東北手信 - 比內地雞麵

呢盒自用手信，價值840円，四人前，平均210円一人前，兌番港紙十幾廿蚊咁滯。
雞乸咁大隻字：比內地雞，拎上手秤又錘手，斷估係好嘢，即買。

話說由東北返歸之後既某天，為咗盒比內地雞麵，
專登早一日炆定啲梅頭豬內粒粒，諗住配埋呢個貴價麵嚟喫！

滿心歡喜，搣開膠紙，打開個盒．．．
嘩！！四個拉麵！！再加四包比內地雞麵汁！！
四個拉麵值幾錢？！咁貴應該精華向哂個汁入麵喇。

開火煮麵，同普通鹼水拉麵一樣，滾到起哂泡，一陣鹼水味，
煮好麵過過水清清啲鹼水味，用滾水開咗包麵汁，加埋麵，上枱。
避免影響麵既味道，豬內粒粒同菜另上，
雪啖麵入口，唔．．．．．．毫無特別之處，
試多幾啖淨麵，淨汁，感覺一樣。

回水呀！！！！
山長水遠托番嚟，唔特別都算喇，
但小小直頭覺得，價值三蚊港紙既公仔麵都好食過佢！！！
回水呀！！！！