[Day 5] 29 OCT 2011 (上野 > 秋葉原 > 香港
財政大臣尋晚未返酒店已經想喫嘢多餐，一路行一路睇附近有咩好喫，
睇到番到酒店都揀唔落手，返到酒店依依哦哦一輪，頂唔順淥咗個杯麵食，
喫喫吓杯麵小小先同財政大臣講，不如去一蘭吖？人哋話開24小時！ 財政大臣：早講吖，淥咗杯麵先講！咁聽朝去喫當早餐！
唔係講笑，去咁多次日本，係無去過喫一蘭拉麵，唔知响邊，唔知開24小時。
感謝小小突然記得上網見過有人講一蘭，感謝酒店有wifi，感謝財政大臣個電話有得用wifi上網，
搵到上野駅有間一蘭。就係咁，明明無plan過早餐喫拉麵，都可以搵到拉麵做早餐。
一早起身去上野駅山下口搵一蘭。
驚死好多人，早啲起身預埋排隊時間，點知去到無咩幾個人，唔使排隊直入。
又係入門口買飛仔！兩個拉麵 790円x2，一個加肉150円，一個加半熟卵100円。
有四人枱，可以同財政大臣一齊坐，唔使做自閉仔。
坐低姐姐就俾張紙仔過我哋，揀拉麵既軟硬，多蔥少蔥，青蔥定白蔥，多油少油，秘製醬料．．．
揀完俾番姐姐，等一陣有得喫。
半熟卵另上，要自己搣殼，搣完掉入拉麵，浸熱好味啲。
唔食得辣既小小，貪心之下咩都要，要蔥要油要秘製醬料要呢要路；
嘩！篤秘製醬料，辣到小小口水鼻涕一齊流，早知就唔要喇．．．．若果無果篤嘢，小小一定可以飲哂啲湯！！
下次，下次唔會貪心要果篤嘢！！哼！
食飽都未夠9:00，但無理由响樹磨爛席，照坐JR去秋葉原喇！
九點幾去到秋葉原，除咗七仔，咩舖頭未開．．．．
好在今日係星期六，平日開11:00，星期六多數開10:00，
唯有window shopping吓，影吓model等夠鐘。
巡咗兩個圈，影埋萬世橋，都仲未夠鐘，去七仔打個轉等開門喇！
唔知係咪多人去秋葉原間七仔攪攪震，無幫襯，
不嬲打開哂任人睇既漫畫雜誌，呢樹竟然綁實哂！！
返去御徒町果邊搵食。
[午餐]：若狭家 上野店
舊年喫咗橋底間まぐろ市場，今年試新嘢。
其實都唔係咩新嘢，開咗好耐，仲要老年前已經想試，不過一直無試。
門口望落無咩人，入面差不多九成滿座。
(上) All Star 1750円
(下) 三色市場丼 1260円
睇menu好似好大碗，影相望落都唔細，其實．．．．．真係唔大碗囉。
即係呢，唔係小小大食，正常食量都應該覺得偏細碗囉．．．．．
味道普普通通喇，唔係難食既，
係啲魚籽唔夠大粒唔夠飽滿咬落有少少漏氣感覺，
海膽唔似北海道同八戸果啲咁既味道，吞拿魚茸又唔係小小杯茶咁囉．．．
覺得まぐろ市場好味啲同埋大碗啲抵食啲，
下次都係返去喫まぐろ市場。
食完出門口，嘩，已經有人龍，好在早啲到，唔使排。
喫完嘢，當然到日既主菜，shopping喇！！
去吉池行多轉，尋晚睇中咗啲包甜提子，今日睇吓有無，有既話就買兩包番香港喫。
點知．．．．今日無呀！！得啲橙呀，柿呀．．．．算數！
無提子，睇中咗啲魚沼米，好想買，
但諗起舊年啲秋田米，帶到番香港，硬係煮唔出响日本喫既味道，
聞說要用埋日本既水先煮到相似味道．．．．
咁買一包2kg魚沼米，要買幾多枝日本水先得？買唔係問題，帶番去先係問題，行李超重好貴架！！
