[Day 3] 23 Apr 2026（立山黑部 > 冰見 > 能登九十九湾 百楽荘）
【能登九十九湾 百楽荘】
位置山旮旯，樂天同Google評分都極高。
搶到coupon加上特價，包早晚餐40,149円，免費泊車。
無諗過最普通既［一般客室］都咁大，【和室１０畳+広緣+露台】，仲有能登九十九灣景。
露台望出去既能登九十九灣風景。
房入面既沖涼，少有唔係一體式，好高級咁用磚砌出嚟；除咗洗手液，仲提供護膚品，果然係高級日式旅館。
勁大方，雪櫃啤酒汽水全部免費，最有誠意係雪櫃有冰杯。未夠鐘食飯，飲住啤酒嘆下景先。
通常高級旅館都有貸切風呂，但收費唔平下下四五千円一小時。但呢度有２間免費既貸切風呂，【漁火】，【夕凪】，只要無人就可以用。
可能唔夠早checkin，旅館安排晚餐食19：45，今日唔算餓無所謂。
無加錢要咗最平個晚餐，預咗普通會席料理，無期望就無失望。首先上清酒，同前菜既能登蠔幾夾。
主菜上枱。
一上枱睇到嘩嘩聲，擺盤勁靚，職員介紹話擺盤用春天做主題。
宇出津港章魚，富山灣螢火魷，宇出津港竹筴魚，輪島港鯛魚子，全部都係當地食材。
全部都係今日喺能登捕獲既魚。全部都係今日喺能登捕獲既魚。
能登雞泡魚，即場炭火燒。用芝麻油醃，勁香又有口感，同好耐之前食過既養殖雞泡唔同味，同唐戶市場食既炸雞泡又唔同味。
能登牛，能登櫻鯛
能登米
成餐食咗２個鐘嘩嘩聲未停過，食到甜品都仲係能登產既能登牛奶雪糕。離開餐廳仲怕你唔夠飽，有能登米做既飯糰俾你做宵夜。
酒店有個私家碼頭可以釣魚，可惜我無耐性唔鍾意釣魚。唔釣魚可以玩飛標、桌球、乒乓球。
唔釣魚唔玩飛標，仲有個酒店私家樹林俾你行。
能登九十九湾 百楽荘既晚餐實在太震撼，對早餐有左期望。
當我以為只有當地野菜同２片刺身，想話燒魚都無條既時候，竟然送上左口同雞泡！早餐都咁多好味既魚，呢間旅館完完全全拉高哂我對高級旅館既Standard，住一次就返唔到轉頭。
以為份早餐食完既時候，竟然送上能登牛奶布甸，職員話先試原味，然後試加能登鹽，再之後加蜜糖，最後加哂全部。
呢個布甸超好味，連唔多鍾意甜嘢既老細都讚不絕口。
Check-out埋單只係40,149円，住宿、餐飲、服務全部無可挑剔，唯一既缺點就係，風呂係深層水唔係溫泉。
沒有留言 :
發佈留言