馬哥孛羅咖啡廳

一見到啲生蠔呀，凍蟹呀，凍蝦呀，唔使問阿貴都知．．．．
小小又去喫自助餐喇！！

今次去馬哥孛羅咖啡廳喫！17:30開始，當然又係17:15就去到喇！！

因為無人既關係 (除咗我地一行十一人既蝗蟲軍團)，
唔使同人爭食 (但要同蝗蟲爭

)，拎嘢食之前，影吓相先！

凍海鮮：有生蠔，凍蟹，凍蝦，青口
燒味：有乳豬

！！！燒鵝，叉燒，雞，燒肉
沙律：撈定既豆豆沙律，雜菜沙律，螺絲粉沙律．．．有羅馬生菜呀，火箭菜呀，鬼佬菜既即撈沙律

有即煮粉，麵，飯，鐵板海鮮，鐵板豬牛羊

當然仲有甜品區喇：雪糕，蛋糕，曲奇，生果．．．

影哂相交功課，當然要開餐喇！
先嚟怒劈乳豬，好味，係肥咗少少姐，咩咩沙樂美腸，普普通通

即場鐵板燒海鮮：龍蝦，正，encore再encore，喫到師傅無停手
(十一隻蝗蟲車輪叫，想停手都難

)
鐵板牛呀羊呀魚呀，相比就普通咗啲，都係繼續叫海鮮，主打龍蝦
除咗鐵板，仲有蒸聖子呀，貝類呀，蕃薯呀，都ok好味

反兜諗住再喫乳豬，點知就係得掛向樹果一隻，咗兩轉就俾班蝗蟲喫哂．．．．

開始亂喫，生蠔，刺身，甜品，沙律菜，雪糕，曲奇，海鮮，燒味
擔擔麵一碗幾人喫，個麵竟然幾好味喎，
黃鱔煲仔飯麻麻地
大部份食物都OK，只係甜品比較普通

講咁耐，咁多嘢喫要幾錢？
$218唔包飲品，$258包任飲 (紅酒白酒都包)，再加15巴仙服務費
十人買餐卷只需$2500，仲包任飲同服務費，當然買餐卷抵喇！！

晚餐都只係$250？！馬哥孛羅喎？！
係呀，係馬哥孛羅，但係係深圳既馬哥孛羅，$250係人仔，
兌返港紙，都係HKD300，五星酒店自助餐，無人爭食，抵！

马哥孛罗咖啡厅
地址 : 福田福華一路马哥孛罗酒店

IKEA 晚餐

去IKEA敗家，點可以唔去埋IKEA間餐廳開飯？！話哂係沙田區既人氣店喎。

燒牛肉 (HKD39)：唔老唔韌，OK喎，以HKD39既價錢，抵過哂兼好味過哂所有快餐店既扒餐，仲有薯仔蛋同幾條菜仔伴碟，簡直係超值
呢碟燒牛肉放向果啲要加一既西餐廳賣，絕對可以標價HKD88 - 108

肉醬花瓣麵 (HKD15)：咁既價錢無諗過有咩水準可言，但食落口，味道比好多賣成三十幾蚊碟既肉醬意粉好味好多，抵食！

意式茄醬藍青口 (HKD19)：無數到幾多隻，雖然比較細隻，但肉質同味道唔錯呀，
個意式茄醬汁有蕃茄肉，食哂藍青口仲可以用啲汁撈埋頭先個花瓣麵

呢餐只係HKD73，非常抵食

西貢海鮮

新一年既第一餐晚餐，當然要喫好嘢喇！！
(總係搵到借口俾自己喫嘢

，2010最後晚餐，2011第一餐晚餐．．．)

去完西貢行山，次次見人响艇仔買海鮮買得咁鬼開心，
今均輪到自己買好嘢返歸喇，YEAH～～

HKD150份花蝦 (呢份有5隻)：
份蝦咁貴有幾大隻？唔．．．．．呢隻蒸蝦用既碟，直徑有10吋，咁你估吓隻蝦有幾大？
由西貢返到屋企個半鐘，仲未肯C，你話呢幾隻嘢幾咁生猛
肉爽味甜，除開HKD30隻新鮮生猛大海蝦，唔算貴囉

