立山黑部（上）

[Day 2] 22 Apr 2026（立山黑部）

酒店早餐06:30開始，10分鐘食完立即Check out，揸5分鐘車去千寿ヶ原駐車場。

連續一星期觀察千寿ヶ原駐車場，大約幾點會滿，如果全部免費停車場都滿哂，可能要泊番架車去酒店。好在今日只係P１滿咗，P２同P３仲有位。

立山黑部四月開山，三月已經要到官方網站搶立山纜車票。開售當日唔夠三分鐘就賣哂頭幾日既纜車票。如果搶唔到網上預售票，就要當日排隊買現場票。

除咗搶唔到網上預售票既遊客，聽聞用JR Pass換飛既遊客，零晨4-5點就去富山JR站排隊嘗試買飛或換飛。如果行程無彈性，建議預先網上購買車票，因為即日排隊買／換現場票，有可能買／換唔到。

雖然網上買咗纜車票(16480円x2)，但乘車前一日或當日，要去呢部機實體換乘車券先可以坐車。

其實昨天去酒店前，曾經去立山駅嘗試換飛，可惜18:15嚟到，過咗售票處營業時間，連自動換票機都收埋咗換唔到，所以今朝又要預留時間換飛。

立山駅售票處前面有電視，顯示剩餘車票班次資料。

立山駅 <> 黑部湖 來回票，16,480円/人。

全部纜車巴士都要用呢張飛上面既QR code，要袋好。

上立山唔夠衫？唔使怕，呢２間朝早７點就開，可以補購。

等咗15分鐘，夠鐘排隊上纜車。立山黑部全程排隊有分【個人】同【團體】，睇清楚先好排。

去立山黑部，無論網上或現場買票，立山駅或扇沢出發，上山既第一程車係指定日期同時間，之後既交通則無指定時間，車票由出發起5日內有效。

呢架車程7分鐘既立山ケーブルカー 纜車，人多到好似繁忙時間迫地鐵咁。

坐完纜車轉高原巴士上山。

高原巴士去到呢個位會慢駛，俾你望吓條“称名滝”。如果想影相，建議選左邊座位。

坐咗50分鐘高原巴士，終於到達海拔2450m既室堂。

室堂有不同活動，但要留意官方網站既開放期間及時間，例如：

01 雪の大谷ウォーク（雪牆）：2026年4月15日-2026年6月25日 09:30-15:00

04 パノラマロード（全景雪道）：2026年4月15日-2026年5月6日 10:00-15:00

07 雪の回廊（雪之回廊）：2026年4月15日-2026年6月25日 

08:45已經到室堂，但最出名既雪之大谷09:30先開放參觀，唔好浪費時間，先去全日開放既雪之回廊。

天氣良好，太陽刺眼，必需戴太陽眼鏡同搽防曬乳液；氣溫鍾意影相建議戴手套；

建議著防水防滑鞋或雪爪，現場見唔少人跌倒。

立山黑部雪牆歷史最高紀錄喺2000年有20米高，今年只得12米🥹。

要影車+人同雪牆既對比，先感受到雪牆既高度。

室堂除咗睇雪牆，有足夠裝備既可以步行去距離15分鐘既みくりが池。

みくりが池

みくりが池附近有秘湯，可惜唔夠時間浸一浸，唯有影相到此一遊。

みくりが池附近係雷鳥出沒既地方，有時間可以留意有無雷鳥蹤影，今日有幸睇到影到。

睇完雪牆、雪之回廊、みくりが池，坐巴士去大觀峰 > 空中纜車去黑部平 > 登山纜車去黑部湖，程程交通都迫沙甸魚咁。

室堂人多到爆炸，無論立食堂食、睇手信買手信、洗手間，全部都人滿為患，通通排超長人龍。忍住肚餓，去黑部水壩睇下有無位置食午餐。

【黒部ダムレストハウス】

時間：10:00–15:00

約12:30去到黑部水壩，人唔算太多，2/F餐廳尚有空位，可以坐低休息＋食午餐。

アーチダムカレー (1700円)：炸豬扒+咖喱飯，味道正常價格合理，無投訴。

二色カレー (1700円)：雙色咖喱飯造型係黑部水壩，青咖喱好香但對我嚟講太辣。

食完飯行二百級樓梯既展望台，無咩人行上去。

由展望台睇水壩。

黑部湖6月下旬至7月下旬會放水，但睇雪牆係4-5月，無得一次過睇２樣。

回程返轉頭先慢慢睇黑部平。

黑部平有個小庭園，但有個告示牌話有熊，黑部平個碑又俾雪遮咗一半，求其影張相收工。

大観峰個展望台好細，人多又迫，遠眺黑部水壩影張到此一遊又收工。