丼，命運可能係等執

手信試味 (上)

去完旅行都一段日子，帶番嚟既手信都試得七七八八．．．．．．． 試味報告如下。

首推：青森買既蘋果味SPARKLING，有汽蘋果味果汁？汽水？好蘋果味，無果汁咁惹痰感覺，又唔似汽水咁死甜，香香清清甜甜，不過份量少得滯，幾啖就飲哂唔夠喉


二推：青森買既蘋果味啤酒，少少蘋果味，多多啤酒味，估唔到蘋果同啤酒可以咁夾架



有無發現首推同二推，有啲共通點，就係樽身上面有啲類似推介推奬咁上下既標籤！！如下圖
日本啲土產，好興有呢類推介推奬咁，有啲舖頭仲會列埋當店人氣排名手信添！！

咁係咪買有咩咩推介，咩咩推奬呀就實無死？
基本上十樣貨品九樣有咩咩金賞咩咩推奬，仲有口味呢家嘢，人人唔同架嘛，
好似小小咁，鍾意蘋果味，鍾意朱古力味，呢兩樣副產品小小多數都話好味，
其他人口味唔同就唔認同架喇，所以咩咩推介咩咩推奬同埋尤其係小小既推介，望吓算喇，唔好信呀


再嚟，蘋果批(左) 蘋果汁蛋糕(右)
左邊呢條蘋果批，就係見到一堆阿公阿婆掃貨，師奶小小唔抵得慌死無得買又走去搶，味道呢，又係人人唔同喇，甜咗啲咁囉，同埋個批皮質感小小唔多歡喜，連鍾意蘋果味既小小都唔多鍾意咁囉，早知就唔同啲阿婆爭喇．．．．．．

右邊蘋果汁蛋糕，又係甜咗丁丁，但同蘋果批比較，蛋糕好味啲喇



見唔見到雞乸咁大個受賞貼紙，都話受賞唔一定啱口味架喇！！！！


E！！原來仲未飲咖啡，唔怪得諗唔起咩味．．．．
但奥入瀨限定啤酒飲咗喇，味道．．．．好重麥味，好苦，小小同財政大臣都唔鍾意，等小小仲托呢樽嘢杔足全程呀！！！！
仲要用腳行既全程呀！！
响燒山落車即買，揹住由燒山行咗大半日奥入瀨，第二日又由子ノ口行到銚子大滝，跟住再行蔦溫泉既沼めぐりの小路！！！！

唉，都知道總有啲嘢好味，有啲嘢唔啱口味，但估唔到唔啱口味既嘢揹得最耐最辛苦．．．．．．

大餐預演

肥仔大餐，唔一定要聖誕呀，冬至呀，新年呀，先嚟喫既。
見到超市pizza有特價，雪櫃又有存倉薯條既時候，戚起條根又可以整肥仔大餐。

肥仔辣肉腸磨菇PIZZA

材料：現成PIZZA1個 (特價HKD68 兩個，1個即係HKD34)
做法：
1. 220 度預熱焗爐
2. 响冰箱拎個現成PIZZA出嚟
3. 唔使解凍唔使溶雪，直接掉入焗爐焗15-20分鐘
4. 攪掂，食得

買麵粉十幾蚊，辣肉腸三十幾，仲有茄醬磨菇芝士，加加埋埋成舊水
一次喫唔哂，分開幾次又唔知喫到幾時，HKD34一個現成有齊哂，真係唔買唔得喇

焗起出嚟，味道唔錯喇，個底薄薄脆脆，唔似之前買既迷你PIZZA底，硬到咬崩牙．．．．．
下次買個菠蘿磨菇，自已加三文魚變三文魚pizza又得，加臘腸變臘腸又得，得咗！！

再嚟芝士煙肉薯條，做法見上次喇，唔重覆喇，講完又講喇，來來去去都係先炸後焗果啲咁囉

咁多又炸又焗，為免生飛滋便秘，當然整碟菜 - 青瓜豆腐海帶沙律 嘆嘆。

材料：豆腐一磚，海帶1/4條，青瓜一條
做法：
1. 海帶洗淨切條切片煲熟放涼
2. 青瓜洗淨批皮切丁撈鹽再沖水
3. 豆腐隔水切丁
4. 食時加丁丁芝麻醬，正呀

