日本秘湯守護協會．藤七温泉 彩雲荘

[Day 4] 06 Jun 2025（久慈 > 北三陸 > 久慈 > 八幡平）

標高1400米既秘湯，藤七温泉 彩雲荘，睇龍之眼既季節經常full booking。

【藤七温泉 彩雲荘】

地址：〒028-7302 岩手県八幡平市松尾寄木北の又

今日人品好，睇到龍眼，酒店full booking下仲可以泊到門口車位。

相機wide angel無壞，對眼都唔係有問題，呢度成棟建築物都係斜既，斜到隻門無咗忽，地板放喼會碌去一邊。

28690円+150円x2入湯稅，包早晚餐，，免費泊車，共用廁所同沖涼。

呢度標高1400米，無冷氣但有暖爐，仲有羽絨被。

無諗過六月都要用暖爐，因為夜晚得幾度。

藤七温泉 彩雲荘　個秘湯燈籠無放門口，收埋咗喺旅館入面。

女性用溫泉浴巾。呢度全部都係混浴，呢條溫泉浴巾對女性係必需品，除非有勇氣全裸同異性混浴。

晚餐９成野菜，一人一條魚，無幾兩肉，好健康啱哂我。

旅館既房同膳食完全唔可以同山下面既溫泉旅館相比，賣相唔精緻唔啱打卡，老細話呢度係高級版既富士山山屋，有溫泉浸有熱湯同飯，個心即刻好安慰。

晚餐好清，好在揀咗個有地酒既plan，先似番啲住溫泉旅館。

未試過住溫泉旅館咁想食熱嘢，因為呢度真係好凍。

山頂用自家發電機，成座建築物無暖氣。

大浴場無暖氣無花灑，5-6度氣溫用木盆裝水沖涼洗頭凍到簡直唔想沖。

除咗飲熱湯，熱茶，熱飯，油燃暖爈，冋埋浸緊溫泉果陣，呢度全部嘢都係凍既。

溫泉係正，邊浸溫泉邊睇日出，風景一流，但怕凍體質都係建議浸日歸，唔好留宿。

無偷影，企喺車路影，呢度全部溫泉都係咁開揚，同埋係混浴。