手信試味 (下)

掉低咁耐先寫下集，差啲連咩味都唔記得。

先嚟，最好味既北海道限定薯條！！
小小明明去東北睇紅葉，點解會有北海道限定薯條出現？！
係呀，係無去北海道，但見到機場有得買咪買嚟喫囉
呢盒差不多八十幾九十雞港紙既薯條，入面有10小包，每包有幾條粗薯條。
粗粗咸咸脆脆，鍾意香口嘢一定覺得好味！必買手信第一位！！



唉．．．第二位係溝貨黑蒜醬油。點解叫溝貨黑蒜醬油，睇舊嘢喇，傷心嘢唔重覆講喇，越講越傷心呀！
成舊水一粒既黑蒜，姑寒小小就唔捨得買喇，呢枝499円既黑蒜醬油試吓喇，話哂用嚟分幾次煮餸抵過一次喫哂既蒜頭。

第三位當然係小小最愛既花生豆豆。
買咁多食唔食得哂？好明顯．．．．．．喫唔哂喇，有包仲就嚟過期添喇，呢啲咪貪大食既後果囉，
買呀買，食呀食，買咗唔食會過期，買得太多食唔哂都係過期．．．．總之就越食越肥，越肥越食．．．

又嚟呢啲咩賞物賞嘢．．．．
繼之前既貎似月餅實質蘋果蛋糕，今次又買類似既嘢大宴親朋。
上次果個假月餅，餅皮真係好似月餅，今次唔似喇，因為係蛋糕皮；
因為親朋們一搣開包裝已經將呢件嘢分屍，，所以無好似上次咁，全程影相。

又嚟一包黑蒜嘢．．．．見到青森呢隻字，見到個黑字就當黑蒜喇！！(日文係咪真係黑蒜小小唔識喎，唔好叉輪住小小)
又係香口嘢，但無北海道薯條咁誘人，基本上小小覺得利是薯片好似好味過佢囉。

最後有蘋果酒樽形既酒．．．．到呢一刻小小都唔捨得開嚟試味，所以咩味都仲係一個謎。

手信試味 (上)

去完旅行都一段日子，帶番嚟既手信都試得七七八八．．．．．．． 試味報告如下。

首推：青森買既蘋果味SPARKLING，有汽蘋果味果汁？汽水？好蘋果味，無果汁咁惹痰感覺，又唔似汽水咁死甜，香香清清甜甜，不過份量少得滯，幾啖就飲哂唔夠喉


二推：青森買既蘋果味啤酒，少少蘋果味，多多啤酒味，估唔到蘋果同啤酒可以咁夾架



有無發現首推同二推，有啲共通點，就係樽身上面有啲類似推介推奬咁上下既標籤！！如下圖
日本啲土產，好興有呢類推介推奬咁，有啲舖頭仲會列埋當店人氣排名手信添！！

咁係咪買有咩咩推介，咩咩推奬呀就實無死？
基本上十樣貨品九樣有咩咩金賞咩咩推奬，仲有口味呢家嘢，人人唔同架嘛，
好似小小咁，鍾意蘋果味，鍾意朱古力味，呢兩樣副產品小小多數都話好味，
其他人口味唔同就唔認同架喇，所以咩咩推介咩咩推奬同埋尤其係小小既推介，望吓算喇，唔好信呀


再嚟，蘋果批(左) 蘋果汁蛋糕(右)
左邊呢條蘋果批，就係見到一堆阿公阿婆掃貨，師奶小小唔抵得慌死無得買又走去搶，味道呢，又係人人唔同喇，甜咗啲咁囉，同埋個批皮質感小小唔多歡喜，連鍾意蘋果味既小小都唔多鍾意咁囉，早知就唔同啲阿婆爭喇．．．．．．

右邊蘋果汁蛋糕，又係甜咗丁丁，但同蘋果批比較，蛋糕好味啲喇



見唔見到雞乸咁大個受賞貼紙，都話受賞唔一定啱口味架喇！！！！


E！！原來仲未飲咖啡，唔怪得諗唔起咩味．．．．
但奥入瀨限定啤酒飲咗喇，味道．．．．好重麥味，好苦，小小同財政大臣都唔鍾意，等小小仲托呢樽嘢杔足全程呀！！！！
仲要用腳行既全程呀！！
响燒山落車即買，揹住由燒山行咗大半日奥入瀨，第二日又由子ノ口行到銚子大滝，跟住再行蔦溫泉既沼めぐりの小路！！！！

唉，都知道總有啲嘢好味，有啲嘢唔啱口味，但估唔到唔啱口味既嘢揹得最耐最辛苦．．．．．．

東北手信 - 比內地雞麵

呢盒自用手信，價值840円，四人前，平均210円一人前，兌番港紙十幾廿蚊咁滯。
雞乸咁大隻字：比內地雞，拎上手秤又錘手，斷估係好嘢，即買。

話說由東北返歸之後既某天，為咗盒比內地雞麵，
專登早一日炆定啲梅頭豬內粒粒，諗住配埋呢個貴價麵嚟喫！

滿心歡喜，搣開膠紙，打開個盒．．．
嘩！！四個拉麵！！再加四包比內地雞麵汁！！
四個拉麵值幾錢？！咁貴應該精華向哂個汁入麵喇。

開火煮麵，同普通鹼水拉麵一樣，滾到起哂泡，一陣鹼水味，
煮好麵過過水清清啲鹼水味，用滾水開咗包麵汁，加埋麵，上枱。
避免影響麵既味道，豬內粒粒同菜另上，
雪啖麵入口，唔．．．．．．毫無特別之處，
試多幾啖淨麵，淨汁，感覺一樣。