HKD每隻10，元貝，貴妃蚌：呢幾隻嘢就普普通通喇，都鮮甜既，但下次唔使托咁遠囉

兩碟嘢夾埋HKD190，新一年既晚餐，夠哂滿足

Paisano's

上次去西貢游完水，已經想嚟呢樹開餐，
但去到門口時，見到間舖又細，門口又一堆人，
天口又熱又要坐門口，最終當然無食喇．．．．

今日行完山坐番巴士出西貢只係四點鬆，
最重要係門口張枱就喫完，當然企向樹等位喇！！！

十條戊利坐向門口等喫下午茶，叫咗一客廿四吋批薩，
無錯，你無睇錯我無打錯，真係廿四吋

order完即焗，等半個鐘，等喫批薩既時候，
再望吓有咩小食，結果無嘢啱食，
但十個人喫一個廿四吋批薩邊夠？再order多一個廿四吋批薩！！

即係前後兩個廿四吋批薩！！！！

一上枱．．．嘩！嘩嘩！！嘩嘩嘩！！！
好大呀．．．．．除咗十條戊利，啲路人行過都話：嘩！好大呀！

就向一次又一次既驚訝聲中：好大呀．．．
十條荗利一齊出動，一陣風咁chur哂成隻批薩

好在前後order咗兩隻批薩，等咗一陣，第二隻批薩都焗起
當然又係一陣風咁，又chur隻批薩

雖然要等30分鐘，但即叫即焗熱辣辣，
行完山又特別肚餓，十條戊利一齊喫，覺得特別好味。

HKD220一個，兩個HKD440，唔使加一，除番開都只係HKD44蚊，抵呀。


Paisano's
地址 :    西貢親民街27號地下
電話 : 2791 4445

行山 - 大浪灣赤徑 (2011/01/01)

相隔四年幾，又番兜行大浪灣赤徑。
上次二人行，今次十人行

西灣亭 > 吹風坳 > 西灣 > 鹹田灣 > 大灣 > 大浪坳 > 赤徑 > 北潭坳 (12K，約4小時)

元旦日既彌敦道俾大陸同胞攻陷，元旦日既西貢則被港人攻陷，
成個西貢人頭湧湧．．．．

行咁多次山都未見過咁多人排隊等車去西灣亭．．．
由西貢麥當當坐青的去西灣亭，約HKD85，咁齊人當然唔等29R，拿拿聲跳上青的。

西灣亭落車，放低幾兩先開波都等咗好耐，個流動廁所好日都唔會咁旺場，
成條人龍等交水費．．．．

好，開波！！元旦日特別多人行山，仲要係．．．
今日既行山人以為自己行緊彌敦道，條咁窄既山路都要兩三人一字排開咁行，
後面腳程快既人則行吓停吓排埋隊等前面讓路．．．．
行山無人介意各遊人行得慢，但介意一字排開阻住後面腳程快既人，
仲要明知後面有人都唔讓路，唔明點解啲人咁鬼自私既？！

塞吓停吓，終於落到西灣。
西灣亭落斜，財政大臣話菠蘿蓋位痛，睇嚟都係時候要買定啲七海健Ｘ．．．

不嬲無咩人既西灣，今日非常熱鬧，連幫私人男模特兒影張大頭相，
都要排隊就位避人。

今日既行山人士，好明顯好大部份都無做資料搜集。
一見到有士多，就停哂向樹喫早餐，補給，喫豆腐花；

點解小小咁大膽話人唔做資料搜集？
因為呢樹連續有幾間士多，
好多人迫哂向第一間士多，第一間既豆腐花HKD6，排哂長龍等食，
轉個彎第二間，豆腐花HKD5大把吉位，
轉多兩個彎第三四間，豆腐花HKD3無人問津，
向第一間喫完豆腐花既行山友，行到呢個位見到HKD3後，個個呻笨。

又係塞人行吓停吓，又到鹹田灣。

鹹田灣指定影相位，條木橋多人到飛起，每隔幾分鐘就成條人龍排隊，
咁鬼多人，都無心機幫男模特兒影大頭相。

快放一輪，終於同其他人拉遠丁丁距離，無咁塞人。
唔覺唔覺又衝到赤徑，上埋最後一個上斜，元旦日行山向四個鐘內完成。