2009年4月8日星期三

真君寶誕 (下)

真君寶誕,除咗有檔口賣香燭,風車果啲,
仲有小食檔,賣嘢食,賣嘢玩,
更加有雜餅,海味呢啲賣。

大大隻蝦乾,細細隻蝦米,五指毛桃,海帶,花膠...


咸魚,咸魚春


花塔餅,雞蛋餅,雞蛋卷,米通,雜餅...


小小最掛住既係呢啲用嚟睇多過食既香糖公仔同埋麵粉公仔...
以前阿伯好鬼叻,有豬八戒,悟空,沙僧,雞仔兔仔豬仔咩都有,
而家得番哂啲簡單既香糖,無哂麵粉公仔,但都好過無....


仲有吹波阿伯...小小一直擔心阿伯去咗賣咸鴨蛋,
咁呢味吹波玩意就失傳喇。

咩叫吹波?吹波有咩特別?
呢個波特別在用糖做,做一舊舊綠色或者紅色既糖,
用好似搓湯丸咁既份量,用手指篤凹一個窿,捏幾下,
再拉長少少糖做個吸咀,跟住用神指彈一下,
咁就整咗舊唔似波既物體出嚟俾你,

最好玩就係呢個時候,襯舊糖暖暖地軟扒扒,用陰力吹脹佢,
一路吹舊糖一路變硬,變硬哂就再吹唔脹喇!
無得再吹,咪喫鬼咗佢囉,用糖做架嘛,
小小細時最鍾意喇,有得玩又有得喫。

以前吹波吹得叻,阿伯會送多一次架,而家唔知仲有無呢?

真君寶誕 (中)

點解財政大臣咁想返嚟呢樹?
你估佢真係好鍾意睇大戲咩,只係為咗呢啲之嘛!!

鹽焗雞蛋,鵪鶉蛋


燴魷魚


雞腳


香糖公仔


馬蹄,菠蘿,芒果,大根


凍魷魚


煎餃


牛雜


臭豆腐


雜餅





係咪好多懷舊嘢食呢?!除咗呢啲懷舊嘢食,仲多咗好多新款嘢,
有金菇牛肉卷,雞蛋仔,格仔餅,雞蛋大菜糕,龍鬚糖,
炸蕃薯呀,炸雞脾呀,炸芋頭呀,三寶呀,糯米飯,生滾粥...

唔得,要襯呢幾日,再去喫多幾轉先得!!

真君寶誕 (上)







真君寶誕,開始囉!
一連五日做大戲,篤篤篤...撐!撐!
(2009/04/07 - 2009/04/11,農曆三月十五)

多年前,應承財政大臣,年年都返嚟呢樹,
當然唔係為咗睇大戲,而係為咗....
但一年推一年,唔記得記時開呀,錯過咗呀,借口多多,
今年,終於返嚟喇!!!