向長隆出發！！香江野生動物園篇

尋日由朝玩到晚，番到酒店沖個靚涼即刻訓覺，準備今日又玩個夠。
一早起身，响酒店喫早餐自助餐，喫飽CHECK-OUT又出發。

由酒店坐的士去動物園北門RMB20，去到見小火車就開，即刻坐喇！！
全程大約個鐘，坐住車睇自駕區睇動物。
長頸鹿，斑馬，牛，鹿，雀，向車隔離四圍行；
獅子，老虎就隔條河；
總之成程車都好唔得閒，望得左又望唔切右，好多好多動物，
好鬼好睇．．．．

坐完小火車，當然自己落地行動物園其他展覽區。
有長頸鹿，大象，犀牛，河馬，熊貓，熊，袋鼠，樹熊．．．
仲有大象劇場，白虎，獅子表演。

睇下坐下抖下，由10:00玩到16:00，行到雙腳無力斷咁滯，
卒之捨得走喇．．．

向長隆出發！！水上樂園篇

向長隆出發！！水上樂園篇

由廣州東站，坐公車(RMB3)，大約30分鐘就到香江大酒店。
即刻check-in，換衫，向酒店對面喫個早飯，然後向水上樂園出發。
坐的士由香江大酒店去水上樂園，跳標價約RMB16，唔跳標價約RMB20。

由於未到游水旺季，入場有半價優惠，5/31前只需RMB90！！
可能大陸假期關係，12:00入場已經好多人。

排隊玩大喇叭，排連玩一個鐘。
大喇叭好似好勁，但無想像中咁離心咁刺激。

呢個咩咩競賽，又係好似好刺激，扒住張蓆SIR落嚟，
點知SIR唔夠一陣，用手抹吓個面啲水，就到終點．．．
吓？咁就完喇？！

呢個合家歡，排得耐，睇人玩到叫哂，點知又係．．．

呢個噴水咩咩，睇落唔刺激，但原來又幾好玩喎！！

本來諗住租大水泡，到最尾玩埋造浪池先走，點知，排下排下，
玩下玩下，咁又四點，要趕下場，無租水泡就走人。

成頭濕淋淋，個身滴住水，坐白牌番酒店沖個靚涼，
又過酒店對面景福宮喫餐晚飯，然後出發睇馬戲。
馬戲19:30開場，一行六人18:30左右就去到，霸個靚位等睇戲。

成場馬戲大約個半鐘，無悶場，抵睇又好睇，全部都好精彩，
小小好多時睇到掩住個咀，驚自己隨時尖叫！！
但真係要比較的話，跳彈床個段比較無咁好睇．．．

睇完大馬戲，諗住過長隆酒店搵白虎餐廳個宵夜自助餐喫。
入到長隆酒店，簡直totally lost呀！！
間酒店又靚，又大，又多出口，又多分叉路。
兜兜轉轉下，終於到左白虎餐廳．．．原來是日無宵夜自助餐！！！！！
!@#$%原來只得假期先有，咩係假期？即係五一十一端午重陽中秋果啲！！

無宵夜自助餐，唯有打道回府，又返酒店對面開餐。

向長隆出發！！火車篇

以上所有照片來自長隆官方網站

向長隆出發！！火車篇

約咗幾年既長隆之旅，因打風，落雨，考試測試，無限期拖延，
今年，終於可以出發喇！！

為咗慳車錢，唔坐香港直通火車，改由深圳坐火車去廣州(RMB75)，
再轉巴士(RMB3)。
記憶長時間停留向好耐以前，小小成日形住大陸火車又殘又舊又污糟．．．
但坐完之後，小小要UPDATED下啲老年記憶喇。

拎住張車飛，諗住入閘等車，以為好似香港地鐵單程飛咁，食張飛入機，
以後開閘，原來唔係架！！
將車飛放响閘機上面，好似八達通咁嘟一嘟，就入閘，好利害呀！！

上到月台四圍睇睇，月台雖然唔係好靚，仲有啲爛磚，
但有穿著整潔既，咀角笑淫淫既小姐望住你微笑，
快啲同人揮吓手先上車喇

一上車先發覺．．．好乾淨，好靚呀！！好似坐JR咁呀！！

車箱頭仲有電子報告板，報告車內車外氣溫，行車速度，
仲有推車小姐，推住啲三明治呀，飲品咁。

坐火車坐得咁鬼開心，真係值得開一篇卜，齋講坐火車呀！！

行山 - 青衣自然徑(2009/05/03)

一睇呢幅相就知道小小去邊度玩嚟。
話行話行，隔咗半年先去到呢度行，原因得一個字，懶。

由青衣機鐵站，或者長安巴士總站，有巴士或小巴去長宏村；
另一個入口向青華苑附近。

是日5條友仔，最快最方便當然坐的士去。
一去到向入口影幾幅相就開波。

呢條自然徑，舖好哂石屎樓梯，又多路牌，每日都應該好多人晨運，
路經幾個觀景台，又有涼亭，又有櫈；
再入啲仲有兩個自己潛建既千秋，自己潛建既引體上升木，
最誇張既係連公司用既碌碌櫈都帶埋上嚟．．．
唔少得仲有大量垃圾，膠水樽，膠袋．．．

行自然徑想投入大自然，撞鬼你咩，帶咁多垃圾上山。

呻完一輪，繼續行，終於見到今日既主角 - 青馬大橋。

再繼續行，換個角度又影。

御用男Model又出場

小小唔算環保份子，有時都會浪費水呀，電呀，用膠袋呀，用發泡膠嘢，
但為咗繼續有綠色既未來，有時做到既都盡量做，唔食魚翅，廢紙回收，
最少去行山會帶走自己既垃圾．．．

有時好唔明，點解啲人可以去到老蓮咁遠行山，都會亂拋垃圾，
膠袋，報紙，煙頭，薯片袋，水樽，衣物柔順劑樽．．．咩都有。

家陣行山做咩帶膠袋姐？止嘔呀？一路行山一路睇報紙呀？
行山喫咩薯片姐？衣物柔順劑？上山洗衫呀？

頂！老蓮咁遠無人掃架。鬼唔望呢啲人俾人罰，日日要上山執垃圾！！