小小的宇宙: 2008

2008年10月1日星期三

流浮山兩小時 (2008/10/01)

一早約定班蝗蟲去三聖海鮮，老遠入到去，唔差在去埋流浮山影兩張相。
但是日天氣唔多好，又多雲，個天又灰，啲相影極都唔靚．．．
財政大臣同小小輪流玩左陣D40X，就趕下場，喫海鮮去。

2008年8月31日星期日

次次游水行山無我份，考試測驗交功課溫書就排住隊咁嚟．．．
足足等左一年既下水禮，終於向暑假最尾一日舉行喇。

七人一狗，又向西貢麥當奴門口集合，再坐的士入東霸尾，再行落浪茄。
轉咁多程車仲要行大截路先到浪茄，點解都仲要去？
因為水清沙幼風景靚，有魚仔有女睇 (三點式)，幾辛苦都要去。

小小前一晚仲LUR財政大臣帶埋D40x去影相，財政大臣寧死不屈；
去到浪茄財政大臣提供有拍攝功能既手機過小小止手痕，
但大太陽之下咩心機都無哂，求其影一張交差就收檔，好在無帶D40x姐．．．

帶左D40x可能會有心機影呢？影好多三點式姐姐呢？影好多三角褲肌肉男？
下次都係帶埋D40x去，哼！！

2008年5月18日星期日

深井裕記大飯店之燒鵝有難

行完山有咩好做？又餓又倦，當然要開大餐喇。
開大餐有咩好選擇？去深井當然要喫燒鵝喇。

一坐低，就即刻叫野食
燒鵝半隻$150：皮脆肉嫩，上碟仲熱辣辣，唔太肥，正
酒釀鵝肝：普普通通，食唔出有咩特別
豉油皇炒腸雜：咩內臟都有啲，豉油皇加芽菜炒，濃味選擇
椒鹽鮮魷：香脆唔韌，香口嘢永遠搶手，轉個頭就喫哂
裕記小炒王：西芹，菜頭，腰果，帶子，鮮魷，炒埋一碟，稍為多油
腐乳通菜牛肉：好腐乳，好通菜，都係多油
上湯莧菜：普通嘢，無咩好講
瀨粉：瀨粉當然要配燒鵝．．．．汁喇，喂！！淨番兩滴燒鵝汁嚟好喎

5罐汽水，7個人，茶芥咖一，埋單$691

健行 - 荃綿坳往深井(2008/05/18)

考完試又係時候鬆一鬆，約一大班朋友，吹下水，行下山，影下相。
一行7人由荃錦坳開波，途經田夫仔，清快塘，往深井燒鵝進發。
大部份都係寬闊既石屎路，路邊又有大樹遮陰，微風輕吹，望下靚景，心情都好啲。沿途好多玉葉金花，又有菇菇，臨尾去到清快塘，有荷花添，賣冰涼汽水既士多，同23蚊碗既餐蛋麵．．．
輕輕鬆鬆，約8K，全程需時約4小時。

2008年4月27日星期日

健行 - 長山 (2008/04/27)

久休復出，搵左條短路，約4.5k，由大網仔戶外訓練營出發，登長山，繞太墩，落北潭涌，全程需時約2.5小時。

除頭段下望海景，之後全部於林中漫步，陰陰涼涼，沿途好多菌類，白色，啡色，橙色，磨菇型，傘型，各形各色；
又多蝴蝶同蜻蜓 (定係豆娘？)，仲有隻蝴蝶停左向我頂帽上面，睇嚟今日我有運行。
輕輕鬆鬆，咁又行完。

2008年3月20日星期四

秋田乳頭溫泉 - 妙乃湯

東北之旅最後一間要介紹既酒店係 - 妙乃湯。
妙乃湯既客房分：有廁所，無廁所，有景，無景。
結果小小揀左有景無廁所，14000YEN一人，再加150YEN入湯稅，包朝食同夕食。

2008年3月19日星期三

松島 - ホテル松島大観荘

去得松島，當然要睇日本三大景之一既松島景喇，

睇得景唔爭在住埋有松島海景既酒店，既然豪開唔爭放棄個普通放題晚餐，

加錢喫個〔旬魚王國〕既魚生放題。
結果一晚有海景既客房，連魚生放食題夕食同朝食，每人盛惠15330YEN。
收得咁貴，到底值唔值呢？住過你咪知囉．．．

2008年3月18日星期二

山形蔵王 - 蔵王四季のホテル

去山形蔵王睇樹冰，又想浸蔵王溫泉，又要食放題，

卒之揀左〔蔵王四季のホテル〕住一晚。

2008年3月16日星期日

山形 - ホテルセレクトイン山形駅東口

呢間位於山形既酒店有咩好，值得小小推介？
1. 5480YEN (SEMI-DOUBLE)
2. 山形駅行過去只需5分鐘
3. 免費送兩罐綠茶同兩個杯麵
4. 免費早餐有小小最鍾意既山形米同咖喱，有麵包，蘋果汁，香蕉
5. LOBBY有免費上網

見到咁多免費，係咪值得姑寒小小推介先．．．

2008年3月15日星期六

大埔海濱公園 (2008/03/15)

是日去大尾篤燒野食，聽聞大埔公園有花影，咁就早啲入去影下相，影完先BBQ。

影影下相既時候，老公大人突然同我講：我帶你去北海道吖．．．
小小個心暗喜，唔通老公大人見我影花影得咁開心，專登帶我去，等我影番夠本？
小小：吓？咩北海道呀？

老公大人：呢，咪呢度囉，有薰衣草呀
小小：

就係呢棵薰衣草．．．

．．．空歡喜

仙台 - ホテル松苑

呢間就係小小向仙台落腳既酒店，向東橫INN附近，地點易搵唔太遠。
個樣就唔太靚，但勝在平，4600YEN (SEMI-DOUBLE)，
有暖爐有雪櫃有電視有廁所有浴缸，房間乾淨，
要求唔高只求落腳，呢間實在係窮鬼小小既推介。

2008年2月25日星期一

上山市 - かみのやま温泉

因為免費又有時間，去左上山市浸免費足湯。
由山形坐JR去上山市，要向かみのやま温泉駅落車，車程只不過10分鐘左右。
去浸足湯，切記帶抹腳毛巾，真係唔記得的話，向JR駅有間便利店，都有毛巾買。

根據資料顯示，總共有5個免費既足湯，但葉山溫泉足湯偏遠，小小只去左另外四個。

左至右 (①新湯の足湯，②上山城の足湯，③湯町の足湯，④前川橋の足湯，⑤葉山温泉の足湯）

2008年2月23日星期六

愛餃子，愛宇都宮

宇都宮駅入面已經見到幾間餃子店；
宇都宮駅出面，齋數同餃子有關既招牌都有排你數，果然係餃子之城。

多數遊日光，東北等地，好大機會經過宇都宮，時間許可的話，不妨停一停，諗一諗，喫一喫呢度出名既餃子。

試左兩間：宇都宮みんみん，青源
極力推介宇都宮みんみん既燒餃子，又唔貴又好味，一人前220YEN，即叫即煎，上枱熱辣辣出哂煙，咬落去．．．唔．．．總之好味喇，試過你就知。
水餃子反而普普通通，唔試無損失。