大昌買既日本豆腐，豆味夠濃又香滑，特價時又可以入貨

芝士火鍋

老年前，响ikea見到芝士火鍋兜已經想買，但用正價價錢買啲好日唔用既玩具，唔係幾捨得，
到特價既時候又扭扭拎拎無買，最後由無特價變有特價再變番唔特價，結果，都係無買。

財政大臣，上星期响citysuper見到個朱古力火鍋兜百零蚊。
咦！可以做芝士火鍋兜喎！！
百零蚊買件玩具，就算唔啱玩，都唔太肉赤，即買喇。




材料：

朱古力火鍋兜 - HKD125，蠟燭 - HKD19.9

特價中既特濃車打芝士 - HKD79.9
美國咩咩叉叉牛肉粒 - 生(唔記得咩部位) - HKD22
去骨咸豬手拼豬頸肉 - 熟 - HKD28
韓國雞脾菇 - HKD18 1袋4棵
西蘭花 - HKD8.8 3棵
麵包 - HKD17
白酒 - HKD38

唔計食具，淨食材都差不多二百蚊，出街喫仲要計埋人工燈油火蠟，收三百個大洋都無走雞。

做法：
1. 洗淨所有嘢，灼熟西蘭花，雞脾菇，煎熟牛肉粒備用
2. 刨碎芝士備用，麵包切粒備用
3. 偷懶小小，懶用多個鍋煮溶芝士，將刨碎咗既芝士，直接放入火鍋兜，再隔水用熱水座溶
4. 邊座邊攪，落丁丁白酒
5. 芝士溶哂，食得

人哋啲食譜，多數用Gruyere同 Emmental 芝士，但小小求求其其貪特價，買咗特濃車打芝士，
點鬼知呢隻芝士帶酸，再落白酒，嘩，白酒突顯咗芝士既酸味，
個鍋香就香，但帶酸，酒味濃，一啲都唔好味

好在頭先啲芝士無用哂，即刻仆落街買盒屋仔奶 HKD5，
試吓唔落白酒改落奶又如何，睇吓呢包芝士有無得救，
答案係 - CERTIFY！！！
芝士本身帶酸，唔落白酒改落奶都係唔掂，只係無咗酒味，個芝士火鍋都係唔好食！！



勉強無幸福，啲咁鬼難食既嘢即倒，立即變陣，
用灼熟咗既西蘭花炒咸豬手同豬頸肉，切粒麵包搽牛油蒜粉再掉落白鑊整脆，

雖然兜芝士火鍋無得救，好在今晚餐晚餐都仲有得救．．．．．．

下次，下次試另一隻芝士，哼！！

2011 東北．紅葉．健行

前言
=============================================================
原定2011的旅遊配額，會到東北看紅葉，

早在去年10月已經開始plan行程，做資料搜集．．．

但人算不如天算，一次311天災，立即決定擱置2011紅葉之旅。

取消紅葉之旅，改成去馬爾代夫！！

去完馬爾代夫後，某天一個颱風帶來來的額外假期，無聊上網click click時，

發現了特價機票？！看來上天都要小小去振興一下東北的經濟。

2011 東北．紅葉．健行

==============================================================

01. Day 1 - 八戸

02. Day 2 - 奥入瀨 (上)

03. Day 2 - 奥入瀨 (中)

04. Day 2 - ホテル十和田荘

05. Day 3 - 十和田湖

06. Day 3 - 奥入瀨 (下)

07. Day 3 - 蔦沼

08. Day 3 - 青森

09. Day 4 - 陸奥湊

10. Day 4 - 八食センター

11. Day 5 - 上野

12. Day 5 - 秋葉原

 

東北 紅葉 健行 (Day 5 - 上野 > 秋葉原 > 香港)

25 Oct 2011 - 29 Oct 2011 東北．紅葉．健行 (DAY 5 - 上野 > 秋葉原 > 香港)

---

[Day 5] 29 OCT 2011 (上野 > 秋葉原 > 香港
財政大臣尋晚未返酒店已經想喫嘢多餐，一路行一路睇附近有咩好喫，
睇到番到酒店都揀唔落手，返到酒店依依哦哦一輪，頂唔順淥咗個杯麵食，
喫喫吓杯麵小小先同財政大臣講，不如去一蘭吖？人哋話開24小時！ 財政大臣：早講吖，淥咗杯麵先講！咁聽朝去喫當早餐！

