2009年6月13日星期六

我又嚟喇!深圳



上次行咗IKEA,諗住今均上去深圳行B&Q。
又係坐車去到落馬洲,再轉地鐵去世界之窗,再轉免費車,話咁快就去到。


可能已經裝修完,硬係覺得B&Q無咩啱使,
行行吓FING咗去隔離既生活本色睇家居用品,去廸卡濃睇運動用品。


竟然向生活本色買左個美亞平底鑊玻璃蓋 =__=||| 。
唔係前世未托過,但實在平太多,向香港永安賣緊$90,
深圳只係賣RMB38,唔買對唔住自己喇...

FING去隔離廸卡濃,廸卡濃賣運動衫,用品,鍾意戶外運動,
簡直睇到唔捨得走,好多運動衫褲鞋襪,
單車,游水,足球,籃球,高球,行山,瑜伽,咩鬼都有...
一行五人,個個都有斬獲


行完之後再去隔離IKEA,今次做足準備,格哂價先上嚟,
一入去就目標為本,喫個下午茶,就掃貨,狂買焗爐碟,最少平十蚊

買哂嘢,當然又到每次北上既主菜,喫好嘢喇!!
本來諗住去D21,但二等兵報料壞冷氣,即刻轉地點


死諗爛諗,就去四海一家
喫自助餐。
之前已聽聞四海一家好鬼大,親身去過,就知所言非虛




點大法?成場分幾個區域,迴轉壽司,海鮮,巴西燒烤,蒸海鮮,
避風塘小炒,韓國泡菜,鮑羅萬有,沙律,甜品,雪糕,生果,花茶...

路癡小小頭幾次拎嘢食,拎完之後唔識路返埋位
路癡唔緊要,呢樹照顧周到,枱面張餐紙係一張地圖

小小拎完第一轉嘢食,一路喫一路睇地圖,
睇下陣間去邊拎嘢食,拎完嘢食點返埋位


周五至周日,晚餐RMB178無加一,當月星座生日有8折

入場送兩張券,可以換領鮑魚湯一客同哈根打雪糕一客,
其他全部任喫


最受歡迎有酥皮魚翅湯,燒蠔,晚餐限定燒鵝肝,燒魷魚,
燒全羊,燒牛肉,各式蒸海鮮,鮑羅萬有區入面,
有鱷魚湯,蛇碌...





七隻蝗蟲,由18:30喫到21:30,個個捧住個肚出門口

呢個月,睇嚟要喫多啲麥皮,降下膽固醇同脂肪先得囉...

2009年6月6日星期六

繼續玩...焗爐

買咗新玩具,當然搏命玩,玩到厭為止。

尋晚放學吹水問二等兵,用焗爐整咩好,二等兵:焗薯吖!!
小小是日即刻身痕,响超市買一包$9.9美國焗薯,返歸開波。

一包$9.9美國焗薯有四個,揀兩個出嚟做焗薯,剩番兩個攪攪震。

第一攪攪震:芝士煙肉薯條
1. 洗淨薯仔,唔批皮,切條
2. 用油撈撈薯條,平均放上焗盤,用200-250焗十幾分鐘
3. 反一反,再焗十幾分鐘
4. 薯條熟哂後,放入焗爐用碟,加芝士煙肉,再焗到芝士溶
5. 攪掂,襯熱喫



第二攪攪震:低油低鹽薯條
1. 洗淨薯仔,唔批皮,切條
2. 用少少油撈撈薯條,平均放上焗盤,用200-250焗十幾分鐘
3. 反一反,再焗十幾分鐘
4. 薯條熟哂後,落少少低鈉鹽
5. 攪掂,又係襯熱喫



第三攪攪震:咸牛肉芝士焗薯
1. 洗淨薯仔,搽油搽鹽落薯仔面
2. 用錫紙包實成個薯仔,200-250焗廿分鐘

3. 反一反,再焗廿分鐘
4. 用叉吉下薯仔,試吓熟未,熟透應該好易吉得入
5. 取出焗薯,向中間界開,搽牛油,塞咸牛肉,塞芝士
6. 再焗5-10分鐘
7. 攪掂,都係襯熱喫



無事搵事做之作:蒜蓉法包
1. 早兩日喫剩啲蒜蓉,用橄欖油撈撈佢,搽上法包
2. 襯焗薯需時咁耐,偷上火焗埋蒜蓉法包

3. 唔知焗幾耐,見法包變脆即刻拎出嚟喫


驚死唔夠飽之作:芝士咸牛肉粟米意粉
1. 炒好意粉底,放上咸牛肉粟米芝士,又隊入焗爐焗10分鐘
2. 諗住唔夠飽用嚟打底...點知...
實在太飽,一啖都喫唔落,碟意粉要留番聽日做午餐

2009年6月4日星期四

Marriott Cafe

又到一年一度,小小大哂既日子,
財政大臣又要破財,帶小小出街喫餐好


Marriott cafe,賣點係海鮮自助餐,17:45就到,坐底等夠鐘18:00即刻開餐。



18:00,即刻開波,搶攻龍蝦仔,加菲蟹...
話就話搶攻,但根本唔使搶
,因為咁早無咩幾個人,
啲海鮮長出長有,無人同你爭


龍蝦仔開哂邊,一叉落去就喫得,啖啖肉,唔使剝殼,
喫都喫得特別開心
!!
生蠔細隻,但味道ok,可以喫多兩隻補番數。


加菲蟹,味道無得頂,糕香肉甜,encore多幾轉都仲得

凍蝦就普普通通喇,喫完隻咁甜既加菲蟹,凍蝦始終失色啲。
青口唔掂,唔知係咪千揀萬揀,揀咗隻爛燈棧,又鯹又唔好食



搶攻完一輪海鮮冷盤,試下熱盤先。
奶油菠菜,咕嚕肉,泰式炒豆苗,雜菜花膠,燒牛肉,咖喱羊,冬瓜...
樣樣都ok,


試完冷盤,熱盤,當然仲有甜品喇!!
蘋果撻,芝士餅,提拉米蘇,開心果餅,朱古力慕絲,朱古力軟心蛋糕,
草莓千層餅,芝士低脂低糖餅,除咗朱古力苦到酸之外,其他都唔錯



仲有雪糕,生果...


喫到飽哂,埋單後出去影相,仲有咁多隻龍蝦仔,加菲蟹咁,
邊使爭邊使搶?!大把你喫呀



埋單每人$390加一,多謝財政大臣