品尚橫濱拉麵

每逢唔想煮飯既日子，就係出街搵好嘢食既最好時機，喫飽放低銀兩， 拍吓屁股走人， 唔使洗洗切切，煮到成身油煙味，仲要洗碗．．．．間中仲俾人彈話煮得唔好食．．．．講咁多嘢，懶就係懶，就係唔想番屋企煮飯。

是日去咗佐敦搵食 - 品尚橫濱拉麵。

味噌拉麵$46，魚介醬油拉麵$46
湯清無味精，味噌拉麵較魚介濃味；魚介醬油，又係無味精，有魚味既拉麵湯頭，小小比較少喫，唔錯唔錯，整體都係清啖口味；
拉麵係粗身少許曲果隻，比其他幼身拉麵更能掛湯，最緊要係無鹼水味；叉燒肥瘦適中，不過成身肥肉既小小，都係少食肥肉部份為妙；
雞蛋係正常半熟卵，無咩特別。

pizza春卷：真係有pizza味，有啲蟹柳，芝士，幾得意，但試過就算，因為pizza已經漏，炸pizza始終唔係小小杯茶

餃子：正常，唔係一陣風，可食可不食



埋單$146，價錢合埋，味道ok，埋單時暼見牆上有港人同日人既人氣top 5，下次可以番兜試第二款拉麵或人氣list。

風林特式燒烤專門店 Ken's Barbecue Kitchen

晏晝個所謂午餐去咗間美都餐室喫，一啲都唔好味，仲要唔飽．．．．唉．．．．嘥錢嘥Quota，
行多兩個鐘，頂唔順好肚餓，要搵地方喫下午茶！！！

行到太子附近，即刻諗起年幾前試過間餐廳味道唔錯，可以番兜試吓喎，不過唔知摺咗未．．．．
去到門口，未摺，即刻入去試吓水準係咪同以前一樣 - 風林特式燒烤專門店 。

一入門口揀位咗個二人位坐，諗住兩條茂李，唔好阻人做生意，坐二人枱唔坐四人枱 。
點知金髮姐姐話：門口有人食煙呀，坐四人枱喇，少啲煙味坐得舒服啲
小小咁聽話，當然即刻轉枱喇！！

財政大臣點咗個咸牛脷炒天使麵 $32包熱飲 。
有菇有牛脷，丁丁香草，有賣相，唔打得都睇得吓先；
即炒天使麵，香噴噴，熱辣辣，味道仲唔錯，$32蚊有即炒麵有熱飲，唔會期望有好多牛脷但起碼唔會得兩條，唔似某快餐店，$4x個乾炒牛河得兩舊牛肉。

墨西哥烤雞卷配薯條$28包熱飲 。
烤雞卷斜切用籃仔上枱，配埋薯條，加碟紅噹當茄汁同綠綠哋既香草，色彩繽紛，又係唔打得都睇得，
用墨西哥餅包烤雞，少少沙律醬，少少蕃茄，清新好味，若果餅皮無咁油同無咁痴面頭張腸粉紙會好啲，
但小小明白，用腸粉紙先卷起墨西哥卷 ，再斜切，雞肉既內汁同油點都會整到張腸粉紙．．．．
薯條即炸唔係番炸唔係凍冰冰果隻，正！！

唔使加一唔使搭枱，有賣相有味道兼價錢夠實際，呢啲小店賣食物賣得有heart，希望佢可以响呢個租金高企既時代繼續站得住腳，果啲齋賣懷舊環境而放棄一間食店應有既食物質素既美都餐廳，相信好快會被淘汰。

代替品

上回見到肥仔小小試味，大啖大啖喫薯條，細啖細啖飲啤酒，係咪好唔抵得呢？！
大大啖喫又脆又咸既北海道限定薯條，喫到得番兩包時，小小响吉之島見到下面呢包薯條，特價HKD17.9

