2012年2月18日星期六

太極樓京滬飯店

行山後的活動.....當然又是吃囉。

財政大臣帶小小到柴灣的太極樓。六點不到,可能太早還沒有其他客人,只得我倆,挑了窗邊的位置。樓底極高,天還未黑,窗外透入的天然光令人感覺舒服,全無壓迫感。




餐牌中的食品價錢實惠,一口氣點了八款食物。
油爆鱔片煲 $65:很多鱔片,配以青椒紅椒筍,十分惹味
蒜子上湯小棠菜 $42:普普通通,沒啥特別
蒜泥白肉 $38:蒜泥白肉,多數配辣的醬汁,這兒的卻配上甜豉油,碟底還有粉皮,粉皮沾滿甜豉油,不能吃辣的小小非常歡喜這個配搭
太極小籠包 (4隻) $18 :有肉汁,皮厚適中
鮮肉窩貼 (3隻) $15 :鮮肉窩貼的肉餡,與小籠包的一樣啦,只是麵糰厚些及煎的吧,味道可以
蒸銀絲卷 (1條) $10 :老實說,現在吃的銀絲卷其實是饅頭,內裡沒有一絲絲,這邊的銀絲卷雖有一絲絲 (一半啦,不是全部),但包面有少許濕,蒸包大忌,扣分,味道還是唐記包點的饅頭較好味
炸醬湯麵 (1碗) $25:正常沒啥特別
擂沙湯丸 (4件) $15 :黃豆粉有點沾得不均勻,但上枱熱辣辣,小小懶理直放入口,熱呼呼,好吃


茶錢$3  x 2,另收加一,埋單 $257.4,價錢實惠,味道可以,作為屋企附近的飯堂,可以吖,但山長水遠的去試就不必了。

健行 - 紫羅蘭山徑 (2012/02/18)

吃了鮪魚蓋飯,有力氣,要做做運動,減少罪惡感。
到港島的紫蘿蘭山徑走走,吹吹風,看看吊鐘花,遠眺南丫島,輕輕鬆鬆,天黑前到終點大潭道 。



順億鮪魚專賣店 Soon Yi Tuna Sushi

前陣子不記得於雜誌?報紙?網頁?看到有間台灣船業公司自家開設食店,並進駐香港,以〔抵食〕價錢售賣自家捕獲的鮪魚。
小 小當時只有:E!唔貴喎!的念頭,沒想過要試,因吞拿魚不是小小杯茶,看見吞拿魚只想起罐頭油鹽水吞拿魚,吞拿魚醬粟米沙律,還有外貌樣衰到痺的X綠吞拿 魚醬軍艦壽司,吞拿魚醬溝上過多的沙律醬稀溜溜,紫菜過氣濕軟似足沾水廁紙,吃了好像會肚疴的樣子......噢....。

再過一陣子,又見到報紙上的食評人 (不知是否鱔稿) 大讚吞拿魚蓉飯抵食兼好食,邊食邊想起遊日時的吞拿魚蓉飯滋味。
嘩,不得了,想起遊日食味,呢期崇日小小,即刻上當,連忙告訴財政大臣:我要喫吞拿魚蓋飯!!!


於是.....去吃囉!
星期六,十二時多到,只有一枱客,很好,不用排隊不用迫不用等位。

星期六不供應午市套餐,但有其他套餐,可惜其他套餐內的食物不是全部想吃,想試的吞拿魚蓉飯又不在套餐之內,唯有點主餐牌中的食物喇。

吞拿魚味噌湯 $8 x 2:甚少於餐廳單點湯的小小,主動點選此湯,因為吞拿魚專門店賣吞拿魚湯,良心店理應將全部魚骨,魚頭,下欄位全掉湯煲,難喝極有限,可試試。果然不出所料,魚味鮮甜濃郁,配上豆腐,魚肉,香蔥,一乾而盡,回味無窮。

吞 拿魚腩握壽司 (大脂) $35 x 2:赤身沒脂肪,中脂要$25,就付$35試試大脂,人們常說脂肪滿盈的刺身,入口即溶,油脂味遊勻口腔,令人感動,窮鬼小小姑寒沒錢不捨得試如此高檔的 刺身,於順億以$35的價錢,負擔之內又可以吃最肥美的,就試試喇!肥,美,沒筋,但沒感到入口即溶,$35試過便算

吞拿魚丼飯 $60:赤身八塊,一條生菜,薑,芥末,總覺得生菜與刺身丼有點格格不入,可能大大的一塊生菜,佔去碗面一部份空間,會令丼看落不至於太冷清清。赤身的味 道,令小小想起初嚐吞拿魚,有股像鐵又像血的味道,不是難吃,只是想像力豐富的小小,每每吃飯之時總聯想一些令人倒胃的感覺。

吞拿魚蓋飯 $55:不知由哪部位組成的魚蓉飯,啄得如此爛,沒吃出筋,間中還有吃到魚油魚脂味,不錯呀。多吃碗魚蓉飯,好過吃赤身飯!


