[行程資料]
去程 : 15:30
回程 : 17:30
船票 : HKD160 (連燃油付加費)
時差 : 沒有
酒店：珠海豪庭商務酒店
交通 : 巴士，的士，租車
[Day 1] 01 Dec 2007 (尖沙咀 > 珠海 > 橫琴 > 珠海)
15:30 又因為龍爸既關係，又買到特價船飛所以一行八人去珠海玩。
17:00 今次上船無打沙羅曼蛇，鍾眼訓鍾左半個鐘，又無暈船浪，LUCKY。
今次又多得龍爸，幫我地BOOK車，團友們話司機先生係上次果個，但我全無印象，可能係佢唔夠靚仔。
今次本來BOOK左北京酒店，但去到北京酒店門口，個個嚇到呆哂，個外表又殘又舊，個LOBBY陰陰暗暗咁，二話不說，八人跳番哂上車，即刻飛車返去珠海豪庭商務酒店。好在今次兩手準備，呢邊BOOK北京酒店，另一邊BOOK珠海豪庭，否則訓街都似。
話說上次無緣入住圓床房，今次有機會喇，因為所有雙床房爆滿，得番圓床豪華房同高級商務套房。
一上去當然睇下圓床有幾巴閉。
圓床只係一張圓形既床，無咩特別，唔特別舒唔特別彈，唯一特別係．．．張床特別硬。但個廁所相對嚟講就西利囉，上半透明玻璃，下半磨沙玻璃，攪到去廁所辦公時無哂安全感。
[晚餐]：橫琴蠔情宴 (RMB7XX)
18:00 一行八人，又試去橫琴喫蠔。食左炸蠔，炭燒蠔，粉絲蒸扇貝，生蠔打邊爐，海蝦，脆肉鯇，墨魚，雜菜，鍋貼，花生薄餅，炒左啲小菜翠肉瓜炒豬頸肉，蒜香骨，XO 醬爆嚮螺，客家豆腐，西蘭花炒墨魚仔．．．飽到上心口！！
食飽飽去買宵夜再返酒店，跟住當然係麻雀耍樂喇。
依然RMB25蚊個鐘，免費茶水，自動洗麻雀枱，一樣打左四個鐘。
今次邪到痺，頭號黑仔既小小，食十三么喇，清一式喇，仲要贏錢。
[Day 2] 02 Dec 2007 (珠海 > 澳門 > 珠海)
10:00 集合，退房，坐的士去拱北，過關去澳門。等左好耐過左澳門關閘，坐34號巴士去氹仔。34號巴士印象中好似加左價，係咪因為加左站去威尼斯人既關係呢？
[早餐 + 午餐]：誠昌 - 水蟹粥 (HKD7XX)
今次目的係喫水蟹粥，所以邊度都無去，第一站就嚟攞位，企門口等開門叫名入坐。等左二十分鐘，一群蝗蟲一聽到叫名就衝入去。
一坐低就叫左水蟹粥，椒鹽田雞，椒鹽鮮魷，墨魚波，鯪魚波，蒸大鱔，鮑貝炒西蘭花，伊麵。一陣狂風，成枱清哂，需時唔使半個鐘。
食飽去鉅記掃一輪手信。今次既領隊依然有九折卡，瘋狂既團友掃貨掃得同上次一樣瘋狂。
掃完手信，一群蝗蟲浩浩蕩蕩望住威尼斯人個頂行過去。行左十零分鐘就到。
劉姥姥入大觀園，一班蝗蟲向運河前面影低能造相。行到咁上吓，當然要去賭場個吉，黑仔小小次次都俾人查牌。
混完吉就坐免費車去關閘，開下停下成個鐘先到。今次過關仲耐過朝早，排左好耐，又熱又焗，同志們又嘈又迫又打尖，極度辛苦。
過完關就跳上的士去九州港，唔使十分鐘就落車，盛惠十六蚊人仔。
17:30 上船返歸，一上船又訓，又無暈船浪喎，LUCKY。
[晚餐]：蘋果餐廳 (HKD5X一位)
18:30 落船又見肚餓，一班蝗蟲又去開餐。
食飽散水，是次旅程完畢。
