東北 紅葉 健行 (Day 2 - 奧入瀨 - 上)

25 Oct 2011 - 29 Oct 2011 東北．紅葉．健行 (DAY 2 - 奥入瀨)

---

[Day 2] 26 OCT 2011 (八戸 > 奥入瀨 (上) > 十和田湖)

今日行程重點，就係行奧入瀨渓流。
聞說紅葉季節，好多外國遊客定本地人都會去奥入瀬渓流睇紅葉，師奶小小驚死上唔到車，上到車又怕無位坐，要企幾個鐘，尋晚已經响八戸駅買定巴士券，聽聞人哋話俾錢買咗巴士券果啲優先嘛，跟住先到全國pass同埋無買定巴士券，上車抽券果啲嘛。

聽聞青森同八戸都可以坐JR bus去喎，青森往奥入瀨車程風景仲靚啲添，咁做咩鬼唔由青森入？由八戸既？
師奶小小驚青森多人上唔到車嘛，仲有就係青森去到燒山07:50 - 09:48，八戸去燒山就08:45 - 10:13，由八戸入可以遲一個鐘起身喎，小小同財政大臣一致決定，訓晏一個鐘得一個鐘，八戸入！！！

雖則話可以訓晏啲，其實06:30都已經要起身，07:00喫早餐，07:30去買今日既野餐駅弁，08:00準時去巴士站排隊。你話吖，若果由青森入，咁咪要05:30起身吖，好辛苦姐．．．

[早餐]：コンフォートホテル八戸

呢間酒店既早餐，由06:30 - 09:30，青森蘋果，味道仲唔錯添。
今日要行好多路，要喫飽啲，拿拿聲劈多幾件鮭魚飯糰，幾件蘋果。

07:30準時喫哂早餐，入去八戸駅個改札口入面買駅弁(2400円)，要嚟今日行山野餐時喫。
有JR PASS响手，入閘淨係買兩個飯盒呢啲咁串既嘢，真係師奶如小小先做得出。
無JR PASS 又想買飯盒？得，响閘外買咪得囉！呵呵呵．．．無咁多款之嘛．．．

08:00 買完駅弁，即刻去巴士站排隊喇，買咗巴士券唔係大哂架，人多唔排隊都係上唔到車架！去到巴士站，一個人都無，仲大大風吹到髻都甩咁滯！
尋日東京廿幾度，八戸朝早得7-8度，溫差真係大，好在帶咗件羽絨背心嚟著先頂得順！

等到差不多08:30，先開始見到有其他人排隊，吹風吹足45分鐘，卒之夠鐘上車開車．．．
巴士往十和田市方向行駛，途中經過十和田市現代美術館，快手可以偷雞影到草間彌生個dot柄大南瓜，跟住會响奥入瀬ろまんパーク站停一停，去廁所，買土產，補給．．．

其實，由八戸去奥入瀨呢段市區風景都唔錯吖，十和田市既市區風景都幾靚，馬路兩邊都有紅葉，行人路好明顯精心設計過，感覺好悠閒。

(08:45-10:15)去到燒山，小小同財政大臣平日都有行山，雄心壯志咁決定由燒山開波，14.2k之嘛，難唔到呢兩條茂李。

嘩！不得了，燒山落車位已經咁靚，忍唔住手响停車場已經起勢按快門。
見時間尚早，入去湧水館望吓，畫展又望吓，土產館又望吓，仲要買嘢添，買咗枝奥入瀨限定啤酒(400円)同奥入瀨咖啡(100円)！
山都未開始行就買嘢，真係整鬼自己，要由頭托到尾！
卒之11:00先正式開波！！今日天陰陰，間中兩滴雨，得閒仲有幾陣大風，凍到手指都僵硬！

好在，响漫天紅葉既溪澗邊行山，風景咁靚，幾凍都挨得抵喇！

响奥入瀨呢樹行山真係好鬼忙，又要抬頭望啲又紅又橙又黃既樹葉！又要低頭望溪流，仲要望實條爛屎路！！
條路唔係真有屎，只係由好多由腐葉，雨水，爛泥形成既爛屎路，小小無打錯字，係腐葉唔係枯葉，枯葉係乾既，腐葉係濕既，雖然枯葉都有好多。

對鞋冼腳唔防水都盡量唔好踩落去囉，啲爛泥唔係想像中咁淺，一踩就陷落去，又有水又有腐葉仲有泥，感覺真係好似踩緊一陀又一陀既大牛屎，唔係得一陀，係成條路都有，有時爛泥到唔敢行，行出馬路仲好啲！！

小小為咗呢個trip買咗對踢不爛，因為香港行山用既只係普通波鞋，唔防水間中仲跣腳；
踢不爛真係唔錯, 唔跣腳, 防水, 踩到成個腳底都係爛泥，連腳面都有，踩入溪水一陣就沖走哂！

沿途風景真係好靚，踩到成腳爛泥都抵！！！
有好多小小好鍾意既青苔物體，一條條，又似芽菜，又似毛毛，又似蟲仔！！

燒山開始，沿途風景都好靚，好多紅葉，無咩人，唔知係咪個個都响石ヶ戸落車開始行，所以呢段路見到既人不出5個，一隻手數得哂，一直影相都無人爭位，排隊，小小同財政大臣點影都得，影影吓相，突然有一部車，兩部車，三四五六架私家車停响樹，越來越多人走出嚟影相，整咩鬼咁多人既？
而家先發現，原來呢樹係三乱の流れ，小小同財政大臣最鍾意捐窿捐隙影相，啱啱果個位睇唔到個牌，無為意已經行到去三乱の流れ，唔怪得無拿拿咁多人．．．

[暫時是日消費]
駅弁：2,400YEN
飲料：  500YEN
－－－－－－－－－－
總共：2,900YEN

註：
- 全國JR PASS可免費乘坐JR BUS，JR EAST PASS不可免費乘坐JR BUSS
- 東北巴士車票可於以下JR駅既みどりの窓口購買：八戸，青森，新青森

- 八戸 > 十和田湖 巴士券，一天內有效
- 例:由十和田湖温泉郷開始，可以中途落車，再上下一班車往十和田湖
- 十和田湖 > 八戸 巴士券，一天內有效
- 例:由十和田湖開始，可以中途落車，再上下一班車往八戸，但十和田湖温泉郷後落車，巴士券則失效

- 青森 > 十和田湖 巴士券，兩天內有效
- 例1:由萱野茶屋開始，可以中途落車，再上下一班車往十和田湖
- 例2:由青森出發，去到酸ヶ湯温泉落車，住一晚，第二日，可用同一巴士券再坐巴士往十和田湖
- 十和田湖 > 青森 巴士券，兩天內有效
- 例1:由十和田湖開始，可以中途落車，再上下一班車往青森，但萱野茶屋後落車，巴士券則失效
- 例2:由十和田湖出發，去到酸ヶ湯温泉落車，住一晚，第二日，可用同一巴士券再坐巴士往青森

- 詳情可參考JRバス東北