白骨溫泉 湯元齋藤旅館

 [Day 6] 26 Apr 2026（平湯溫泉 > 上高地 > 白骨溫泉）

【白骨温泉 湯元齋藤旅館】

地址：長野県松本市安曇白骨温泉4195

白骨温泉　湯元齋藤旅館，1738年創業的古老旅館，聞名已久，終於有機會住。

未出發已感覺良好，一訂房已收Email提示最議下午五點前到達比較安全；還未進入停車場範圍，職員已經走出嚟，指示我哋停車到門口位置，由佢哋拎行李落車及幫手泊車。

包早晚餐41,140円+150円x2入湯，免費泊車。

【和室１０畳+広緣】，広緣出面有條溪，成晚聽住流水聲勁好訓。

旅館雖然1738年創業，但維護非常良好，睇唔出咁耐歷史。

１００％掛け流しの湯，炭酸水素塩泉，泉源可飲可浸，有醫治腸胃病、神經系統功效。

雖然溫泉位置距離房間比較遠，但水溫同泉質非常舒服，行多幾步都心甘情願。

齋藤旅館對佢既泉水非常有信心，出埋自家溫泉水饅頭，味道仲唔錯，可惜無防腐劑食用期短，帶唔到返香港。

晚餐全部用信州時令食材。

話就話Simple Menu，但其實都好多碟，有信州餐前地酒，信州豆腐，信州三文魚刺身，信州牛肉鍋，先烤後用白骨溫泉水蒸既岩魚，當造竹筍做既竹之子饅頭。

成餐最估唔到係碗信州蕎麥麵，通常蕎麥麵無彈性，但呢碗有蕎麥香又有咬口。

早餐正常發揮，沙律菜，烤魚，最特別溫泉水豆腐同埋溫泉粥。