東北 紅葉 健行 (Day 3 - 奧入瀨 - 下)

25 Oct 2011 - 29 Oct 2011 東北．紅葉．健行 (DAY 3 - 奥入瀨)

---

[Day 3] 27 OCT 2011 (十和田湖 > 奥入瀨 > 蔦沼 > 青森 > 八戸) 

09:15先坐完船去到子ノ口，即係行奧入瀨既時間又少咗，要行快兩步追番啲時間。尋日逆走，由燒山往子ノ口方向，

今日順走，由子ノ口往燒山方向，試哂兩樣走法，睇吓唔同走法既奧入瀨有咩唔同。

跟據資料顯示，由子ノ口去銚子大滝大約1.6k，約30分鐘。齋行1.6k，30分鐘當然無問題，但係中間仲有万両の流れ，五両の滝呢！
見到小小咁講，唔使問阿貴都知道，30分鐘當然又係去唔到銚子大滝喇！

淨係子ノ口個水閘，都影咗5分鐘！

再嚟見到呢類景，又搵靚位，又set腳架，又試快門，
15分鐘又係走唔甩。何況今日好太陽，影啲相都靚啲，當然更好心機試多幾個光圈快門。

尋日行到去雲井の流れ，今日由子ノ口再行返去雲井の流れ，咁全長14.2k既奧入瀨就可以行哂。

去到銚子大滝，嘩，好似去咗旺角咁呀，又有幾架旅遊巴，好多架私家車泊哂响路肩。
呢啲景點响正馬路隔離，真係特別多人，頭先五両の滝响山坡仔上面，又要踩爛屎地又要上斜，真係得小小同財政大臣啲閒人先走去影。

影完銚子大滝都已經10:00。如果要趕响11:35去到蔦溫泉，咁就要趕到10:53向雲井の流れ開既巴士。
但由銚子大滝去雲井の流れ，需要85分鐘，睇嚟要放棄部份景點，
同財政大臣商議好，成條奥入瀨來來去去都係呢類樣架喇，
中間果幾條姉妹，双白髮，不老，玉簾の滝就算吧喇，
行埋九段の滝同寒沢の流れ就番去銚子大滝坐巴士。

結果全長14.2大既奥入瀨，兩條茂利最終係因為控制唔到影相時間而行唔哂，大約放棄咗約2k既路段。
好在坐巴士既時候，可以車遊姉妹の滝，双白髮の滝，玉簾の滝，行唔哂都算睇哂咁囉。

[暫時是日消費]
巴士:6,000YEN
船:   2,600YEN
－－－－－－－－－－
總共：8,600YEN

註：
- 想走完看完全條奧入瀨，最好分開兩日，第一天由燒山出發逆走，第二天由子ノ口出發順走

- 5-6個鐘要走完全條14.2k奧入瀨加影相，應該是不可能，除非不作任何停留及影相