唔係講笑，去咁多次日本，係無去過喫一蘭拉麵，唔知响邊，唔知開24小時。
感謝小小突然記得上網見過有人講一蘭，感謝酒店有wifi，感謝財政大臣個電話有得用wifi上網，
搵到上野駅有間一蘭。就係咁，明明無plan過早餐喫拉麵，都可以搵到拉麵做早餐。

一早起身去上野駅山下口搵一蘭。
驚死好多人，早啲起身預埋排隊時間，點知去到無咩幾個人，唔使排隊直入。

東北 紅葉 健行 (Day 4 - 上野)

25 Oct 2011 - 29 Oct 2011 東北．紅葉．健行 (DAY 4 - 上野)

---

[Day 4] 28 OCT 2011 (陸奥湊 > 八食センター > 上野 ) 
15:27 - 15:36 八食センター > 八戸
東北旅遊優待卡個website寫住，坐南部巴士同埋八戸市營巴士都有半價，
師奶小小落車時當然唔執輸，問吓巴士司機用唔用得喇，
可惜，唔知係司機唔知，定係小小唔明，總之雞同鴨講之下，都係唔用得，
是但啦，唔嘥時間喇，俾全費喇。

東北 紅葉 健行 (Day 4 - 八食センター)

25 Oct 2011 - 29 Oct 2011 東北．紅葉．健行 (DAY 4 - 八食センター)

---

[Day 4] 28 OCT 2011 (陸奥湊 > 八食センター > 上野 ) 
10:15 - 10:34 陸奥湊 > 八戸原訂行程，坐JR由陸奥湊駅返去八戸駅，行一陣土產店再坐巴士去八食センター。

但去到本八戸時，小小恃住上年用goggle map搵過，
長苗代駅可以行去八食センター，大約十五分鐘卦，就建議响長苗代落車，行過去咯，
財政大臣即刻搵下個電話有無長苗代地圖，搵到後，JR剛剛到達長苗代駅，即刻跳落車。

落車之後，望望下班JR幾點，萬一行唔到去，番轉頭都知幾點有JR。
長苗代係無人車站，上車落車驗票要車長先生一個攪掂，
車長先生見到有兩個唔似當地人既傻仔跳落車，以為我哋蕩失路咁樣，
望咗兩望，確定兩個傻仔唔似落錯車先開車。

响長苗代駅望咗陣，財政大臣話見到有座灰色嘢，應該係果樹；
小小就見到有座黃色建築物，仲隱約記得八食センター係黃色，咁應該係黃色果樹唔係灰色果樹囉！！

兩條唔識死既茂李，一個認路唔記嘢，另一個記嘢唔認路，
人生路不熟，恃住有個GOOGLE MAP地圖，就亂跳落車，向八食センター進發。
經過天橋，行過馬路，眨吓眼就過咗十五分鐘，但仲未到喎
小小開始懷疑，係咪記錯呢？goggle map好大機會講係25分鐘而唔係15分鐘,
驚俾人閙既小小當然唔敢出聲,繼續行喇

好在行到咁上緊，見到馬路有個大大個廣告，講八食センター向前面唔知幾多百米再轉彎，
但個廣告好明顯係俾架車人士睇唔係行路人士睇囉．．．．是但喇，起碼無行錯方向先喇。

東北 紅葉 健行 (Day 4 - 陸奥湊)

25 Oct 2011 - 29 Oct 2011 東北．紅葉．健行 (DAY 4 - 陸奥湊)

---

[Day 4] 28 OCT 2011 (陸奥湊 > 八食センター > 上野 ) 
想去蕪島，想去種差海岸，想去陸奥湊。
可惜，時間唔啱，天氣凍，好眼訓，藉口一大籮，最終決定唔去蕪島，唔去種差海岸，今朝淨去陸奥湊，
今日可以遲丁丁起身．．．所謂既遲丁丁，都係07:00就身，早過返工。