基於咁複雜既算術，難到唔用腦小小，唔想再煩惱之下，放棄咗魚沼米，日本水．．．
走，去二木果子買零食(3301円)。
買哂零食，計啱時間返酒店攞埋行李，撤離上野，向成田機場T2進發。
次次都坐delta响T1，仲要坐京成本線，今次坐JAL响T2，坐JR特急成田。
落車時，見到有個日本大嬸同JR大叔响出閘口果樹理論，日本大嬸拎住張150円既飛，
想响成田空港出閘！！咩國藉既大嬸無賴起嚟都係一樣無賴樣。
第一次T2落車，轉呀轉，上呀上，轉到頭都暈先去到離境果層。
check-in完，開始行街shopping搵嘢食．．．．．
[晚餐１]：和幸株式会社
行咗個圈，睇中咗和幸個滑蛋豬扒飯，就入去喫喇！！
滑蛋豬套餐 1650円：一上枱，香到飛起，蛋香加埋炸豬既味道，仲有滑蛋豬甜甜既既醬汁，加埋啲冬菇，撈飯最正
吉列廣島蠔2隻 500円：據財政大臣講，幾好味吖
(係架喇，小小讀書少墨水少詞窮來來去去只係識好味同唔好味呢幾隻字)
食飽繼續四圍行。
話說低能小小，成日覺得成田機場T1好大，分開兩邊翼，
仲大大聲同財政大臣講(好在响屋企講)：有麥當奴果邊翼咪就係T2囉！！
去到check-in呢個moment，都仲以為T2咪就係T1少啲嘢睇有麥當奴果邊翼．．．．
唔好笑咁大聲．．．唔該．．．
E～～E～～多咗好多新嘢喎(仲以為係T2係T1其中一隻翼．．．
有UNIQLO，有水著泳衣賣，有呢有路．．．
經過麥當奴，財政大臣問：你唔係要買玉桂包咩？
小小仲好串咀咁：過咗海關都有喇，咁快買咪凍哂
過海關後，小小呢刻先發現T1係T1，T2係T2，唔通架，T2過海關後係無麥當奴架，
無得喫玉桂包喇．．．．又要等下次日本先有得喫喇．．．
唉，無得喫玉桂包，唯有化食量為shopping力量，响T2努力出血。
由到步第一日到離開呢刻，小小成日都話要買東京最新手信，東京ばな奈 BANANA蕉，
可惜買到呢刻都仲未買到，望住盒12條裝，就話要買8條裝，
望到8條裝，又話要買4條裝，總之就借口多多唔買。
臨去到上機果個閘口，卒之見到有間手信店有BANANA蕉4條裝，
仲要有原味同焦糖味，仲邊有借口，即刻俾錢喇！！
仲要見到想試既北海道手信，北海道限定薯條！！
呢頭俾完錢買BANANA蕉，果頭又走番轉頭買薯條，
店員差啲以為呢兩條茂利傻傻哋！
財散人安樂，安心上機。
[晚餐2]：飛機餐
通常回程既飛機場，小小都無咩心機影，但今次唔同，
因為有酒鬼小小最鍾意既梅酒喇，朝日啤喇，仲有麒麟啤，
飲哂三款酒，配埋咖喱海鮮飯，再加上哈根兜雪糕，食飽飲醉睇住反斗奇兵回程．．．．
是次東北．紅葉．健行，完滿結束。
[是日消費]
一蘭：1830YEN
若狹家：3010YEN
二木之果子：2801YEN
街舖手信：500YEN
和幸：3830YEN
AKIHABARA 手信：2000YEN
BLUE SKY 手信：2400YEN
BLUE SKY 手信
－－－－－－－－－－
總共：17715YEN
註：
- BANANA蕉响成田機場T2有4條裝，原價連稅470円，機場免稅448円，8條裝12條裝機場四圍都有，免稅變相平咗，想買可以留番响機場買
沒有留言 :
發佈留言