午市不用加一,$201,可以番兜 $55吞拿魚蓋飯及性價比非常高的$8吞拿魚味噌湯

2012年2月14日星期二

情人節

小小雖懶,借口多多少煮飯,但少煮不同無煮,只是普普通通炒炒菜蒸蒸肉,炒菜蒸肉如此簡單都放上部落格,怎夠小小曬命。
來,今晚情人節食材足夠曬命,立即寫BLOG。

老年前於批發大量入日式食材,3S的鮮甜帶子令小小一直掛念非常,可惜份量偏多,1KG二人獨食,真的吃到厭都未吃完,有如麥太的聖誔火雞一樣,由聖誔食到新年,新年到復活,復活到清明,清明到重陽,重陽到中秋,中秋再到聖誔,亦見火雞蹤跡,齋睇都覺厭 。

前日樂富之行,於日式超市手入一盒特價中$168的刺身用帶子,$168價錢合理,0.5KG,應該未生厭,下年情人節前會吃完,即買。

得盒帶子,齋喫帶子刺身,不夠曬不夠炫啊!
趁情人節,於百雞扮富有,買盒貴價$227.5雜錦刺身,返歸自煮白飯加糖加醋,將刺身連同帶子舖上飯面,兩碗刺身丼可以上枱 。

小小愛曬命,寫食譜(低能)煮法,但電飯煲一嘜米煮熟加糖加醋,這都算食譜嗎?所以今均情人節扮大廚無食諎喇!
真的要寫的話,如此囉

材料:刺身,白飯,醋,糖
做法:
1. 煮熟飯
2. 加糖加醋拌勻
3. 舖上刺身
4. 開動

第一啖,當然試於日式超市手入的帶子喇!!!!
唔......ER.....無味既!!!
有無攪錯,百雞刺身的帶子,比這盒$168帶子還有甜味,不甜不鮮無味道,回水呀!!!!
唉,又要想辦法,得閒用豉油,生抽,老抽,辣油....煎兩粒,兩粒....再兩粒,無謂再生食.....

唉,呢盒帶子,雖然得0.5KG,但可能明年情人節,打開冰箱仍在.......

是日曬命不成,但都要寫部落格作警惕,認住呢個牌子,不再上當!

2012年2月12日星期日

中環 (2011/02/12)

又係一年一度過海既日子,今年唔去搵肥叉飯喫,
因為次次都係呢啲時候過海,次次都話喫再興,
點知次次都仲係新春休假緊.....

今年唔去再興摸門釘,去搵豚王。
12:45去到,條人龍起碼五十幾人,好在有帶新玩具,
由得政大臣同老友排隊,小小帶住新玩具去兜圈


兜咗個圈,條龍無郁過,再去兜圈
早餐只係飲咗杯薑蜜,飢腸轆轆咁去影相,見到鏞記,
忍唔住企向窗口前面望師傅斬雞斬乳豬斬燒鵝


兜完第二次圈,前進咗幾個身位,但前面依然有四十幾人等喫麵。
好,繼續兜圈


再兜遠啲,去o都兩蚊,去搵豆腐花,去蘭芳園....隔離間超市兜吓等吓再兜吓又等吓,為咗喫碗拉麵,竟然排咗兩個半鐘

2012年2月11日星期六

丼丼屋食堂 Dondonya Shokudo

是日繼續祟日之食。

路經樂富,丼丼屋食堂新開業,愛新屎坑之小小,當然又扮醒向財政大臣建議:試新嘢!丼丼屋。
喜愛新屎坑豈止師奶小小一個,阿叔阿伯師奶大姑,齊齊排隊等。
十二時半左右到達,等了大約三十分鐘,有二人位,即入坐兼即落order。