回水呀！！！！
山長水遠托番嚟，唔特別都算喇，
但小小直頭覺得，價值三蚊港紙既公仔麵都好食過佢！！！
回水呀！！！！

東北手信 - 蘋果

小小向來鍾意喫蘋果，去到專門出產蘋果既青森弘前，點都要買番啲蘋果手信。
嘩，又紅玉又金賞，好嘢喎 (會唔會同個比內地雞麵一樣瀨嘢？)
好嘢唔可以獨食，專登拎番去同CEO一齊分。

為咗高度重視呢個640円既蘋果，大拿拿差不多六十蚊港紙既蘋果，大少全程影相

搣開熱辣膠，打開紙盒，仲有層密封膠袋，
再開膠袋，酸酸甜甜既蘋果味湧出嚟，
切開，感覺好似切月餅咁，有皮有蓮蓉 (蘋果肉)，中間仲有蛋黃 (唔知咩餡)！！

食落，
個皮唔厚唔漏，以為係酥皮但無酥皮既油膩感，
蘋果肉仲有少少爽口感覺，酸酸甜甜，咬落仲有汁，
個唔知咩餡，食唔出似咩，
總括，味道唔錯喇，起碼唔似比內地雞麵咁瀨嘢。

大少話食落唔似月餅，但望落真係好似用餅，
咬啖再拍住個月餅盒影，當喫咗月餅

東北手信 - 啫喱

想寫新卜，先發覺咁多東北手信想講又未講，
拿拿聲講完啲舊嘢，先可以講新嘢，所以一日之間出三個新卜，
查實都唔算係新嘢，話哂去完旅行都成個幾月。

呢兩款啫喱都係向青森買，
左邊既係梅酒啫喱，向超市買，
右邊既係蘋果啫喱，向青森県観光物産館アスパム，
價錢唔係太記得，但肯定梅酒啫喱平過蘋果啫喱。

梅酒啫喱：
見到有粒梅，即刻諗起啋吖梅酒，口水都流埋，即買；
味道一般，無酒味，清清地，個樣呃得吓人之外，無咩特別

蘋果啫喱：
又係因為蘋果味產品，小小又敗咗番嚟，
搣開時，聞到好香蘋果味，放入口．．．嘩，咩質地，腍滋滋，質感好差，
好似喫水狀蘋果泥咁，完全唔似啫喱質地，
雖然係有清甜既蘋果味，但唔掂呀

總括嚟講，果啲向手信專門店買既特產，又貴又唔特別，
反而超市買果啲平平哋仲啱口味，
下次都係乖乖哋向超市入貨算數。

花生豆豆

自從第一次去日本買過花生豆豆俾自己做手信之後，
每一次去日本都要買，唔買唔安落果隻。

喫呢個花生豆豆真係好開心，
好多粒，好多顏色，好多形狀，好多味道，貪心小小最鍾意咩都多！
拎一粒上手，望吓咩顏色，咩形狀，估吓佢咩味，
放入口，咬開一半，裡面粒花生跌落條脷果樹，
再〔梅〕吓半邊麵粉殼，咬吓半邊麵粉殼，
鹹鹹地醬油味，鯹鯹地既紫菜，甜甜地既麵粉殼，唔．．．好味！！

肚餓果陣喫又得，喫幾粒就唔使肚空空；
喫飽飯再喫又得，喫多幾粒填埋僅有既位，得咗。

煮咩好送飯？

想拿拿聲食哂啲米開包新米？
齋喫白飯？搵鬼啋你，煮啲好送飯既嘢喇。

開包財政大臣最鍾意既嘢．．．．．日本買番嚟既伊達牛舌 / 利久牛舌，
食多飯又得，食多多飯都仲得，得咗。

材料：
1. 伊達牛舌 / 利久牛舌

做法：
1. 丁丁油，煎熟牛舌
2. 禮成
簡單到飛起呀，包牛舌已經有味，咩都唔使落，就咁煎熟已經非常美味

淨喫肉唔健康？加多個魚香茄子咪得囉

材料：
1. 茄子
2. 豬絞肉
3. 鹹魚
4. 少量XO醬，少量蠔油，少量水

醃料：豉油，糖，鹽，豆粉，麻油，鍾意落咩就落咩

做法：
1. 丁丁油，炒熟豬絞肉，邊煮邊整散
2. 煮到豬肉7成熟，將豬肉撥埋一邊，再落咸魚碎，拌勻
3. 再將豬肉碎同咸魚碎撥埋一邊，用豬肉出既油煎茄子
4. 最後落少少XO醬，同埋少少蠔油，加少少水，煮到收乾就得

有咗呢兩樣好送飯既餸，唔覺唔覺就會喫多啲飯喇！

秋田米，山形米

今年既東北追祭之旅，經過兩個盛產米既地方：秋田，山形
為食小小當然唔執輸，托番兩款米返嚟，慢慢煮慢慢嘆。
(左) 山形米 (780円)，(右) 秋田米 (718円)

點知早兩日行超市，發現原來香港都有得賣右邊果款秋田米 =____=
仲做緊特價，原價$190家陣特價$102，早知就唔使托喇．．．．
不過，唔托都托咗番嚟，得閒煮多兩餐飯，
喫哂包秋田米，再開包山形米試吓先。