[Day 9] 08 AUG 2010 (山形 > 仙台)
[早餐]：ソーレ イン ホテルズ
酒店包朝食，唔使煩諗喫咩。
本來諗住都係果啲凍冰冰既飯糰，麵包果啲，點知個飯糰係新鮮熱辣整架。
おばあさん問我地要咩餡，揀咗三文魚之後，
睇住おばあさん向個大電飯煲入面拎飯出嚟整飯糰。
個飯糰整完放上枱面仲出緊煙，喫完即刻要多個喇。
08:55 - 10:18 山形 > 仙台
返到仙台，當然去舊酒店拎番哂啲行李，搬去新酒店喇。
推住個重到死既喼，果條十零分鐘既路變得好長好遠好曬．．．．
去咗新酒店放低行李，就去搵るーぷる仙台觀光巴士，遊一遊仙台。
るーぷる仙台觀光巴士由09:00 - 16:00 運行，眼見都十一點幾，
本來仲猶豫緊買唔買一日乘車卷，醒目既財政大臣見到，
是日運行到20:00，咁就當然買喇 (600円 x 2)。
單程票價250円，一日乘車卷就600円，
但買咗一日乘車卷，好多景點都有折扣優惠，
例如瑞鳳殿，仙台市博物館，青葉城資料展示館等等。
因為呢幾日係仙台七夕まつり，好多人都坐るーぷる仙台觀光巴士，原定15分鐘一班既るーぷる仙台觀光巴士，加開班次，大約5-10分鐘就有一班。
12:15 首站係瑞鳳殿 (原價550円，持るーぷる仙台一日乘車卷100円割引，共900円)。
可能係仙台七夕まつり，加上係星期日，一落車就見到人頭湧湧。
坐るーぷる仙台去既人又多，租的士一日遊既又有，仲有架私家車去既又有。
13:30 下一站，仙台城跡。
去到仙台城跡，點都要影一影伊達政宗個騎馬像，但又係人頭湧湧，除咗伊達先生個頭，永遠都有路人甲乙丙個頭出現。
[午餐]：青葉城 本丸会館 日本料理 仙臺
預咗由朝到黑都向啲觀光景點流連，所以無諗過要去邊度喫午餐，只係諗住去到邊喫到邊！
小小勢估唔到，財政大臣竟然揀向青葉城呢樹既日本料理 仙臺午餐。
等咗5分鐘左右有位，一入去就煙霧迷漫，成間食店都係燒烤味，揀咗一個牛舌網燒定食 (1500円)，一個仙台牛網燒定食(1500円)。
牛舌既味道，當然唔及伊達同利久，但都ok。
仙台牛味道都ok喎。
喫飽抖抖，再坐るーぷる仙台去大崎八幡宮。
睇哂想睇既景點，都只不過係15:45，坐埋車返仙台駅都只不過係16:30，頭先15:00先喫完午餐，無理由咁快又喫架嘛，咁去行下商場喇，橫掂次次嚟都未行過商場。
[晚餐]：かき鮮 海風土
早兩日喫咗伊達牛舌做晚餐，今日下午又喫咗牛舌做午餐，咁揀咗仙台駅既かき鮮 海風土喫晚餐。點咗蠔壽司，兩個魚生飯。
蠔壽司 (500円) 幾好味，隻蠔好鮮甜，呢間食店主打蠔，魚生飯質素唔及蠔，雖然質數都比香港一般日式食店好，但無想像中咁好食，無嘩！一聲果種感覺，喫魚生飯不如喫多餐牛舌仲好。
今日係仙台七夕まつり最後一日，再行多次喇。
20:55 ，舖頭開始關門，仲開始拆除七夕既彩帶，小小2010既追祭之旅，亦都去到尾聲，明天就上番上野，後日就離開日本，睇到人地拆彩帶，真係有啲唔捨得。
[住邊]：ホテル グリーンウエル
識路唔使搵的話，距離JR駅大約3分鐘，近過之前果近好多，都只不過係4200YEN，仲包輕朝食添。
今日下午check-in時未有房，諗住寄低行李，晚頭番嚟時拎房再拎番，點知酒店服務員已經幫我地送咗啲行李上房，秋田果間收得咁貴，都無啲咁既服務，點知呢度有，掂呀。下次再去仙台，好大可能都係住呢間酒店。
[是日消費]早餐：0YEN
交通：1200YEN (一日乘車卷)
入場：900YEB (瑞鳳殿)
午餐：3000YEN (日本料理 仙臺)
晚餐：4400YEN (かき鮮 海風土)
住宿：4,200YEN
－－－－－－－－－－
總共：13,700YEN
註：
- 仙台七夕まつり期間，好多店餔都有折扣優惠
沒有留言 :
發佈留言