左:滑蛋雞肉丼$48 - 餐牌寫明是日本蛋,熱愛日式滑蛋XX飯的小小,不用多想即選滑蛋系列
滑蛋 + 洋蔥 + 汁 好味,可惜雞肉又靭又鞋,$48價錢無想過要日本雞或走地靚雞,無雞味亦無所謂,但別鞋口如此,與滑蛋一同送入口,對比度相當高,亦倍感滑蛋好滑雞肉鞋口,下次可再吃滑蛋丼但走雞唔該

右:滑蛋豬扒丼$78 - 價錢相對其他丼為高,想必以為豬扒乃好貨色,可惜,依然滑蛋 + 洋蔥 + 汁 好味 ,但豬扒如財政大臣所言,只是合格一般,下次寧選其他


左:芝士薯餅$28 - 芝士薯餅與滑蛋丼一同落單,三十分鐘吃完飯仍未見其踪,好明顯漏單,一經追問,三分鐘即上枱;
剛炸起,外脆內軟熱辣辣當然可口,芝士味不太濃,薯仔味亦不太重,試過便可,不用番兜
右:宇治抺茶雪糕新地$15 - 點選主餐牌內的食物,可加$15享用原價廿幾銀的雪糕新地,貪心鬼小小縱使咳嗽未癒亦不放過任何食特價雪糕的機會;
北海道牛奶所製成的雪糕,香,滑,可惜份量好少啊,不過$15的雪糕份量,總不能要求太多, $15 就算了,原價小小一定呻笨


連加一$185.9,除非好肚餓但又沒其他選擇,否則番兜指數實在不高 。

2012年2月10日星期五

千両 sen-ryo

雖然昨天吃過拉麵,但今天依然想吃日本菜,心裡一直想:好想吃刺身丼呀...好想吃刺身丼呀...
財政大臣耐不住小小的煩音,拋下幾個選擇給小小,然後繼續忙於工作。

monster sushi,千兩。小小立即上開飯網參考食評。

monster sushi:有人吃過刺身丼,味道不賴,食評中還付上照片一張,看得小小口水直流,一路看一咯擦口水...差點兒想啃掉電腦屏
千兩:有人讚有人彈,但小小心繫monster sushi那碗刺身丼,讚呀彈呀的食評看完就像沒看....
今晚晚飯的選擇,顯而易見!

去到monster sushi門口,立即掀開餐牌,看看小小最愛的刺身丼是否依然存在。
要知道,餐廳每日提供的食品,真的有機會不同喇....果然不出所類,刺身丼只限午餐時段供應.....
立即轉移目標,去千兩。
可惜千兩都一樣,晚飯時段沒有刺身丼無應.....嗚...
連跑兩間餐廳都沒有刺身丼,再跑其他餐廳,結果都可能一樣,算了,千兩就千兩,橫豎從未試過。

抓開餐牌,嘩,果然是高檔板壽司店,相比板前呀,元氣呀,價錢果然高啊!
沒有刺身丼,心情直墮谷底的小小立即姑寒症發作,左看右看都選不來,是晚由財政大臣發板。


左:鹽燒三文魚腩鮫 $40
中:胡麻海鮮沙律 $55
右:築地鮮嘗五點刺身 $180

左:大金槍魚腩壽司二件 $70 ($35 each)
右:松葉蟹柳壽司 $35 及 甜蝦蟹膏軍艦 $16

老實說,埋單連加一要 $435.6,四百多塊吃完沒有飽的感覺,味道雖然比元氣好,但試一次就夠囉。
因為姑寒小小覺得唔抵,數天前吃過博多道場,同樣是數百元(雖然食物不同喇),美味得來又夠飽,付數百元都付得較心甘命抵呀。

2012年2月9日星期四

健行 - 東平 (2012/01/29)

除咗食之外,小小間唔中都有郁兩三下....咁大把。今日揀咗去東平。

天都未光就要出門口,皆因船就得一班,又要轉地鐵再轉火車,仲要去排隊,隻船滿哂有排隊但排最後都係上唔到,唔早啲出門口又點得呢?
今日天氣又凍又陰,預咗影相無夏天咁好太陽,但冬天天陰影出嚟唔同感覺喎!

2011 / 07 夏


2012/01 / 冬


鳥華 Torihana


忽然好想好想食拉麵,要好吃的,不要味千,不要別府,要是味千與別府,情願回家煮個一丁麵。
What's App財政大臣後,立即上開飯網,搵搵搵....

