2009年12月26日星期六

健行 - 川龍往河背水塘(2009/12/26)

今年拆禮物日嚟個健康既活動 -- 行山。

天都未光就起身出門口,向荃灣兆和街坐小巴去川龍,
飲個豐富既早茶,先開波行山。

第一輪有鳳爪,牛肉,蝦餃,春蛋燒賣,蘿蔔糕,春卷,炸兩,咸水角,鳳爪排骨飯。




第二輪有燒賣,煎餃,煎腸粉,鴨腳札,煎茄子青椒,豆腐花同大包。


5個大食積,一早喫咗$20x,搓住個肥腩向河背進發。
經過研習徑,穿過營地,去到分叉口,左去深井,右去河背。


不斷不斷咁落山,終於離遠見到河背水塘。


河背水塘出口有個有機農場,喫碗豆腐花,買條有機菜呀,湯包呀,
咁又一日。

2009年12月24日星期四

聖誕大餐

平安夜出街喫飯,又貴又要等位。
幸好姑寒小小老年前已同財政大臣講好,大時大節去喫快餐或者飯堂,
唔使放血唔使等位!!你好我好荷包最好!!!

呢期存倉興凍肉,呢啲日子最適宜拎舊西冷出嚟整〔大餐〕。



煎塊西冷,配舊薯餅,再搭條菜,加埋碗金寶湯,
一碟又浪漫又好味又慳水慳力又唔使放血唔使迫人唔使等位既聖誕大餐登場喇!!



幾咁〔浪漫〕咁用埋超市特價廣告報紙舖枱鋸扒,
喫大餐,使鬼出街同人迫餐c~~

2009年12月20日星期日

酥皮餐

備戰考試咁耐,就無扮嘢 (大廚) 咁耐

家陣考完試無世藝,仲唔拿拿聲向籠底攞番個焗櫨出嚟玩番夠本?!

買咗急凍酥皮,一盒4塊$42.9,用1/3塊整咗兩件煙肉角。



用2/3塊卷咗2舊腸仔,2舊煙肉腸仔,用1/2塊整芝士腸仔角,
整咗成個酥皮拼盤出嚟!!


點解啲餡來來去去都係煙肉同腸仔?因為雪櫃存倉嘛!!
4條煙肉2條豬肉腸,整咁多combination,仲想點?!

用多半塊整兩碗酥皮英倫周打湯....


2塊酥皮,玩咗2個鐘同一個晚餐,呢均仲唔好玩好喫過出奇蛋?

2009年11月28日星期六

安格斯大餐

雪櫃倉存終於清得七七八八,又係時候拆資入貨


是日拆資幾百大元,入咗安格斯西冷,安格斯肉眼,牛仔骨,金沙骨,羊骨扒,煙腩片,豬肉腸,雞翼。
買果幾款嘢就幾舊水,最貴就係安格斯西冷同肉眼。
人一世物一世,姑寒小小為咗食,肉痛一次就一次喇!

有新嘢,貪新鮮小小當然煮新嘢喇!!返歸拿拿聲開工。


返歸驚死溶唔切雪,又用古法極速解凍,
唔拆真空袋,成舊扒放上平底鑊,利用大面積金屬加速件扒解凍,
個零鐘就將件成寸厚既扒溶哂雪!!
呢個方法,係小小偷懶之下發現。

話說小小有次偷懶,想洗少隻溶雪碟,係咁易洗下隻起哂冰既雞翼,
就直接放上平底鑊,諗住溶完雪就即刻開火煎,

就係咁,就發現咗用平底鑊溶雪快靚正!!