個樣似模似路



開咗個大裝袋，入面細細包都似模似路
開埋細包裝袋，拎條薯條出嚟，直頭一模一樣．．．．．．
崇日小小一路諗：日本托番嚟既點都好味啲既，一路一啖港產薯條，一啖日產薯條．．．．
．．．．一樣味，一樣脆，簡直分唔出邊條係日產邊條係港產．．．．
好囉，日本限定薯條喫哂，心癮起時就有代替品囉！！！

最重要係價錢平一大截！！！！！

手信試味 (下)

掉低咁耐先寫下集，差啲連咩味都唔記得。

先嚟，最好味既北海道限定薯條！！
小小明明去東北睇紅葉，點解會有北海道限定薯條出現？！
係呀，係無去北海道，但見到機場有得買咪買嚟喫囉
呢盒差不多八十幾九十雞港紙既薯條，入面有10小包，每包有幾條粗薯條。
粗粗咸咸脆脆，鍾意香口嘢一定覺得好味！必買手信第一位！！



唉．．．第二位係溝貨黑蒜醬油。點解叫溝貨黑蒜醬油，睇舊嘢喇，傷心嘢唔重覆講喇，越講越傷心呀！
成舊水一粒既黑蒜，姑寒小小就唔捨得買喇，呢枝499円既黑蒜醬油試吓喇，話哂用嚟分幾次煮餸抵過一次喫哂既蒜頭。

第三位當然係小小最愛既花生豆豆。
買咁多食唔食得哂？好明顯．．．．．．喫唔哂喇，有包仲就嚟過期添喇，呢啲咪貪大食既後果囉，
買呀買，食呀食，買咗唔食會過期，買得太多食唔哂都係過期．．．．總之就越食越肥，越肥越食．．．

又嚟呢啲咩賞物賞嘢．．．．
繼之前既貎似月餅實質蘋果蛋糕，今次又買類似既嘢大宴親朋。
上次果個假月餅，餅皮真係好似月餅，今次唔似喇，因為係蛋糕皮；
因為親朋們一搣開包裝已經將呢件嘢分屍，，所以無好似上次咁，全程影相。

又嚟一包黑蒜嘢．．．．見到青森呢隻字，見到個黑字就當黑蒜喇！！(日文係咪真係黑蒜小小唔識喎，唔好叉輪住小小)
又係香口嘢，但無北海道薯條咁誘人，基本上小小覺得利是薯片好似好味過佢囉。

最後有蘋果酒樽形既酒．．．．到呢一刻小小都唔捨得開嚟試味，所以咩味都仲係一個謎。

美都餐室

財政大臣講咗好耐，話要去美都餐室，卒之得閒經過去試。
地下任坐，二樓二人坐窗口位的話限坐一邊，一定要搭枱，唔想搭枱麻煩坐中間圓枱。

老實講，環境對小小嚟講唔係咁吸引，因為細時住過吓唐樓，呢啲紙皮石牆，鐵窗框，膠地板實在太過熟悉。
講完環境講食物，預咗食環境唔係食食物，對食物全無期望，
因為無期望，連喫之前都無去openrice望吓咩評語，諗住填飽個肚就算。


左上熱奶茶，唔記得幾錢，味道據財政大臣口述，正常ok；
右上紅紅冰($17)，冰多，紅豆少，奶少，只記得有啲奶水味；
正中間西多士($17)，一份$17個大洋既西多士，一層麵包，無花生醬餡，又貴又唔抵；

再嚟，焗排骨飯($48)，大拿拿$48雞既排骨飯，[大]份得交關，小小隻細佬手唔伸盡都仲長過個碟．．．
細唔緊要，味道緊要啲．．．．
先嚟，汁望落茄紅色好似好靚但無味道，唔掂；
排骨雖然炸過再焗，但肥膏多骨大肉少，唔得；
最衰係個飯，濕到飛起，有如爛飯，一個爛飯仲要加汁上面拎去焗，估都估到入面咩環境，睇見都唔開胃，唔想食喫喇．．．．．


10分滿分的話，正體都有5分既，環境 5分 ，價錢 0分 ，食物  0分  ，環境唔係好吸引價錢又貴仲要咁鬼難食，下次有人請都唔會去 。

喫完呢餐，完全唔飽，幾想落樓轉個彎去喫牛腩麵．．．．