2009年2月28日星期六

大鄉里出省 - 香港公園

向香港動植物公園正門走,穿過山頂纜車站,就去到香港公園。
香港公園無猩猩,無狒狒,無馬騮...但有個好鬼大既觀鳥園。

入面啲雀仔同人零距離,成日向頭頂飛過,企向欄杆上面擺姿勢,
大搖大擺向度行...
雀有雀喫橙喫木瓜,打雀友有打雀友燒菲林,小小都唔執輸,用隻眼打雀

用相機就免喇,費事扲住部D40X,但用AUTO MODE影



打完雀,又到睇花花草草時間
香港公園有個大溫室,分熱帶,乾燥區域,花既種類繁多,
小小睇到入哂神,唔鬼記得咗影相...



睇完溫室,用最後既腳骨力上埋鳥瞰角,吹咗陣風,影兩張相,又係時候走人

大鄉里出省 - 香港動植物公園

睇完古跡,繼續向動植物公園進發。
CEO曾經帶小小去過,但果時根本唔需要識路同記路,
只要掹住CEO衫尾就得,所以唔識路係好正常既...

由於唔識路既關係,向後門入咗公園,離遠見到爬蟲館,仲聽到噢!噢!聲
小小內心極度興奮...唔知係咪狒狒叫呢?咁即係未死?

睇完爬蟲館入面既揚子鱷,即刻搵狒狒...


撞鬼囉!!呢隻嘢就係狒狒?!!?
記憶之中明明好好身材,有巨大胸肌,幼腰,兩手撐地,走來走去架明明...
你睇下,肥得佢吖...
左手玩繩,右手喫生果,個肚腩大過籮,個胸大過菠蘿...唉...


睇完隻肥嘢,仲有黑猩猩,浣熊...唔記得名既好多雀仔,雞,鶴...
小小同財政大臣好似小學生咁,四圍走四圍裝,睇得真係好鬼開心...

話明動植物公園,睇完動物就睇植物


睇完植物,再向下一目標進發 - 香港公園

大鄉里出省 - 過海睇古跡

小小有日無情情問財政大臣:有無去過動植物公園?
財政大臣:有呀
小小:入面係咪有狒狒架?我記得細細個果陣睇過架
財政大臣:嘩,老年前架喎,死鬼咗喇卦...
小小:吓?真架?
財政大臣:咁下次返學日,就去動植物公園影相喇,睇下狒狒仲响唔响度。


北京王府水餃喫飽飽,就出發去動植物公園
唔熟過海路,又無帶地圖之下兩手FING FING吓,竟然途經呢條石板街?!
即刻開機習習聲影相...




影完石板街,繼續兩手FING FING吓,FING到一個轉角位。
小小又問白痴問題:1913係年份定路牌?
財政大臣:斷估都係年份喇...


過完一條又一條既馬路,唔知轉左定轉右,
又見到另一個成日响電視見到既場景 - 都爹利街。
見到煤氣路燈,又想唱歌:煤氣燈不禁影照街裡一對蚯蚓照過以倆心相親一對小情人...



無帶地圖,無搵過位置,但FING FING吓下見到一個又一個景點
財政大臣,你點解識路架?見到指示牌?係咪成日嚟架?定係靜雞雞瘟女?
呢啲問題,對路痴小小嚟講,簡直係個謎...

2009年2月22日星期日

健行 - 鹿頸往烏蛟騰,新娘潭(2009/02/22)

有人撩行山,心癢癢身痕痕,又想偷懶唔做功課唔溫書,
即刻乘機話要鬆一鬆,掹財政大臣衫尾去玩。

粉嶺火車站集合,再轉56K小巴往鹿頸。
經紅樹林,遠眺深圳,上小山坡,經啟才學校,落山,到烏蛟騰,全程約2.5小時

到烏蛟騰,時間尚早,再去埋新娘潭影照鏡潭
先走。

是日活動看似完結,其實先係戲肉既開始...


2009年2月14日星期六

又嚟...丼



又嚟整刺身丼...
牡丹蝦終於喫哂喇!
2L帶子終於喫哂喇!!
皇帝蟹棒都終於喫哂喇!!

個雪櫃終於有番啲吉位,可以放吓燒賣,凍肉,雞翼,粟米喇...