件安格斯扒咁鬼貴,當然唔敢搏亂咁煎,即刻上網搵高手教路;
上堂唔見咁好記性,但又記得銀大人分享過煎扒方法。


使用易潔平底鑊 牛扒置室溫半小時
將抽油煙機開至最強,關廚房門
以大火預熱平底鑊連煮食油至少3分鐘(電爐至少10分鐘),同時牛扒以海鹽及黑胡椒調味
當平底鑊燒至很熱時,輕力地將牛扒落鑊,帶脂肪的一邊朝向牆,以免油脂彈到身上,煎2分鐘,期間不要移動牛扒
反面,同時加入牛油,以鐵匙搯起肉汁和油淋於牛扒上,同樣煎2分鐘即成medium rare的效果
上碟,置於溫暖處2分鐘讓牛扒鬆弛及收回肉汁,最後以黃芥末及薯角伴食

但係背啲又唔背啲喎,銀大人明明講每面煎2分鐘,小小又記錯3分鐘,
好在煎煎下時,又突然記起,變咗2分半鐘....

結果medium rare變成medium囉!!

兩件外脆內嫩既安格斯西冷同肉眼,咁就上碟。


咁多肉,當然要搭條菜喇!
又係偷懶西蘭花,恰熟圍碟,
用煎完扒既肉汁同牛油煮埋蒜粒同青口 (即係無洗鑊囉!
),
放埋又扮一碟餸,開飯。


兩塊扒共$120,財政大臣,糧倉已清空,麻煩由即日起每餐轉食白飯青菜,直至另行通知。

2010日本東北追祭之旅 - 妄想加入行程 (6) - Encore 八食センター嗎?

上次為咗八食センター,專程由仙台坐JR去八戸。
烏賊,大貝,大蝦,大蠔...又鮮又甜又抵,真係諗起都留口水


就起諗起都留口水,財政大臣要求今次東北之旅要番兜,
計過度過,若果番兜八食センター,就去唔到種差海岸
去咗種差海岸,又去唔到陸奥湊朝市,去陸奥湊朝市又去唔到八食センター喎!!
簡直係個因貪心而引起既INFINITE LOOP呀...

小小新C坑,貪新鮮,最鍾意玩新嘢試新嘢,但又好鬼為食喎!
到底番兜去八食センター?定種差海岸?定陸奥湊朝市

要食就無得坃,要玩又無得食喎!!嘩!好苦惱呀!!

天呀!俾多幾日假期我呀!!跌啲錢落嚟俾我呀!!

2009年11月27日星期五

2010日本東北追祭之旅 - 妄想加入行程 (5) - 激安の殿堂



以為發現新大陸,點知係舊到唔恨既嘢
- ドン・キホーテ 激安の殿堂。

白痴仔小小,揭親旅遊書,淨係睇食嘢玩嘢睇嘢,
完完全全跳哂啲 "濕平" 既頁數;

上網搵料又只係識得搵食嘢食嘢同食嘢,最多醒少少搵埋COUPON...

呢期真係白痴到唔恨,唔知樁咗去邊條LINK,見到人地好開心咁 "濕平" ,
又話開到好夜,好多嘢賣,又平又靚又係正貨,
諗住抄低啲資料,返屋企同財政大臣炫耀吓
,扮吓叻仔架嘛!!

點知抄完個日文名 〔ドン・キホーテ〕,
望吓跟手個漢字〔激安の殿堂〕,
咁熟口熟面既?!
炫耀前,梗係要返歸摷吓天書先,
點知真係,老年前既天書,已經成日介紹呢間嘢,
小小去幾次,經過唔同門市,仲要次次過門而不入添!!
而家以為發現新大陸?!


好在扮醒前再次核實姐,陣間扮叻仔唔成,俾財政大臣笑到面黃點算?!

2009年11月24日星期二

再來...蔥油餅



適逢大少突然蒲頭,有白老鼠出現,唔服氣小小今日再嚟!!
再戰...蔥油餅!!

今次油多咗,煎耐咗,香口咗,最緊要係個樣靚仔咗!!
個樣靚咗,唔再用飯盒裝,拿拿聲搵全屋最見得人既碟嚟裝,
正所謂輸人不輸陣,唔食得都睇得....

話時話,聞說大少上次喫咗件隔夜蔥油餅痾左次,
今日要教波既大少,喫咗件新鮮熱辣既蔥油餅,
教波既時候,唔知會唔會....呢