見到鳥華,主打雞湯拉麵,不是豬骨,好,就試試!
一行四人,六點半到達,不用等位。
星期一至四有套餐,HKD$88起,一碗麵,一客迷仔飯,一客三隻餃子。

雞白湯拉麵:
拉麵一上枱,己經聞到濃濃既雞味,顏色似足自家煲咗成日既老火湯,飲落唔肥膩;
麵粗而帶曲,可以掛湯,啖啖麵都有雞湯味;貢菜爽爽脆脆,好味;
雞肉叉燒三片,稍鞋,嫩滑點會可口啲;
蛋,加$9,半熟,溏心,不是味玉,唔多抵。

迷你飯:
雞肉雞蛋 - 雞肉同雞蛋炒到非常乾,仲乾過小小個荷包,飯一樣又乾又硬 - 難食
炸免治雞肉漢堡 - 財政大臣話味道ok

餃子:
喫完拉麵同迷你飯,已經飽到上心口,餃子夾硬咬一隻後,全部交俾財政大臣,所以唔係好記得咩味


第一次喫雞湯拉麵,感覺良好,可以返兜,但如此乾硬的迷你飯就可免則免喇。

2012年2月8日星期三

神屋流博多道場

想食好嘢又無訂位,放工即刻碌去即場walk-in摶吓有無位,lucky,bar枱有位有得喫。


望到餐牌,好多嘢都好想喫,呢期鰤魚當造,點咗餐牌上面既推介 - 鰤魚刺身$88。
個樣望落相當油潤有光澤,唔似小小個荷包又乾又灰;
肉紋油花清楚分明,食落彈牙爽口美味,唔錯;不過小小呢挺窮鬼,$88得5塊,試過算囉



咁大個備長炭爐响樹,當然要試吓呢度既串燒喇!
雜錦串燒118有5串,但無得揀,師傅俾咩就俾咩,是但喇,唔係C就得。
師傅拎住啲串燒响兩隻蝗蟲前面翻來翻去,陣陣炭燒香味飄過嚟,引得兩個坐BAR枱既蝗蟲口水直流 。



是日雜錦串燒有:雞軟骨,煙肉包毛茄,魷魚,雞肉,雞翼 。
煙肉夠肥帶鹹,毛茄燒完都唔乾,帶丁丁滑溜,好味;雞軟骨少鹹多脆,送啤酒一流;
魷魚普通;
雞翼同雞肉一般過一般,雞翼都仲有肥皮,但燒得唔夠香脆,鹽花多點會好味啲,雞肉無味唔好食 。


南蠻炸雞(大)$58:貌似香脆但唔脆,咬落腍腍既口感,小小即刻想放棄,但 $58 既炸雞,都要喫喇!
咬深啲....咦?有肉汁,仲幾好味喎,點啲沙律醬,正!喂!好嘢嚟喎,即刻喫多兩舊!!!
呢舊唔脆既炸雞,好味過頭先啲串燒雞好多 。


跟住,主角出場喇!!博多牛腸鍋(蕃茄湯底)$168 。
牛腸鍋凍上,即刻用GAS爐煮 。
望落牛腸其貌不揚,紅紅既蕃茄湯底,加幾舊蕃茄幾條韭菜,丁丁紅椒絲...小小呢啲最鍾意以貌取人既港女,硬係覺得得顏色靚靚既蔬菜吸引過條牛腸 。
湯底滾起,聞落味道又唔差喎,一陣膏香,唔....又流口水
一心諗住要滾好耐先喫得,店員提醒,滾一陣好喫,煮太耐,牛腸會失去肥膏既油香!!
哦,小小最聽話,即食!!

丁丁湯,一舊牛腸,一舊蕃茄,幾條韭菜一齊喫....嘩!好味呀!
蕃茄少酸開胃,韭菜清新,牛腸肥美甘香,雖然牛腸較韌(牛腸本身應該係咁....卦),但一軟一韌,一清一濃,口感同味覺都配合得天衣無縫 。


話咁快就喫哂啲牛腸同蔬菜,雖然牛腸份量唔多但夠,太多只會令人感覺肥膩,望而生厭,呢個份量真係剛剛好 。
咁快喫哂啲牛腸同菜,咁個湯底呢?剩底既湯底先係精華所在,一早點定既雜坎$38,就响呢個時候上場喇!!

倒哂啲飯落鍋,滾起打隻蛋,最後落蔥花,
白飯索哂湯同蕃茄牛腸精華,鮮甜,肥美,蛋花,油香,青蔥,正到不得了!!!
減月巴呢啲嘢,喫哂呢餐先再算喇......



埋單$517,唔平,但大滿足!!