東北 紅葉 健行 (Day 4 - 陸奥湊)

25 Oct 2011 - 29 Oct 2011 東北．紅葉．健行 (DAY 4 - 陸奥湊)

---

[Day 4] 28 OCT 2011 (陸奥湊 > 八食センター > 上野 ) 
想去蕪島，想去種差海岸，想去陸奥湊。
可惜，時間唔啱，天氣凍，好眼訓，藉口一大籮，最終決定唔去蕪島，唔去種差海岸，今朝淨去陸奥湊，
今日可以遲丁丁起身．．．所謂既遲丁丁，都係07:00就身，早過返工。

[早餐]：コンフォートホテル八戸

早餐當然响酒店喫喇，包咗架嘛，唔喫會蝕架，何況小小要喫多啲青森蘋果。
頂．．．雖然係蘋果季，原來唔係日日有供應，今日朝食無蘋果。

07:55 - 08:11 八戸 > 陸奥湊

去陸奥湊有咩睇？
無架，睇朝市囉！咩係朝市？好似街市咁囉，但淨係朝早擺檔。
唓！街市有咩好睇！
各人有各人喜好喇，有啲人鍾意買衫，有啲人鍾意買餸，
鍾意行超市呀，街市呀既師奶小小當然鍾意行街市喇！陸奥湊駅一出，就見到呢個魷魚婆婆像，
有圍裙，又手執魷魚，一睇就知呢度專出產魷魚喇！！

陸奥湊朝市唔大，由JR站一出過對面馬路就係，
感覺好似油麻地街市咁，啲魚呀，菜呀，放哂响街邊，兩邊馬路，
魚平，菜靚，見到啲餸咁平咁新鮮，真係好有衝動想買架

。
心諗，若果响呢樹住，日日都可以整海鮮餐，
今日煎蝦，聽日蒸魚，後日煲蟹粥，大後日整魷魚桶飯．．．
嘩！諗起都流口水．．．．
你睇你睇，咁大條魚都只係1000円，
望吓右面，無咁大條 (其實都好大條)魷魚2100円，
望吓左面，勁大條既魷魚只係2300円，
喫到膽固醇超哂標都抵呀！

再望吓下邊，果箱唔知咩鬼魚2500円，
毛蟹都只係3300円，果刻真係好有衝動買咗箱蟹寄番香港，
煲蟹粥大宴親朋都唔錯呀！！
毛蟹又係喫膏，大閘蟹又係喫膏，仲要唔使擔心喫到假蟹，食藥蟹，家陣大閘蟹一隻都幾十蚊喇，
唔喫大閘蟹，改喫毛蟹．．．．．．寄成箱蟹返香港唔知要幾錢呢？

街邊有街邊既精彩，舖頭又有舖頭既好睇。
好似八戸市營魚菜小賣市場咁，就好似我哋既市政街市咁，有一檔檔魚檔菜檔。
有濕貨：魚呀，菜呀
有乾貨：曬乾咗既海產，好似魚乾，元貝果啲
樓上仲有兩個婆婆賣啲呢樹加工既花生豆豆，魷魚脆脆，呢類零食賣

仲有檔可以買碗白飯，再响隔離啲魚當買刺身，自已拼個刺身丼出嚟喫
一碟三色刺身只係200円左右，廿蚊碟刺身喎，邊樹搵呀？！
大份啲多啲款都只係500円，心郁郁好想買碟刺身喫呀．．．．．

除咗魚呀菜呀生果咁，仲有間舖買啲雪藏嘢，好似餃子，肉腸，凍肉，肥牛咁

。
財政大臣起勢望住啲餃子，凍肉，一睇就知佢同小小一樣，
好想買啲和牛凍肉返歸．．．．．．
行行吓，無端端有個婆婆同財政大臣打招呼傾偈。
財政大臣烚烚吓，以為自己魅力過人，吸引婆婆同佢傾偈，
小小一眼就認出，婆婆咪就係尋晚果間八戸駅 - 天竜食堂，煮飯俾我地喫果個婆婆囉！
佢認到我哋同我哋打招呼之嘛，跟住一輪咀講啲唔識聽既日文，呢度啲婆婆好可愛，認得你又會同你講吓嘢咁，
唉．．．係時候學日文喇，學咗就聽得明喇！

呢樹有間好似以前啲屋村士多咁既舖喎 - 後村商店，當然入去八卦吓喇！！
嘩，啲嘢好平，人哋賣緊190円既杯麵，佢賣80円！
大約200円既薯片，佢賣90円！
吓？點解咁平？
財政大臣想買既時候，師奶小小裝多兩裝，食用期限係過兩日到期，
再望多幾款零食，有啲直頭係今日到期！
哦！！！真相大白，呢間士多原來專賣啲就快過期，
或者係今日到期，甚至係已經過期既嘢，唔怪得啲貨咁平喇！講明係就過期 / 甚至過期，只要價錢夠平，一買一賣，你情我願，無呃人。

唔似啲無良黑店，改食用期限，過期貨混新鮮貨賣．．．．

其實，小小想嚟陸奥湊除咗朝市外，仲有就係大洋食堂。
呢間大洋食堂專賣海膽丼同湯，
事綠上年夏祭喫過當造既海膽，真係又大又鮮又平又甜，一試難忘，
諗住今年再嚟喫，可惜，紅葉季即係過咗海膽季，啲唔當造既海膽，
可能又貴又唔好食．．．．．算喇，下次喇！
不過，唔喫都要影幅相，等自己記得嚟過但係無喫過。

齋睇唔得買，為免越睇越傷心，係時候撤退。


10:15 - 10:34 陸奥湊 > 八戸

[暫時是日消費] 0YEN 
－－－－－－－－－－
總共：0YEN