乳頭溫泉鄉 - 妙乃湯

上回講到去左蟹場溫泉，孫六溫泉，今均當然要講下妙乃湯。
乳頭溫泉鄉入面，收費最貴係妙乃湯，裝潢最靚係妙乃湯，

可以上網預約都係得妙乃湯，抵佢貴啲。

坐羽後巴士妙乃湯門口落車，一落車就望見呢個瀑布景。
食事處都望到呢個景，甚至川景既房，露天混浴，貸切風呂都係望呢個景，

唔同既只係角度。

講完風景，係時候講溫泉。
今均浸妙乃湯唔使一路除衫一路XYZ!#$%，因為妙乃湯既脫衣所有暖風機，

而沖洗設備方面，孫六溫泉同蟹場溫泉都好原始，得木盆同花灑，

妙乃湯比較似酒店既大浴場，有沐浴露洗頭水，較大部份人接受。
妙乃湯有分男女內湯，每晚20:00交替；

想試哂妙乃湯既內湯，記得20:00前浸一次，20:00後浸一次。
男女內湯分別每邊都有金の湯同銀の湯，混浴外湯都有金の湯，銀の湯。
金の湯 - 好似泥沙混濁既顏色，酸性較高，浸完覺得拿拿地同滑左
銀の湯 - 單純泉，無色無味

小小好記得有個內湯叫〔喫茶去〕，

因為小小見到有個門口寫住呢個字，以為門後會通番出去喫茶室，

猶豫左好耐，好唔好推門出去呢？

陣間真係通去喫茶，咪俾人見到無著衫既小小？推開丁丁隻門，車！！

自己嚇自己，呢樹真係浸溫泉，唔係喫茶架。

浸完呢個喫茶去既銀の湯，又拱去浸金の湯。

金湯既底部沉積物好似沙咁，浸既時候好似去左沙灘玩水既感覺，

但要小心金の湯既內湯 - 岩風呂，因為金の湯有顏色，遮住底部果三級樓梯，

一唔小心實差錯腳。

玩完內湯，當然要去玩下雪見風呂既外湯。
外湯係混浴，混浴係容許女性入浴時使用毛巾，小小又拎番果條細得可憐，

遮到前但擋唔到後既毛巾仔，衝出去混浴，睇下有無靚仔裸男。

露天混浴未行到，先見到飄雪，腳底踩雪，一路〔口雪口雪〕聲，再加一個噴嚏，

莫講話靚仔，差啲連老公大人都嚇走，結果出到混浴都係一個裸男 / 女都見唔到。

呢個就係露天混浴銀の湯，溫度比內湯高；

雖然叫露天，但都有瓦遮頭，雪未至於落正頭頂。

而呢個就係露天混浴既金の湯，可能因為無遮無擋同落雪既關係，

泉水溫度比銀の湯低，無咁辣屁股，浸得小小唔願起身。

玩哂咁多個湯，當然要試埋免費既貸切銀の湯。
入住妙乃湯就可以預約一小時既貸切風呂，唔怕同其他人一齊，

咪以為貸切就無好野，一樣望到川景。
泉水方面呢，溫度較高，有辣屁股之感，但未去到孫六果隻咁勁，

適應一陣都可以坐到落去，坐耐左頂唔順，又試伸手攞一堆雪放入去降溫。

玩左咁多個湯，皮都皺埋，係時候撤退。

妙乃湯温泉の概要乳頭溫泉鄉 - 蟹場溫泉 乳頭溫泉鄉 - 孫六溫泉
乳頭溫泉鄉 - 妙乃湯