小小的宇宙: 6月 2011

2011年6月26日星期日

日式咖喱雜菜拼炸豬扒

財政大臣間唔中就話要喫煎炸嘢，炸豬扒呀，炸雞翼呀，炸呢炸路，總之要炸！

小小做咗無飯煮婦一段日子，最怕既嘢終於要試做喇．．．．炸豬扒！！

又驚豬扒韌，又怕豬扒唔熟，一直都唔願買唔願煮，

今日見財政大臣重覆又重覆話要炸豬扒，就整一次喇！！

材料：

急凍豬扒三塊，蛋一隻，麵包糠適量

炸豬扒做法：

1. 將豬扒前後左右用刀背打鬆
2. 用糖呀，豉油呀，胡椒粉呀醃豬扒十五分鐘至幾個鐘咁喇

3. 開小鑊油燒到中油溫咁上下喇

4. 將醃好既豬扒浸一浸蛋漿，再痴上麵包糠

5. 掉入鑊裡面半煎炸

6. 炸到金黃，禮成

好在件豬扒夠薄，炸到金黃剛好熟

有炸豬扒，自然想用日式咖喱配住喫喇！

材料：

日式咖喱磚兩格，雜菜適量

日式咖喱雜菜做法：

1. 一飯碗水，掉哂啲薯仔蘿蔔落去煮
2. 煮到薯仔蘿蔔夠熟夠腍

3. 再掉咖喱磚入去攪溶

4. 同時掉埋其他菜如西蘭花等易熟既菜

5. 當咖喱磚溶哂時，其他菜都應該熟哂

6. 上碟，食得

2011年6月25日星期六

健行 - 鳳凰徑 (2011/06/25)

家陣唔使返學，唔使溫書，唔使做功課，
除咗响屋企養豬，都間唔中會行吓山游吓水．．．放吓豬既．．．

今日就去行鳳凰徑。

坐地鐵去到東涌，再轉車去深窟道，
由第五段開始行，由深窟道出發，上薑山，靈會山，去萬丈布 (7K)，
再由萬丈布經龍仔悟園去大澳 (2.5K)。

天氣又曬又熱，去到龍仔悟園，每人兩枝大水都耗得七七八八，
好在龍仔悟園果樹啲維修叔叔，日日抬啲汽水放响樹擺賣，
小小同財政大臣先有得補給，買番枝好都無見過既茶字典飲吓解吓暑。

問准維修叔叔，順便四圍參觀吓

由龍仔悟園去大澳途中，遇到一個行山大叔，
一見到小小同財政大臣就話一齊行，一路吹水，
一路提住話落大澳條路好斜好跣，要小心，
小小仲心諗，呢幾日曬成咁，天氣咁鬼熱，啲路應該唔太跣，
話口未完，小小就啪聲跣低咗，跌到屁股開哂花，仲扯到條筋，

整鬼佢吖，地下雖然好多枯枝爛葉，但唔覺眼有青苔，
點鬼知就係啲枯枝爛葉遮住哂啲青苔，加上路斜，
一時輕敵，就跣到PK，行咁多次山都第一次跌得咁甘，
除咗對手遭殃，返屋企仲發現屁股咁鬼厚肉都跌到瘀咗損咗，
鬼整咁連大脾都瘀鬼埋

好在無扭到腳或者腰．．．．咁既年紀真係唔襟跌架喇．．．．

2011年6月8日星期三

戀上馬爾代夫

前言
=============================================================
原定2011年的旅遊quota，會用作去日本東北看紅葉，
早在上年10月已經開始計劃行程，資料搜集．．．
但人算不如天算，一次天災，立即決定擱置2011紅葉之旅。
不能去看紅葉，今年應該沒外遊機會，
誰知與財政大臣閒談期間，財政大臣忽然提議：不如去馬爾代夫！！

馬爾代夫？！好！非常好！！
一個由小聽到大，想去但又以為要很富有才可以去的地方。
不理考試日將近，埋頭上網找機票酒店，
結果於向短短一個星期內，決定酒店兼訂package，然後安心考試。

