乳頭溫泉鄉 - 孫六溫泉

上回講到最近乳頭溫泉巴士站有幾間溫泉，大釡，蟹場，孫六同妙乃湯，

去左蟹場溫泉，今均要試下有秘湯之稱既 - 孫六溫泉。

睇路標都知道，距離孫六溫泉0.8KM，坐車一陣就到喇，

咁就錯喇，頭段幾十米都仲可以架車，後段只有人路無車路，

要落車行入去，唔知係咪呢個原因，所要叫秘湯呢？
其實沿路風景都唔錯，架車或行路，睇下風景影下相好快過。
唔覺唔覺，睇完川景同瀑布，過條橋仔就到孫六溫泉。

孫六溫泉既內外湯，就咁坐落向出邊，唔使進入孫六溫泉既接待處都去到，
基本上唔俾錢入左去都唔會有人發現，
但唔俾錢呢樣野，小小雖然姑寒但守規矩，當然唔會咁做喇。

走番去接待處，叫左幾聲等左陣先有人出現，
放低800YEN (400YEN X 2 二人)，就可以浸番夠本喇。
孫六溫泉有男女別既內湯各一，混浴內湯 X 1，女外湯 X 1，混浴外湯 X 2，
仲有一個湯塚。

浸溫泉之前，當然又要除衫同沖身喇。
孫六溫泉個脫衣所，未至於蟹場溫泉個外湯咁無遮無掩，
有門閂，但刺骨既寒風依然吹到入嚟，
雖然頭先向蟹場浸過溫泉個身仲熱熱地，但零下幾度除衫真係好鬼痛苦，
又係一路XYZ!#$%，一路除衫．．．

除哂衫，一鼓作氣衝入男女別既內湯。見無人，拿拿聲影幾張相交差，
影完又走過去女外湯，無人當然又要影兩幅，一路打冷震一路影相，
影完當然要浸下個外湯喇！

一伸隻腳落去，嘩一聲叫出嚟，好熱呀～～
以為係溫差先覺得辣腳，放埋屁股落去，不得了，成個人跳起，真係好鬼辣。
向溫泉邊攞一堆雪放入去，都係覺得好辣屁股，但個人就凍到死，唯有放棄，
轉戰內湯混浴。

入到內湯混浴，見到老公大人一個浸得咁疏肝，即刻跳落去一齊浸。
呢個時候先慢慢望下內湯既格局，非常簡陋，用燈膽照明，
但正因為簡陋，感覺原始，加上泉水溫度適中，浸得特別舒服。
玩左陣就出外湯混浴，內湯混浴有門直出外湯，一開門，又係陣刺骨寒風。

兩個混浴外湯同女外湯一樣，一樣望川景，一樣辣屁股，
但混浴外湯非常開放，基本上行入孫六溫泉就就一定望到，
女湯則有聊勝於無既籬笆遮一遮，安慰心靈多於實質用途。
之前提到既湯塚，就向混浴外湯隔離，八卦小小當然去裝裝咩料，
其實係一個無水既溫泉。

孫 六同蟹場相比，孫六既內湯簡陋/ 原始程度，遠超蟹場，但內湯大細相約；
外湯方面，孫六雖然有兩個，但兩個加埋都唔及蟹場一個外湯大；
景觀方面，一個川景一個樹景，兩個都正；
混浴外湯既開 放程度，一定係孫六，雖然孫六同蟹場都係行過就望到，
但孫六因為唔使俾錢就可以裝到，蟹場話哂都要俾錢經過雪道先見到。

但邊個值得一浸？小小覺得兩個都值，因為感覺同功效都唔同嘛。

孫六温泉の概要
乳頭溫泉鄉 - 蟹場溫泉 乳頭溫泉鄉 - 孫六溫泉
乳頭溫泉鄉 - 妙乃湯