[早餐]：コンフォートホテル八戸

早餐當然响酒店喫喇，包咗架嘛，唔喫會蝕架，何況小小要喫多啲青森蘋果。
頂．．．雖然係蘋果季，原來唔係日日有供應，今日朝食無蘋果。

07:55 - 08:11 八戸 > 陸奥湊

去陸奥湊有咩睇？
無架，睇朝市囉！咩係朝市？好似街市咁囉，但淨係朝早擺檔。
唓！街市有咩好睇！
各人有各人喜好喇，有啲人鍾意買衫，有啲人鍾意買餸，
鍾意行超市呀，街市呀既師奶小小當然鍾意行街市喇！陸奥湊駅一出，就見到呢個魷魚婆婆像，
有圍裙，又手執魷魚，一睇就知呢度專出產魷魚喇！！

東北 紅葉 健行 (Day 3 - 青森)

25 Oct 2011 - 29 Oct 2011 東北．紅葉．健行 (DAY 3 - 十和田湖 > 奥入瀨 > 蔦沼 > 青森 > 八戸)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 
13:35 - 15:34 巴士準時出現，由蔦溫泉 - 青森。
又係用今朝買既巴士券上車，上車都係要抽飛仔。

聽聞由青森去十和田湖既車程風景靚過由八戸去十和田湖，
所以小小安排行程時，由八戸入青森出，咁就可以睇哂兩邊風景；
由蔦溫泉往青森，途經睡蓮沼，酸ケ湯，ロープウェイ駅，三内丸山遺跡。

風景確實唔錯，紅葉見頃的話，真係坐車都唔得閒訓覺，
可惜紅葉已經枯咗大部份。
風景靚係要付出多丁丁，因為沿途都係山路，左轉右轉，
坐慣地鐵既小小，食飽啲都會暈車浪，真係好在未喫午餐．．．．

途經酸ケ湯，真係唔浸都要影吓相 (响架車上面影)
本來有諗過去酸ケ湯浸日歸，但．．．
聞說酸ケ湯好多人，小小又得條毛巾仔，又唔想俾錢買件溫泉衫，
時間又唔係好夠喎．．．．總之就一大堆理由，最終無去酸ケ湯浸日歸。
下次喇，下次住酸ケ湯，就會試個千人溫泉。

東北 紅葉 健行 (Day 3 - 蔦沼)

25 Oct 2011 - 29 Oct 2011 東北．紅葉．健行 (DAY 3 - 蔦沼)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 

10:49 - 11:35 由銚子大滝去蔦溫泉。
用今朝買既巴士券上車，仍然要上車抽飛仔。巴士車速唔太快，望住車箱兩邊既風景，聽住啲唔識聽既日本介紹，
尋日用腳行咁多個鐘，坐巴士只係40分鐘，小小覺得自己．．．．對腳真係好短呀！！！行咁慢！！！今日除咗臨時加入去既順走奧入瀨，仲有行程既另一重點：蔦溫泉
重點唔係浸日歸溫泉，而係蔦溫泉周邊全長2.4k既〔沼めぐりの小路〕。

東北 紅葉 健行 (Day 3 - 奧入瀨 - 下)

25 Oct 2011 - 29 Oct 2011 東北．紅葉．健行 (DAY 3 - 奥入瀨)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 

09:15先坐完船去到子ノ口，即係行奧入瀨既時間又少咗，要行快兩步追番啲時間。尋日逆走，由燒山往子ノ口方向，

今日順走，由子ノ口往燒山方向，試哂兩樣走法，睇吓唔同走法既奧入瀨有咩唔同。

東北 紅葉 健行 (Day 3 - 十和田湖)

25 Oct 2011 - 29 Oct 2011 東北．紅葉．健行 (DAY 3 - 十和田湖)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 

本來諗住今日既行程會他他條條咁，唔使早起，喫飽朝食後坐遊覽船，再慢慢遊去蔦沼．．．
但因為尋日行唔哂奧入瀨，臨時改行程，

加上今個東北．紅葉．健行旅程，住得一間溫泉酒店，有得浸溫泉當然要浸盡佢。
所以今日又係早起，仲要05:00就起身，皆因ホテル十和田荘個大浴場，朝早05:30就開，
情願訓少陣，點都要浸多一次溫泉先check-out。

浸完溫泉，06:15又出發喇！咁早？去邊？
去睇乙女の像呀，十和田神社咁囉。
早起的鳥兒有蟲吃，晨光照住既紅葉特別靚，又可以拎啲model出嚟影相。

東北 紅葉 健行 (Day 2 - ホテル十和田荘)

