東北 紅葉 健行 (Day 2 - ホテル十和田荘)

25 Oct 2011 - 29 Oct 2011 東北．紅葉．健行 (DAY 2 - 十和田湖)

---

[Day 2] 26 OCT 2011 (八戸 > 奥入瀨 > 十和田湖)

今日天黑前行唔完奧入瀨溪流，即刻改行程，明天繼續未完成既部份，
自遊行就有呢個好處，話改就改。

16:05 - 16:33 坐上東北巴士，由 雲井の流れ 去 十和田湖(750円x2)。
去到十和田湖，17:00都未夠，天都黑哂。
十和田湖呢個巴士站好得，門口有廁所，裡內賣土產，
唔望真見到部巴士券自動售賣機，真係會以為自己去咗土產店而唔係巴士站。
响巴士站間土產店兜完圈，再去碼頭果邊既土產店兜圈，順手視察環境。
頭先落巴士前，財政大臣離遠見到小小預訂酒店既名，掛响間好grand好大既建築物上面，
財政大臣又繼上次秋田之後，又一次用懷疑既眼神望住小小：係咪呢間酒店？家陣仲有架shuttle免費由東北巴士站接送去 [ホテル十和田荘]，
財政大臣又懷疑喇：係咪真係呢間酒店架？
小小：俾張酒店vouchuer過司機睇，佢車我哋去咪係囉，唔車咪最多自己行，都係幾步路姐司機先生望完張vouchuer就車到我哋去門口。
一落車，咪喇，對真啲間酒店名先喇，小小呢啲cheap精，好少會訂啲咁靚既酒店架嘛！！．．．．．
結果，係真既，可以去check-in。

小小上網book果陣，見ホテル十和田荘最平，咁咪book囉，無諗過佢咁大間！！

[晚餐 / 住宿]：ホテル十和田荘

入到去check-in，再視察環境，呢間酒店真係幾大間，
有手信店，食事処，大浴場，仲分室內室外溫泉添。

經樂天訂，每人只係5,555yen(加200yen入湯稅)，包一泊兩食，
仲送 食事処啤酒一杯 / 汽車油券500yen / 手信店500yen　三擇其一。
小小無車，啤酒又唔值500yen，當然揀手信店500yen割引券喇！！
最正既係，小小搵到用東北旅遊優待卡，仲有9折添呀！！
二人11,110yen，9折折實9,999yen，
加埋入湯稅，埋單只係10,399yen，仲要有手信店割引券送，正呀！！
咁平？包一宿兩餐？有大浴場？有溫泉？有割引券？有無咁大隻雞脾放响枱等你喫呀？！
齋講無用，睇相喇。

房入面有提供兩條大毛巾，兩條小毛巾同牙刷，浴衣，
即刻劈低啲書包行李，拎條毛巾換件浴衣去試咗個大浴場同溫泉先。

大浴場向地下過橋再落一層，有分男女唔係混浴，放心。
溫泉仲有分室內同室外，5-6度既天氣，最好就係浸完室內溫泉再跳去浸室外溫泉喇。
疏肝乎？當然疏肝。(小小唔係偷窺狂，唔會帶相機去大浴場同溫泉影相架，要睇相去參考官網喇)

試完大浴場同溫泉，咁手信店割引券呢？好，浸完溫泉去shopping也。

手信店割引券無呃人，唔使話買夠幾錢先減500yen，買500yen都用得。
店入面賣既款式都好多，有嘢食，有擺設，同出面啲土產店無異，
小小買咗一包比內地雞薯片(370円)，一條粟米(210円)，共580yen，
用張500yen割引券，埋單只係俾80yen。
即係包比內地雞薯片同大半條粟米都係送既！！
嘩，呢刻有無感受到姑寒小小幾咁興奮，幾咁開心呀！！

大浴場掂，溫泉掂，手信割引券無呃人，咁餐晚飯係咪得兩條咸菜，食唔飽架？

每人有一份魚生片，壽司兩件，醃菜兩碟，そばsoba一碗，唔知鴨肉定雞肉拌兩條菜，
仲有一個兩塊大豬肉既火鍋，白飯任裝。
最好味係個豬肉鍋，豬肉片大蔥黃芽白芋絲索哂啲汁，好好味，財政大臣用汁都撈咗兩碗飯。
晚餐唔止兩條咸菜，喫得飽架！！

喫飽，返房抖陣，又去浸多轉溫泉先訓！！
房入面個浴室都完全無用過！！

[是日消費]
駅弁：  2,400YEN
飲料：    500YEN
巴士:  1,500YEN
手信:      80YEN
住宿:10,399YEN
－－－－－－－－－－
總共：15,079YEN

註：
- 平嘢唔一定無好，呢間ホテル十和田荘都住得過
- 距離巴士站唔遠，無車接送自已行都只係幾分鐘