焗薯皮與格格薯

一罐打風咸牛肉，一餐喫唔哂喫兩餐，兩餐喫唔哂喫三餐，三餐喫唔哂．．．再唔喫哂佢，要喫過年架喇！！

所以是日早餐午餐下午茶，繼續咸牛肉做主打，
芝士粟米咸牛肉薯皮，咸牛肉粟米芝士薯皮，粟米芝士咸牛肉薯皮，咸牛肉芝士粟米薯皮．．．．咸牛肉 x 粟米 x 薯皮infintive loop．．．

見又係焗薯，今次唔用片裝芝士，改用芝士粉，扮新嘢；
再加多個焗格格薯，等財政大臣以為係老人雞新套餐．．．

今日晚餐，不如咸牛肉薯仔囉！！

增肥星期六

星期六去完shopping，無"訂"去，最好就係返歸玩吓玩具(焗爐)增吓肥。
早輪買落既酥皮喫淨一塊，係時候玩埋佢，吉番個雪櫃出嚟入新貨

。

咸牛肉酥皮角：
材料：急凍酥皮一張，打風食品咸牛肉一罐
做法：
1. 一張酥皮開四個正方形，撻啲咸牛肉落去，打斜角對摺成三角形,
用叉壓邊，備用
2. 用丁丁油塗均焗盤，放上酥皮角，230度上下火焗20分鐘
3. 反轉酥皮角，焗多5分鐘
4. 四件又香又酥又脆又辣咀既咸牛肉酥皮角出爐喇

開得焗爐，點可以焗得一款嘢呢？
開得罐打風咸牛肉，焗一張酥皮邊喫得哂？
整多個邪惡樹(薯)皮喇！！

邪惡芝士粟米咸牛肉薯皮：
材料：急凍薯皮，咸牛肉，粟米粒，芝士
做法：
1. 好簡單/暴力/優雅．．．

咁塞哂啲咸牛肉同粟米落薯皮果度
2. 扮哂嘢咁切片裝芝士成條裝，舖上薯皮度
3. 230度上下火焗20分鐘
4. 邪惡到飛起既薯皮出爐喇！！

食咁多酥皮呀薯皮呀都飽哂咯，原本諗住煎塊安格斯西冷都喫唔落，
唯有整埋個頭盤既蝦當主菜算喇．．．

山頭火？火山頭？頭山火？

好outdated既小小，呢次好唔outdated咁，去咗新開既新商場iSquare喫飯，
但呢間山頭火？火山頭？頭火山？其實一早向康怡廣場開左好耐，
實質小小都係繼續outdated。

財政大臣點咗個麵豉味拉麵$58，減小減$10，加大加$10，
但減小或加大只係減麵同加麵，唔係加減入啲筍呀肉呀咁。
麵豉味拉麵：濃口湯底，肥油一層，碗面喫哂個湯都仲熱，唔錯

貪心小小當然要個拉麵加飯套餐$75，鹽味拉麵加咖喱飯。
鹽味拉麵個湯啲，唔鍾意濃味既選呢個好過麵豉味，
但都係有層肥油向面，保溫一流；
咖喱飯就普普通通，好似自已煮果啲咁，早知慳番，要個小版拉麵算。

若然唔使排隊等位，喫得888多，都可以嚟呢樹開飯。

自家最掂丼 - 肥牛飯

上次入貨入咗包肥牛，卒之諗到點煮喇！！就扮吉吉家既牛肉飯喇！！

材料：
1. 小型洋蔥一個切絲
2. 肥牛一包
3. 淡口豉油，味醂，昆布汁，水

做法：
1. 落丁丁咁多油，炒香洋蔥
2. 炒到洋蔥軟身，加味醂加豉油加昆布汁加水
3. 一路煮一路試味，唔夠咸落豉油，唔夠甜落糖落味醂，唔夠鮮落昆布汁，唔夠汁加水 (好不負責任既食譜呀

)
4. 試啱味最後先落肥牛，僅熟就好熄火盛起，否則肥牛老到飛起

吉吉家肥牛飯精粹係：多牛汁要嚟撈飯

，
切記落多丁丁水，煮好哂後盛一碗汁一齊上枱撈飯喫．．．．
要扮最掂丼扮得得更神似，就要落丁丁椒片同七味粉

買果陣覺得啲肥牛脂肪分佈得好均勻，唔太肥，覺得好good good架，
但煮起上嚟，啲肥油出哂嚟，
碗牛汁成層肥油向面，撈飯喫果陣好似飲肥油咁好有罪惡感架

但塊肥牛喫起上嚟又覺得唔夠肥喎，做人真係好鬼麻煩既姐。

健行 - 南生圍與下白泥(2010/01/01)

兩年前既元旦日行過山，今年元旦日又動議攪健康活動，又一呼百應喎，一於又嚟個簡簡單單大西北一日遊。

先嚟於元朗西鐵集合，喫個豐富既早餐，然後一行8人坐的士去南生圍。

嚟到先知，原來呢樹咁多雀仔睇，早知就向籠底摷個望遠鏡嚟。
睇完雀，繼續行，有人放狗，有人野餐，有人玩相機，有人玩遙控直昇機，更利害既係有人玩遙控坦克車．．．

睇完人玩遙控嘢，繼續見路就行，行咗入田基，影吓魚塘，雀屎樹，爛屋．．．

傳聞中既橋頭景，一對男女正正影緊結婚相，等極都未影完，
唯有放棄，繼續向下一站發。

行完坐橫水渡出番采葉庭，橫水渡每人$5，需時唔使一分鐘，
每轉最少10個8個人，有時仲超載，
短短10分鐘，最少有40人，計番時薪有$1200啊！！！
撐艇阿婆兩日開埋夠一個星期，撐艇阿婆，要請兼職嗎？

出番元朗市中心，喫個下午茶，再出發去下白泥。
由於天氣關係，是日天陰多雲，已有最壞打算睇唔到日落，
點知真係睇唔到，唯有撤退。

由朝玩到黑，只係喫咗個大早餐同下午茶，下白泥撤退後，當然要去喫餐好喇！！

坐輕鐵去三聖，喫番餐海鮮大餐。

京都骨

辣酒花螺

蒜蓉粉絲蒸象拔蚌仔

豉椒聖子

炸蠔

斑馬瀨尿蝦

料連加工，9人共$1600。
又食又玩，又係一個完美既元旦日。