25 Oct 2011 - 29 Oct 2011 東北．紅葉．健行 (DAY 2 - 十和田湖)

---

[Day 2] 26 OCT 2011 (八戸 > 奥入瀨 > 十和田湖)

今日天黑前行唔完奧入瀨溪流，即刻改行程，明天繼續未完成既部份，
自遊行就有呢個好處，話改就改。

16:05 - 16:33 坐上東北巴士，由 雲井の流れ 去 十和田湖(750円x2)。
去到十和田湖，17:00都未夠，天都黑哂。
十和田湖呢個巴士站好得，門口有廁所，裡內賣土產，
唔望真見到部巴士券自動售賣機，真係會以為自己去咗土產店而唔係巴士站。
响巴士站間土產店兜完圈，再去碼頭果邊既土產店兜圈，順手視察環境。
頭先落巴士前，財政大臣離遠見到小小預訂酒店既名，掛响間好grand好大既建築物上面，
財政大臣又繼上次秋田之後，又一次用懷疑既眼神望住小小：係咪呢間酒店？家陣仲有架shuttle免費由東北巴士站接送去 [ホテル十和田荘]，
財政大臣又懷疑喇：係咪真係呢間酒店架？
小小：俾張酒店vouchuer過司機睇，佢車我哋去咪係囉，唔車咪最多自己行，都係幾步路姐司機先生望完張vouchuer就車到我哋去門口。
一落車，咪喇，對真啲間酒店名先喇，小小呢啲cheap精，好少會訂啲咁靚既酒店架嘛！！．．．．．
結果，係真既，可以去check-in。

小小上網book果陣，見ホテル十和田荘最平，咁咪book囉，無諗過佢咁大間！！

東北 紅葉 健行 (Day 2 - 奧入瀨 - 中)

25 Oct 2011 - 29 Oct 2011 東北．紅葉．健行 (DAY 2 - 奥入瀨)

---

[Day 2] 26 OCT 2011 (八戸 > 奥入瀨 (下) > 十和田湖)

响三乱の流れ影完相，繼續向石ヶ戸進發。
去到石ヶ戸，果然有一堆人响樹，條路變得好熱鬧，
好多行山裝束人，好多旅客 (普通波鞋牛仔褲果啲)，仲有好多架旅遊巴，仲有一堆公公婆婆。

東北 紅葉 健行 (Day 2 - 奧入瀨 - 上)

25 Oct 2011 - 29 Oct 2011 東北．紅葉．健行 (DAY 2 - 奥入瀨)

---

[Day 2] 26 OCT 2011 (八戸 > 奥入瀨 (上) > 十和田湖)

今日行程重點，就係行奧入瀨渓流。
聞說紅葉季節，好多外國遊客定本地人都會去奥入瀬渓流睇紅葉，師奶小小驚死上唔到車，上到車又怕無位坐，要企幾個鐘，尋晚已經响八戸駅買定巴士券，聽聞人哋話俾錢買咗巴士券果啲優先嘛，跟住先到全國pass同埋無買定巴士券，上車抽券果啲嘛。

聽聞青森同八戸都可以坐JR bus去喎，青森往奥入瀨車程風景仲靚啲添，咁做咩鬼唔由青森入？由八戸既？
師奶小小驚青森多人上唔到車嘛，仲有就係青森去到燒山07:50 - 09:48，八戸去燒山就08:45 - 10:13，由八戸入可以遲一個鐘起身喎，小小同財政大臣一致決定，訓晏一個鐘得一個鐘，八戸入！！！

雖則話可以訓晏啲，其實06:30都已經要起身，07:00喫早餐，07:30去買今日既野餐駅弁，08:00準時去巴士站排隊。你話吖，若果由青森入，咁咪要05:30起身吖，好辛苦姐．．．

[早餐]：コンフォートホテル八戸

呢間酒店既早餐，由06:30 - 09:30，青森蘋果，味道仲唔錯添。
今日要行好多路，要喫飽啲，拿拿聲劈多幾件鮭魚飯糰，幾件蘋果。

東北 紅葉 健行 (Day 1 - 香港 仙台 八戸)