馬爾代夫，我來了！！

2011年6月7日星期二

戀上馬爾代夫 (DAY 5-6)

02 Jun 2011 - 07 Jun 2011 戀上馬爾代夫 (DAY 5)

[Day 5-6] 06-07 JUN 2011 (Constance Moofushi Resort)死心不息繼續早起睇日出，今個旅程最後一日既馬爾代夫日出，
都叫做有丁丁既，算還咗半個心願喇

2011年6月5日星期日

戀上馬爾代夫 (DAY 4) (Constance Moofushi Resort)

02 Jun 2011 - 07 Jun 2011 戀上馬爾代夫 (DAY 4)

[Day 4] 05 JUN 2011 (Constance Moofushi Resort)

又嚟死心不息早起睇日出，今日起身仲見到尋晚果幾粒大星星，
小小個cheap雞相機又cheap唔哂喎，又影到喎

2011年6月4日星期六

戀上馬爾代夫 (DAY 3 PART 2) (Constance Moofushi Resort)

02 Jun 2011 - 07 Jun 2011 戀上馬爾代夫 (DAY 3) PART 2

[Day 3] 04 JUN 2011 (Constance Moofushi Resort)今日好懶，喫飽飯無再落水，
慢慢行番去water villa，四圍望，四圍影 (呢啲時間影相真係好熱好曬．．．)
跟手响房入面邊嘆冷氣邊上網，(房入邊有mac機可以免費上網呀．．．)

隔一陣就去露台曬大肥脾，懶梳肝咁攤响樹睇書
無錯！！係睇書！！
財政大臣帶咗本書去諗住睇，點知掛住同周公子開炲無睇，
睇書既竟然係無文化兼無時停，鍾意行多過坐，鍾意睇公仔多過睇字既小小！！

响雪櫃拎幾冰凍既果汁，邊曬肥脾，邊飲果汁，邊睇書．．．好型呀！

戀上馬爾代夫 (DAY 3 PART 1) (Constance Moofushi Resort)

02 Jun 2011 - 07 Jun 2011 戀上馬爾代夫 (DAY 3) PART 1

DAY 1-1 > DAY 1-2 > DAY 2-1 > DAY 2-2 > DAY 2-3 > DAY 2-4 > DAY 3-1 > DAY 3-2 > DAY 4 > Day 5-Last Day

[Day 3] 04 JUN 2011 (Constance Moofushi Resort)今日無morning call，但照較鬧鐘起身睇日出！
無錯，懶鬼小小加懶蟲財政大臣要睇日出！！
較咗五點鐘起身，起身既時候魚肚白都未見，個天仲黑麻麻睇到星星，
撞鬼囉，突然醒起，呢樹快過馬里市一個鐘，
尋日馬里市五點幾先天光，家陣先等於馬里市四點幾，仲要等成個幾鐘

呢刻真係好想攤番上床繼續搵周公子開枱．．．．．

見到個天開始有啲變色，就抬定腳架出去影相；
雖然呢樹天氣熱，但未天光又有海風，感覺好清涼，正！

2011年6月3日星期五

戀上馬爾代夫 (DAY 2 PART 4) (Constance Moofushi Resort)

02 Jun 2011 - 07 Jun 2011 戀上馬爾代夫 (DAY 2) PART 4

[Day 2] 03 JUN 2011 (Constance Moofushi Resort)浮潛咗陣，見今日夠皮就收隊！
財政大臣向私家梯果樹沖身期間，小小八八卦卦四圍裝，見到老遠有兩排黑色嘢，問：果啲咩嚟架？黑色既？係咪落雨呀？
到小小沖身既時間，啲雨落到過嚟喇，一陣狂風暴雨，好似三號波咁
但大約十五分鐘就停

沖好身，抖陣，又出去影相！影日落！
去到water villa個盡頭，諗住邊擺model陣，等影日落，
點知擺完model陣，都仲未夠鐘，好，轉場！

戀上馬爾代夫 (DAY 2) PART 3 (Constance Moofushi Resort))

