[Day 11] 10 AUG 2010 (上野 > 香港)
[早餐]：ホテル レインボー
酒店包輕朝食，有麵包方包咖啡橙汁果啲。
酒店好近京成上野，啱哂最後一日坐京成上野走佬！
除咗青森果朝落過雨，今日係旅程第二次落雨，
check-out時，將兩盒急凍牛舌寄存向front desk個雪櫃，
仲有兩件大行李寄埋向樹，front desk都無托手掙，
仲提我地出面落雨，問我地有無帶遮，真係細心！
最後一日，又係指定動作，去アメ横買手信。
點知太早喇，10:00，間間舖都未開，得上野アメ横 二木の菓子剛開，成條街靜蠅蠅，唯獨有間就開既舖前面排哂長龍，就出動埋龍尾指示牌，
呢間就係彈珠機舖，啲日本人真係好鍾意打彈珠機，
今日係平日，都晨早就有人幫襯，仲要排哂隊，好似唔使做咁。
咁多舖頭未開，唯有食多餐早餐喇。
[Brunch]：まぐろ市場
10:30 本來想去Pepper lunch喫個鐵板牛先走架嘛，
但係去到御徒町駅個位，又搵唔到，唔係咁樣衰呀，又執鬼咗．．．．
都話要做資料搜集架喇，一扮醒靠記憶唔搵資料，
間間都執鬼咗，無得食，樣衰到吖
咁去橋底間まぐろ市場，好在未執。仲有好在味道都同兩年前一樣。
喫完啲舖開門喇，望下以前幫襯開既舖仔，啲貨同二木の菓子差唔多，
但size就細啲，咁幫襯二木の菓子喇，大件啲。
其實嚟過アメ横幾次，次次都過門而不入咁無去過二木の菓子，
亦都唔知二木の菓子既位置，因為今次早嚟，得二木の菓子一間開，
先發現到佢，佢個門口細細咁，點知入面鬼咁大，仲分開兩邊舖，
下次可以淨去呢樹，已經可以一次過買哂小小最鍾意喫既花生豆豆，
同埋芥末魷魚脆脆。
買哂手信，行哂街，無嘢做，咁不如早啲去機場行喇。
12:47 - 14:08 京成上野 > 成田空港 (1000円 x 2)咁鬼得閒，當然坐最平果班車喇，慳番啲指定席錢嚟開餐。
[午/晚餐]：京成友膳
15:00 次次向成田空港走都唔知點解去南天星喫，今次唔再去喇，
要喫第二樣嘢。 (其實想喫南天星無得喫，因為後來發現執咗)
行哂成個機場，搵咗間京成友膳，因為睇中咗佢個鰻魚飯。
點咗鰻魚定食 (1480円)，天婦羅定食 (1380円)，唔太貴，味道又ok。
16:00 其實唔係肚餓架，朝早喫咗兩次早餐，一個鐘頭前先喫咗個唔知算午餐定晚餐，真係唔係餓架，只係唔向呢樹喫，返到香港無得喫架喇。
喫咩？咪就係呢個玉桂包包囉 (310円)。
本來諗住帶上飛機喫，但實在忍唔住喇，等咗10分鐘即焗起，
熱辣辣，香噴噴，甜甜既玉桂香味向個外賣紙袋度湧出嚟，
唔即刻食，等凍咗先喫就無咁好味架喇．．．．
唔．．．好香甜，好鬆，好熱，鍾意喫格仔餅既都應該走唔甩鍾意呢個玉桂包包，點解香港無得賣架．．．又要下次嚟先有得食。
入到禁區，行埋商店，買埋最後既手信，又夠鐘上機返香港喇。
再見喇，日本，希望好快會再嚟喇！
[是日消費]
早餐：1810YEN (まぐろ市場)
午餐：2860YEN (京成友膳)
下午茶：310YEN(McDonald)
交通：2,000YEN
－－－－－－－－－－
總共：6,980YEN
註：
- 成田空港禁區外多好多嘢食同商店，有時間就向出面食完行完先再入禁區再食再行
- 禁區內有間商店有賣よーじや Yojiya啲產品，買咗條沖涼巾幾好用
沒有留言 :
發佈留言