25 Oct 2011 - 29 Oct 2011 東北．紅葉．健行 (DAY 1 - 香港 > 仙台 > 八戸)

---

[行程資料]
去程 : JL736 - 10:45
回程 : JL735 - 18:20
機票 : HKD 2000 (非團體機票) + HKD 811 (機場稅連燃油付加費)
PASS : 5日東日本PASS，JPY20000 (東日本旅客鐵路株式會社，購買當日為HKD1940)
時差 : 日本比香港快一小時
交通 : JR，巴士

[Day 1] 25 OCT 2011 (香港 > 東京 > 仙台 > 八戸)

以前去日本，多數坐delta，倒屎咁早就起身出門口，

今次坐JAL，遲兩個鐘，唔使趕通宵車或者頭班車，仲可以喫埋早餐先去機場。

未試過去日本個喼咁輕，二人合共只係約19kg，
鬼咩，去果5日之嘛．．．又唔係十幾日，邊使拎咁多嘢姐．．．．

東北．紅葉．健行 - 前言

連續好多日，一高一矮一肥一瘦重覆又重覆以下無聊對話

高高瘦瘦：不如去旅行咯
肥肥矮矮：好，不過要平，要靚，要正

高高瘦瘦：咁沖繩潛水吖
肥肥矮矮：好，不過唔潛水，三千幾蚊兩個dive好貴呀，去馬爾代夫用哂今年既旅行預算喇
高高瘦瘦：唔潛水去沖繩做咩姐．．．

高高瘦瘦：去沙巴潛水行神山吖
肥肥矮矮：好，不過唔行神山，好貴呀，行一行山三千幾，去馬爾代夫用哂今年既旅行預算喇
高高瘦瘦：唔行神山淨潛水，出年都同其他buddy去潛水喇
高高瘦瘦：咁唔去沙巴囉．．．

高高瘦瘦：咁去邊吖
肥肥矮矮：要平呀唔該，好似台北呀，台南呀，東京呀，泰國果啲囉，齋行齋食三五千蚊有找果啲
高高瘦瘦：我唔想去泰國喎
肥肥矮矮：咁台北 / 台南
高高瘦瘦：無嘢睇喎
肥肥矮矮：咁東京囉
高高瘦瘦：唔啱睇喎
肥肥矮矮：咁唔好去喇


卒之有一日．．．．．．


高高瘦瘦：去東北吖，五日吖
肥肥矮矮：好 (咁啱上網CLICK CLICK CLICK，咁啱見到JAL特價HKD2000，咁啱隻手指又CLICK咗買埋飛)
高高瘦瘦：!@#$%^& ．．．．．度度都話貴，東北又唔見你話貴

就係咁，話去又唔去，跟住唔去又去既東北秋楓紅葉之旅，又要出發囉！！

昂坪360 (2011/09/18)

大鄉里小小是日出巡，去遊昂坪360。
姑寒鬼無拿拿捨得去消費？皆因師奶通病，貪少便宜．．．．
有人9月生日有得坐免費水晶車，同行所有人買普通車可以免費升級做水晶車，
免費喎，升級喎，拿拿聲去喇。

為咗坐免費水晶車，同免費升級水晶車，排隊排咗2個鐘，
使咗HKD115買張普通飛．．．．

普通車HKD115，水晶車HKD169，爭咁遠，係咪好值？
見人見智喇，對姑寒師奶小小嚟講，唔多值，
老實講，望窗出邊都夠哂忙，邊咁得閒成日望地下

一場上到昂坪，點都要行一圈市集

再行一圈心經簡林

兜完心經簡林，本來想上埋大佛先走，點鬼知無拿拿落雨，
仲越落越大，即刻趕番去坐360走人喇

上嚟排咗2個鐘，都估到落去要排，但好在只係排咗半個鐘
HKD115，咁就使咗．．．．．．


同場加映，就嚟排到上車時，突然一陣騷動，
一堆相機一堆大叔一堆師奶唔知响邊度飛哂出嚟，一個女人俾人狂影，
瞥見一名貌似楊千嬅既女子，師奶們阿叔們瘋狂舉機影相．．．．
見到前面一堆頭嗎？就係堆唔知邊度走出嚟既大叔大嬸．．．．

上到昂坪市集，又瞥見楊小姐，家陣任影唔嬲，但唔見有一堆大叔大嬸飛出嚟喎