東北追祭之旅 (DAY3) 角館，盛岡 - 盛岡さんさ踊り

31 Jul 2010 - 10 Aug 2010 東北追祭之旅 (DAY 3)

---

[Day 3] 02 AUG 2010 (八戸 > 角館 > 盛岡 - 盛岡さんさ踊り)

[早餐]：コンフォートホテル八戸
今日無尋日咁癲，呢頭喫完早餐，果頭喫燒海鮮。
即係話，理論上應該到午飯時段先有第二餐落肚，所以早餐要喫飽啲。
一諗到要喫飽啲，小小即刻劈咗兩個飯糰，炒蛋，麵包，菜絲，生果，仲劈多兩杯健美麥茶，一大朝劈咁多嘢，麥茶點健美都無用。

08:57 - 09:35 八戸 > 盛岡
10:04 - 10:48 盛岡 > 角館
小小出發前，見到買JR EAST PASS，去盛岡站有免費嘢送，
當然襯轉車時間，去換吓免費嘢喇。

送咩免費嘢？就係呢條南部古代型染和風手巾。

話就話係手巾，但無車邊無剩，一用實披哂口，都係返歸做幾下手腳，行咗條邊先用得。

免費贈品沖昏完頭腦，開始清醒丁丁時候，

見到新幹線櫈背有堆雜誌，當然要拎上手睇吓，

一睇就不得了，見到新幹線車內限定販賣既雪糕，仲要係粟米味呀！！

雪糕呀，雪糕呀，我要喫雪糕！！

等咗唔知幾多分鐘，車仔小姐終於出現喇！小小奉上260YEN，換嚟一盒蚊型粟米味雪糕。

好緊張，粟米味雪糕唔知好唔好味呢？

一掀開，嘩！好香呀！一陣粟米味湧出嚟！

筆啖落口，好香甜既粟米味啊！！！！仲有一粒粒既粟米啊！！

可惜，財政大臣唔太欣賞，試咗啖後，得小小自己哽哂佢

(咁咪仲好，益哂小小啦～～～～)

喫完雪糕，夠鐘落車去角館行吓消吓脂。

角館站既指示非常清楚，沿住行就到角館武家屋敷，

行哂咁多間，其中兩間要俾入場費

青柳家 (500YEN x 2) 石黑家 (300YEN x 2)，

可能係星期一同埋唔係櫻花季節既關係，條街唔係咁多人，

唔覺唔覺舒舒服服咁就行咗兩個鐘。

[午餐]：櫻之里

13:30 又到開飯時間，揀咗街頭間櫻之里開餐。

睇中咗佢係因為有比內地雞親子丼配稻庭烏冬 (1680円 x 2)

一次滿足哂兩個願望 (比內地雞 同烏冬)

找錯處，以下兩set有咩分別？
答案係，個汁同埋個小砵，一個係胡麻汁，另一個係醬油
親子丼個蛋好香蛋味，雞有雞味，比內地雞有趙頭得嚟又唔韌，唔錯。
烏冬又香又滑，配埋個汁，sir sir聲就喫哂。

比內地雞親子丼入面得三小舊雞肉，叫多兩條串燒試真個味。
(借口，大食就大食)

左：比內地雞正肉 315円　右：比內地雞肉腸 157円

吸取尋日賴嘢既教訓，今日要早啲去霸位。

14:50 - 15:39 角館 > 盛岡

一落車，邊度都唔去，直接衝去霸位。

盛岡さんさ踊り 18:00 開始，預早兩個鐘霸位都仲霸到第一行靚位，掂。

霸完位，fing去睇石割櫻，岩手銀行中橋支店。

由朝fing到黑，雖然未夠鐘睇祭，但都腳仔軟，

買啲冰冰喫，消吓暑，坐低等開場好過。

檸檬冰冰(103円)，抓開蓋真係有塊真檸檬向面，酸酸甜甜，
天時暑熱坐街喫冰，正呀！！
西瓜雪條(103円)，條西瓜雪條，除咗味似西似，仲整埋啲朱古力粒粒扮西瓜籽，真係好過癮！
除咗買冰冰，仲買咗包花生，諗住悶悶地時喫，點知睇祭時候實在太忙，
唔記得 / 無時間喫。

夠鐘，開show！！！

唔知係尋日霸位霸得差定係八戸既山車唔好睇，

顯得今日呢場盛岡さんさ踊り好正，

啲小朋友好落力打鼓，跳舞；間唔中又有靚女向正面前fing手fing腳，

每隊除咗服飾唔一樣，跳既舞都有啲唔同，全無悶場，

真係由開場睇到散場。

[晚餐]：盛岡じゃじゃ麺 HOT JaJa

睇到散場，仲走去影埋志願者參加埋一份跳，卒之攪到九點幾先去開餐。

呢個時間都唔敢再揀來揀去，搵來搵去，直接去最近車站既盛岡じゃじゃ麺 HOT JaJa 開餐就算，橫掂上次經過已經想喫。

點咗兩個jaja麵餐連蛋花湯，飯+麵 (780円)，飯+餃子 (800円)

jaja麵，有少少辣既麵鼓醬撈麵，味道ok，喫哂麵之後，

打個生雞蛋落碗，俾侍應姐姐拎去廚房加湯，變成熱辣辣既蛋花湯。

呢個蛋花湯，應該叫蛋花水就啱，除咗之前喫淨既麵醬既味道之外，

就咩味都無，要自己加鹽，胡椒，可以不吃。

食飽又坐車返八戸 22:31 - 23:00 盛岡 > 八戸

[住邊]：コンフォートホテル八戸
繼續向八戸駅住 (5800YEN)。

[是日消費]交通：0YEN
早餐：0YEN 
午餐：3832YEN (櫻之里)
入場：500YEN x 2 (青柳家) + 300YEN x 2 (石黑家)
小食：260YEN (粟米雪糕) + 451YEN (檸檬冰，西瓜雪條，花生)
晚餐：1580YEN (盛岡じゃじゃ麺 HOT JaJa)
住宿：5,800YEN
－－－－－－－－－－
總共：13,523YEN

註：
- JR EAST PASS近期好似好多嘢送，有觀光coupon，又有手巾，出發前睇睇總有著數
- 盛岡さんさ踊り早兩個鐘仲霸到好位