戀上 馬爾代夫 (DAY 5-6)

02 Jun 2011 - 07 Jun 2011 戀上馬爾代夫 (DAY 5)

---

[Day 5-6] 06-07 JUN 2011 (Constance Moofushi Resort)死心不息繼續早起睇日出，今個旅程最後一日既馬爾代夫日出，
都叫做有丁丁既，算還咗半個心願喇

前晚收到封床頭情信，今日要12:00 Check-out，水上飛機就16:00起飛
酒店全包宴包一日三餐，第一日到埗已經喫咗午餐同晚餐，
即係今日喫埋餐早餐就再無全包嘢喫，好，喫飽啲先！！

[早餐]："MANTA" - MAIN BUFFET RESTAURANT

　

喫得咁飽，唔可以即刻游水，當然又同model影多幾幅相
查實馬爾代夫呢度都好大風，model成日都吹跌，企都企唔穩，
影呢幾幅相用咗幾多時間．．．．

　

好！！，抖夠，最後一輪落水！！
拖住財政大臣一齊浮潛，望住個水底世界，好平靜，好放鬆，
諗起呢幾日做既嘢都大同小異，
起身，餵魚，落水，喫早餐，落水，喫午餐，落水，下午茶，落水 / 午睡，晚餐
雖然一日沖成四五次涼皮都甩咁滯，
但可以過啲咁悠閒寫意既生活，真係好想留响樹唔返屋企！
可惜，小小唔係億萬富豪，要返去打工搵錢開飯．．．．

12:00 準時放行李出villa 門口，然後去番reception check-out

check-out時，見到同一日入嚟果班同志都係今日走，
人人埋單都要放低幾舊水美金，
但小小埋單一蚊都唔使俾！！因為所有自費活動全部都無參加過！！
日日齋落水浮潛都玩唔切，使鬼參加自費活動！！

[午餐 / 下午茶]："MANTA" - MAIN BUFFET RESTAURANT 隔離既休閒活動室

雖然今朝喫得好飽，但游咗一輪水，幾飽都好快肚餓
再入"MANTA"喫午餐的話，盛惠每人USD45 定 USD50
雖然個pasta煮得好好味，但唔值四十幾五十蚊美金喎！
咁點算？唔怕，餐廳隔離有個休閒活動室，裡頭有啲果汁，水，三文治，曲奇任吃

12:00 check-out，16:00先坐水上飛機，齋坐四個鐘咪好悶？
有錢既，可以去做spa，同志們有錢，多數book咗走呢日做spa，
小小呢啲窮鬼，唔捨得每人俾舊幾水美金做spa，
喫咗幾啖麵包，坐咗去beach bar果邊訓覺，
一訓就訓咗兩個幾鐘，夠鐘上機

Maldives，I will be back！！！！！

坐咗25-30分鐘水上飛機，番到去馬里機場
頭先响Constance Moofushi Resort就四點，因為快一個鐘關係，
出到嚟都係四點，坐番架shuttle去番馬里機場，
工作人員就問：你哋要唔要導遊帶你遊馬里呀？
小小呢啲cheap精，當然唔要喇，馬里細成咁，路痴如小小蕩失路都唔怕，
沿住海行實行到番出嚟！！

出去行無理由拖住件行李，响機場寄存行李要USD5 一件，
cheap精小小又諗縮數，家陣check-in咪慳番兩件行李USD10囉？
呢個如意算盤打唔響，因為咁早未有得check-in，起飛前兩個鐘先得
咁寄就寄喇！USD10就USD10喇！

跟手坐船由機場去馬里市，每人USD1 / 馬里幣10，跟住．．．．
初初落船都仲有心情四圍望，行多陣開始唔對路，
天氣非常熱，啲汗起勢咁流，無咩風，車又多，咩都無心情睇，
何況呢樹都無特產，無手信買得落手

漫無目的咁四圍行，行到一個類似沙灘既地方，隔離有個波地
小小同財政大臣無聊到坐向度睇人游水踢波，跟住睇人衝浪．．．
無聊咗好耐，好辛苦先等到17:55，諗住去喫晚飯，嘆吓冷氣．．．

睇指南介紹，見有間好似出名啲飯店响Traders Hotel附近，
就去睇睇喇，去到發覺呢間舊店執咗，跟住指示搵新店，但搵到去又未開
係咪咁黑仔呀．．．．．
咁轉去第二間喇！！記得响旅遊書見過間THAI WOK，呢度又有介紹，就去喇！

摸到去到門口，仲未開既？！吓？！開19:00！！家陣18:30，仲要等半個鐘，
返出去碼頭坐等夠鐘．．．好熱．．．流汗．．．頭痛．．．

[晚餐]："THAI WOK" 19:00夠鐘喇，即刻碌去餐廳！！THAI WOK喫泰菜，點咗一樽仔白提子汽水，炸蝦，蠔油雞肉炒通菜，炒飯

炸蝦個皮非常厚(98)，條蝦非常細，蠔油通菜稍咸(88)，
炒飯(107)响三樣嘢當中算係最好味，唔係，最好味應該係枝汽水(25)，加埋服務費埋單馬里幣334，USD23
小小明白全部都係入口嘢，咁既價錢算係咁，但味道就真係．．．唔啱口味囉
若果响香港開間咁既泰菜，肯定無人幫襯，唔使一個月可以執．．．

喫完拿拿聲坐番船過去機場，20:15都未夠鐘check-in，
响機場門口喫番杯Movenpick雪糕，順便嘆冷氣，小睡一陣
呢兩球雪糕，價值馬里幣55，起初問俾美金的話要USD7，
跟據找換店既兌換率 馬里幣55除15應該大約USD4，USD7佢食水都幾深喎，
但無嘢做又想坐下抖吓冷氣，USD7就USD7喇！
但埋單時又USD5，真係一時一樣

21:10 夠鐘即刻拎番行李入機場check-in，機場入面都有幾間食肆，
一份三文治 / 漢堡包連薯條都係大約USD19 - 20，有冷氣嘆，有幾間商舖行
若果再揀，小小同財政大臣都會揀留响機場都唔會去行馬里市
寄行李兩件USD10，坐船二人來回USD4，加埋都USD14，
用呢USD14响機場喫三文治好過，就算向Movenpick喫多兩球雪榚都好

等到23:00夠鐘上機 (即星加坡 02:00)，即刻碌上飛機大覺訓，
呢程飛機餐係宵夜，無雪糕食，懶鬼小小連相都唔願影
坐四個鐘飛到星加坡，快番三個鐘，07:00，
好在扮醒既小小留帶咗枝牙刷牙膏上機，响星加坡轉機果個零鐘可以刷個牙洗個面，
亦好在扮醒袋番件衫，星加坡機場朝早真係凍到飛起，無件衫仔著真係傷風都似
連不嬲唔怕凍財政大臣都凍到起雞皮
08:30 又夠鐘坐飛機由星加坡返香港，呢個馬爾代夫旅程，就咁結束。

註：
- 馬里市無咩嘢睇，唔抵得熱既就真係唔好行
- 經星加坡轉機可以袋埋牙膏牙刷上機，轉機有得刷牙- 星加坡機場朝早啲冷氣真係幾勁，袋定件衫穩陣啲