02 Jun 2011 - 07 Jun 2011 戀上馬爾代夫 (DAY 2) PART 3

[Day 2] 03 JUN 2011 (Constance Moofushi Resort)以下係小小唔知向邊樹偷番嚟既鳥瞰圖！
小小今次入住既122號房，係右手邊既water villa。
左手邊都有排痴住senior water villa既water villa，呢邊就麻麻哋喇！容後再講！

好，先嚟巡吓小小住果邊既WATER VILLA先。
呢度係water villa既盡頭，有幾張木櫈，
日頭可以坐向度望住清涼 + 冰藍李施德林色既海水扮悠閒，
呢樹仲有條扶手梯可以落水，唔用自家water villa落水梯，可以向呢樹落去玩浮潛，

晚頭可以坐向樹睇星星。

戀上馬爾代夫 (DAY 2) PART 2 (Constance Moofushi Resort Water Villa)

02 Jun 2011 - 07 Jun 2011 戀上馬爾代夫 (DAY 2) PART 2

[Day 2] 03 JUN 2011 (Constance Moofushi Resort)

到喇到喇！終於踏足向馬爾代夫喇！
呢刻真係興奮到想趴向個地樹親吻個地下。

戀上馬爾代夫 (DAY 2) PART 1 (水上飛機)

02 Jun 2011 - 07 Jun 2011 戀上馬爾代夫 (DAY 2) PART 1

[Day 2] 03 JUN 2011 (馬里 > Constance Moofushi Resort)
尋晚check-in時，已經講定俾小小知，
今日0645要check-out，0700要離開酒店，08:30坐air taxi，
預食早餐同執番個唔夠訓貓樣既時間，安排咗0500 morning call。

[早餐]：Traders Hotel - Lime
間酒店咁貴，好在包早餐，否則HKD2050訓幾個鐘 + 沖個涼，
姑寒小小真係會揀唔沖涼 + 訓機場！！

2011年6月2日星期四

戀上馬爾代夫 (DAY1) PART 2 (Male - Traders Hotel)

02 Jun 2011 - 07 Jun 2011 戀上馬爾代夫 (DAY 1) PART 2

[住邊]：Traders Hotel, Male, Maldives

呢個trip實在影得太多相，唔分開的話一篇blog太長。

今晚既Traders Hotel其實package唔包，要另加錢，

加錢就加錢喇，唔通訓機場咩，去得旅行，預咗要使錢，

要加成HKD2050既酒店，真係點眼訓都要影相影得清清楚楚，

仲要開多版blog嚟講。

ROOM1003：先嚟呢張六呢大床大特寫，牀褥舒適，枕頭稍軟。

戀上馬爾代夫 (DAY1) PART 1 (香港 > Male)

02 Jun 2011 - 07 Jun 2011 戀上馬爾代夫 (DAY 1) PART 1

[行程資料]
去程 : 香港 > 新加坡 (13:30 - 17:10)，新加坡 > 馬里 (20:45 - 22:10)
回程 : 馬里 > 新加坡 (23:25 - 07:10+1)，新加坡 > 香港 (08:30 - 12:15)
時差 : 香港與新加坡沒有時差，馬里比香港慢三小時，但小小入住既RESORT又快馬里一小時
交通 : 船，水上飛機，腳

[Day 1] 02 JUN 2011 (香港 > 新加坡 > 馬里)

次次去旅行都驚死蝕底，一定揀早機去晚機返，
但今次唔同，早機同下午機都一鬼樣，
都要向新加坡等到晚頭八點幾先要機轉去馬里，
所以唔使去機場喫早餐，可以向屋企附近喫埋早餐先去機場。

[早餐]：屋企附近 - 麥當奴
食食吓包，財政大臣突然問：咁得閒，點解仲要喫快餐包唔去飲茶？
係喎，難得下午機，點解咁笨仲喫快餐，應該去嘆番一盅兩件先嘛！[午餐]：飛機餐
次次都覺得飛機餐好難食，今次唔同喇，
因為有哈根兜雪糕做甜品，即刻加哂分

