啋呀！梅酒

舊年戚起條根要飲水果酒，青梅過咗造，要改浸橙酒；
浸緊橙酒時等唔切，結果要買貴貴梅酒飲。

梅酒飲哂，橙酒剛剛浸好，滿心歡喜開封，一飲之下．．．．．
嘩！正如師奶所講，好以飲酒精咁，雖有橙香，但米酒味依然強烈，
飲開低酒精度既小小頂唔順，唯有放棄。

等咗大半年，清明快到，青梅當造期又嚟喇！！
拿拿聲向櫃底拎番枝白酒出嚟，再拿拿聲落街市買青梅。
洗乾淨青梅，抺乾，去蒂，開枝白酒，放哂啲梅入去，攪掂！！！！！

人人用米酒，點解小小用白酒？
因為．．．．．上次米酒浸橙既米酒味太強烈列喇，
仲有．．．．．呢個白酒樽樽口夠哂大，一開即放入梅，
啱哂小小呢啲懶鬼，連消毒玻璃樽都慳番

啋呀梅酒，快啲浸好，咁小小就唔使再買CHOYA梅酒喇！

燒味單拼之叉燒．．．

無錯，呢舊好似係普通不過既叉燒，但係好似普通得嚟又有啲唔普通喎！！

登登燈櫈！！！
小小學識整叉燒喇！！！
無錯！！！呢舊係小小整既”假”叉燒！！！！
最鍾意叉燒既叉燒學識整叉燒．．．．．．

點解係”假”叉燒？呢舊又唔算得上係真正既叉燒，正統叉燒係燒出嚟架嘛，
但呢舊叉燒係燜出嚟，咁仲算唔算係叉燒？個樣似叉燒就當佢係喇！

材料：
1. 梅頭豬肉
2. 豉油，糖，水

做法：
1. 平底鑊開中火
2. 兩個飯碗水煲滾
3. 落豬肉，豉油，糖
4. 再滾起收細火，燜到收汁，禮成跟據小菲菲俠大人既原著，呢舊假叉燒叫甜肉，但唔知點解小小抄考完幾個類似既食譜，整出嚟變到成舊叉燒咁款．．．．

是但喇，真豬肉，無色素，無味精，唔係黑心豬，唔係病死豬，假叉燒就假叉燒喇，唔使再向街買啲叉燒平過豬肉，想喫又要驚既”真”叉燒囉．．．

膽固醇配法包！！

作反囉作反囉！唔高膽固醇唔喫！！

上次買存倉凍肉，財政大臣要求入鵝肝，
呢啲又貴又唔健康又殘忍又唔識煮，小小唔多願入，
但見財政大臣咁恨喫，就試下整喇。

材料：
1. 鵝肝
2. 法包 / 硬豬仔
樓下法包賣哂，買個硬豬仔，切頭切尾整蒜蓉包，中間切開兩塊扮法包
做法：
1. 鵝肝煎前半個鐘先拎出嚟解凍
2. 鵝肝兩面撒少少鹽，胡椒，再上一層薄薄既麵粉
3. 開中火，平底鑊落好少好少油
4. 鑊唔太熱時鵝肝就好落鑊
5. 煎大約分零鐘，煎好一面先翻另一面，否則翻嚟翻去會整爛件肝
6. 一路煎一路用鑊鏟按下件肝，感覺到外脆內軟就ok
7. 煎夠就好拿拿聲上碟，否則件肝煎到出哂油就浪費咗件貴嘢

偷工減料生菜包

返工放工，上堂落堂，除咗溫書同上網打機，小小呢輪間中都仲有煮吓飯，
免得被財政大人投訴。

為咗慳番啲時間嚟溫書 (打機就真)，當然就唔整果啲整色整水既大餐喇！！
求求其其煲個湯，淥條菜，整個十零分鐘攪掂既肉，咁又一餐。

偷工減料生菜包
材料：
1. 唐生菜
2. 豬絞肉
3. 乾蔥，蒜頭切碎備用
4. 一隻小辣椒切粒備用

醃料：豉油，糖，鹽，豆粉，麻油，燒酒，鍾意可以落埋魚露又得，無魚露唔落又得

做法：
1. 倒哂啲醃料落豬肉碎，得閒就醃個零鐘，唔得閒就十五分鐘
2. 中火落丁丁油，爆香乾蔥蒜頭，豬絞肉多肥膏就落少啲油，否則炒完油淋淋，睇見都唔開胃
3. 落豬肉碎炒到熟，一路炒要一路整散啲豬肉粒粒
4. 唔夠咸落魚露 / 鹽，唔夠色落豉油
5. 炒到豬肉熟哂乾身就就落埋辣椒，兜多陣可以起鑊

配埋啲cheap cheap唐生菜上枱，一碟生菜包就攪掂。
$5一大份唐生菜有4棵，呢度只係用咗大半棵，$10有份水展豬絞肉，有肥膏既豬絞肉仲平，成本只係$12-3，
都唔明點解出面一份咁既生菜包，賣到幾十蚊咁貴。