とん吉 - 丼吉日本吉列專門店餐廳 Tonkichi Tonkatsu Seafood

又唔煮飯，又出街喫飯，仲要喫貴嘢。
今次醒喇，直接影餐牌，有哂價錢有哂名，唔使怕食得飽得滯或食懵咗，無借口唔記得價錢同喫過咩。

左上：吉列鹿兒島特等豚肉定食 - $192
左下：滑蛋吉列豬柳飯 - $178
右上：雜錦刺身沙律配日本膠原蛋白 - $118
右下：將麵豉湯轉秘製日式豬肉湯 - 另加 $32

等食既時候最難過，個肚又失禮地起勢打鼓，指定動作，影吓杯茶同茶壺，分散吓注意力，個肚行雷都都無咁覺。
順手磨吓芝麻，等開動。

先上：雜錦刺身沙律配日本膠原蛋白 - $118
雜錦刺身沙律份量都可以，菜新鮮，刺身無咩雪味，淨雜錦刺身沙律好似$92，多日本膠原蛋白就多廿幾蚊。
日本膠原蛋白近鏡見下圖：好似大菜糕又似啫喱果粒就係日本膠原蛋白。
老實講，膠原蛋白無味無道，食咗又唔覺得白咗滑咗，真係唔識欣賞，呢啲呃錢花巧嘢，下次唔使預小小囉，要個淨雜錦刺身沙律平番廿雞符合師奶小小性格多啲。

好！主菜上枱！！
左：滑蛋吉列豬柳飯 - $178
滑蛋豬柳同滑蛋豬扒一樣$178，但吉列豬柳貴過吉列豬扒，額頭有個〔貪〕字既小小，當然揀滑蛋豬柳喇！！
$178既滑蛋豬飯，真係寧捨好味過人，蛋香，豬脆，汁甜，正！！
若各位blog友間中見到隔離枱有個貌似細佬既肥師奶駁命〔習習聲〕扒滑蛋豬飯，一路大叫好味，呢個好可能係小小，請勿見怪，美食當前，無哂儀態咁扒飯係人之常情啊！！


右：吉列鹿兒島特等豚肉定食 - $192
據財政大臣話，豚肉鬆軟嫩滑多汁，炸粉又薄又脆，當然好味。
其實小小都有偷一舊豚肉喫架，但因為實在太愛滑蛋豬，個腦只記得滑蛋豬好味～～味～～味～～啊～～～之外，差點連老媽子姓甚名誰都唔記得，仲點會記得呢舊炸豬扒既味道呢．．．．．．

左：將麵豉湯轉秘製日式豬肉湯 - 另加 $32
據財政大臣講，味道濃郁，材料十足，但小小喫完個滑蛋豬飯，實在飽到上心口，連一啖湯既空位都無，所以無試味囉。
右：免費既飯後果－西瓜

埋單連加一，$572。
間唔中一餐，(又貴又槷氣)，當奬勵自己都唔錯。