。

五點鬆啲到咗新加坡，仲有三個幾鐘先轉機，當然要四圍行下兼喫吓嘢！出發前有日睇到電視講星加坡樟宜機場有好多嘢睇，
啱喇，除咗轉機會留向機場外，都應該唔會有邊次旅行咁有閒情去行機場！

先嚟去睇蘭花園，再去睇蝴蝶園，仙人掌，太陽花。
蘭花園向室內，無論日頭夜晚都有燈光，一定影到靚相，
但蝴蝶園，仙人掌同太陽花就唔同，向室外，影相要有太陽先靚，可惜去到時已天黑，咩都睇唔到。
為咗睇呢幾樣嘢，穿哂Terminal 1 - 3 。

[晚餐]：24小時海南雞飯

睇呢幾個花園邊使三個幾鐘，有時間當然要喫吓新加坡美食，海南雞飯喇！！

左邊 - 海南雞飯 SGD6，右邊 - 海南雞飯SET SGD9
分別：同一隻雞斬出嚟，一個係翼連胸(左)，一個係脾(右)
一個有湯無菜(左)，一個有湯有菜(右)，但啲菜少到好似拌碟咁
結論係，可以慳番SGD3，要海南雞飯夠喇。

向新加坡機場喫嘢？咁咪要唱定啲坡紙？唔使，美金都用得架！
考慮用美金？坡紙？前，請參考機場找換店以下兌換率：
USD1 = SGD1.2 (新加坡機場)
SDG0.1583 = HKD1 (新加坡機場)
USD1 = HKD7.8 (香港)

傻仔小小，睇咗以為SGD1 = HKD15.83，用美金喫飯有著數，仲以為自己好醒咁開心咗幾日

(其實係豬頭丙)
食飽行多個圈，去等轉機。
班機20:45先飛，boarding pass上面話30分鐘前開始登機，
望一望手錶20:05，時間仲好充裕吖，
但望一望電視已經Last call，嚇到命都無，即刻碌去閘口。

碌到去閘口，都仲未開始登機，咁快Last call，嚇死人同鴨咩！

[宵夜]：飛機餐
無睇錯亦無打錯！！又食喇！又食喇飛機餐喇！

無計喇，馬爾代夫遠吖嘛，搭兩程機先到，搭一程咪又食一餐囉！
飯後又有脆皮雪條做甜品，又加分喇！！

雖然班機起飛同到達係20:45 - 22:10，
由於時差關係，實質已經係香港時間零晨一點幾，坐咗四個幾鐘飛機先到馬里。

過親外地海關，就感覺到香港樣樣都好有效率，
其實應該唔關馬里啲關員事，應該係遊客既問題，
因為前面幾個都係大陸遊客，張arrival card呢度未填果樹又未填，慢少少都正常。

[住邊]：Traders Hotel, Male, Maldives
一出機場，即刻撐大對眼，搵Traders Hotel個牌，大約五分鐘集齊人，
再上Traders Hotel架大飛，船程唔使五分鐘，由機場去到市中心碼頭，
再行條唔使兩分鐘既路，就到酒店。

點解話Traders Hotel架船係大飛？
因為熄燈開船，黑麻麻向海上面向有燈既市中心飛馳，
超快超櫈，真係好鬼似坐大飛偷渡咁。

唔好講笑，就算連酒店check-in，都覺得香港有效率好多。
香港時間兩點都仲未有得訓，等check-in，等key card，等行李，咩精神都無哂，連要俾貼士都無咗回事。

[是日消費]午餐：飛機
晚餐：USD13
宵夜：飛機
住宿：訂package時另加馬里酒店
貼士：0
－－－－－－－－－－
總共：USD13

註：
- 新加坡航空，行李重量每人20kg
- 新加坡樟宜機場個蝴蝶園幾好睇，有時間可以去行

訂閱：文章 ( Atom )