東北 紅葉 健行 (Day 3 - 蔦沼)

25 Oct 2011 - 29 Oct 2011 東北．紅葉．健行 (DAY 3 - 蔦沼)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 

10:49 - 11:35 由銚子大滝去蔦溫泉。
用今朝買既巴士券上車，仍然要上車抽飛仔。巴士車速唔太快，望住車箱兩邊既風景，聽住啲唔識聽既日本介紹，
尋日用腳行咁多個鐘，坐巴士只係40分鐘，小小覺得自己．．．．對腳真係好短呀！！！行咁慢！！！今日除咗臨時加入去既順走奧入瀨，仲有行程既另一重點：蔦溫泉
重點唔係浸日歸溫泉，而係蔦溫泉周邊全長2.4k既〔沼めぐりの小路〕。

一落車，再次確認下班巴士既時間，13:35會有車去青森，就把握時間，務必要2個鐘內完成，否則要等到15:05先再有車。
好，開波。一開始，又見到好靚既紅葉，仲加埋流水，
小小又開始擔心，會唔會好似奥入瀨咁掛住影相行唔完．．．

沿住〔沼めぐりの小路〕會見到6個沼，其中最大係蔦沼，
多數人只會用20分鐘來回淨睇蔦沼，放棄其他，
小小一心過嚟係行山睇紅葉，當然唔要20分鐘來回齋睇蔦沼，點都要睇哂6個。

蔦沼：好明顯過咗紅葉最靚既時段，沼對面既葉都開始枯，有啲樹仲秃埋，一遍泥色

過咗蔦沼，葉又開始靚

鏡沼：鏡沼既水好平靜，就算有風都無咩紋，靜到真係可以照鏡

〔沼めぐりの小路〕地下好多枯葉，行起嚟感覺良好，但好多時枯葉下底又係一陀牛屎泥．．．
一踩．．．．ship．．．

月沼：如果唔係見到有人走出嚟，真係無為意有條小路可以行入去睇月沼

上圖係月沼，下圖都係月沼，唔同相機，唔同mode，唔同人渣機，出嚟完全係兩個唔同既效果

嚟到〔沼めぐりの小路〕，由月沼去長沼呢段路，
抬頭响樹同樹之間見到蔚藍色既天，
所有紅橙黃三色既樹葉，全部俾太陽曬成一遍金黃色，
加埋地下既枯葉，成個畫面都係金黃色tone，

好靚，真係好靚，靚到難以用筆墨形容，今次嚟行沼めぐりの小路，絕對係一個正確既選擇

長沼：唔知點解，一落山見到長沼，覺得好靜好relax，好似一個世外桃園咁，
如果俾張草蓆過小小加埋飲住綠茶，望住個咁靚既景，應該可以坐幾個鐘都唔覺悶

菅沼

瓢簞沼

過埋瓢簞沼，全長2.4k既〔沼めぐりの小路〕行完。

如果出年有機會紅葉季去蔦溫泉住一晚或者浸日歸，小小絕對想再行一次〔沼めぐりの小路〕！！
．．．
用咗一個鐘頭九個字，行完〔沼めぐりの小路〕。

有諗過响蔦溫泉既食事處開埋餐先走，但响樹喫午餐的話，
會錯過13:35班車，要等到15:05．．．．．
．．．
算喇，响巴士站乖乖地坐15分鐘等巴士，直接去青森先再喫午餐。

[暫時是日消費]
巴士:6,000YEN
船:   2,600YEN
－－－－－－－－－－
總共：8,600YEN

註：
- 沼めぐりの小路地圖，可參考蔦沼周辺マップ
- 蔦溫泉：立寄り入浴大人500円，小人200円
- お食事処-蔦：營業時間11:00～15：00，last order14:30