[Day 10] 09 AUG 2010 (仙台 > 宇都宮 > 秋葉原 > 舞浜 > 上野)
[早餐]：ホテル グリーンウエル
酒店包輕朝食，無飯糰，有麵包烚蛋方包咖啡果啲。
其實仙台呢間酒店向正仙台朝市果樹，有心去睇鮮肉蔬果呢啲師奶嘢，住呢間酒店真係perfect架。
但今日要離開仙台落番東京果邊，推住個喼邊走邊望咁，唔睇到啲咩，
下次喇，下次再嚟好大可能住番呢間酒店，到時先慢慢睇，
總有機會喎！
09:44 - 11:05 仙台 > 宇都宮
又落宇都宮，唔使問阿貴都知道去喫財政大臣最鍾意既餃子喇。
小小呢均又懶醒，恃住上次嚟過，隔咗兩年都仲記得間宇都宮みんみん位置，咪唔搵資料囉，．．．．咁就賴嘢喇
去到宇都宮駅，出咗閘好似有啲唔同咗樣，
落咗一層，唔見咗間餃子店既？！
財政大臣同小小都明明記得向呢個位架，點解變咗個商場架？！
係咪出錯東南西北口？行埋另一邊都無喎．．．．
睇嚟，應該係大裝修過，地下兩間餃子店都無咗，但1/F變咗有餃子小町喎，
咁就去餃子小町入面開餐喇，唔喫宇都宮みんみん都可以喫其他既姐。
餃子町入面有幾間餃子店，揀咗宇都宮餃子館。
[午餐]：宇都宮餃子館
11:20 幾廿款餃子，唔知喫咩好？咁就兩份 12種盛合喇 (800円 x 2)，唔使煩又咩都有，最啱呢兩條貪心既戊利。
12種餃子有健太，咩咩健太，舞咩咩，咩咩鮮肉，激辛，咩咩椎茸，舞茸．．．．咁多咩咩即係咩咩？都話小小唔識日文，鬼知果啲咩咩係咩咩咩！
味道都ok好架，但硬係覺得宇都宮みんみん應該會好味啲，
但好可能去喫番宇都宮みんみん，又可能會覺得上次好味啲，
好似成日覺得細個喫果啲碗仔魚肉呀，雞蛋大菜糕呀好味啲咁，
始終印象中既嘢係最好味，再食又係另一回事。
12:31 - 13:18 宇都宮 > 上野
又係去酒店check-in完放低行李又出去喇。
[下午茶]：松屋
14:00 次次日本之旅都會喫松屋，今次去到行程尾二果日都仲未喫，
咁啱酒店對面馬路就有一間，啱啱遇著剛剛，就去喫番餐喇。
燒豚肉定食，牛肉丼定食 (1040円)。
喫飽，就去秋葉原。唔知係咪上次既金融海嘯，定係其他原因，
上兩次嚟都仲有好多嘢睇，玩具呀，game碟呀，咸碟呀，模型咁，
但今次有好多小舖都唔見咗，財政大臣兩手空空去兩手空空番，
有啲失望。
去完秋葉原，指定動作又要去舞浜獻金。
小小雖然姑寒，但去親廸廸尼掃貨，真係見到有唐老鴨嘢都買咁滯，
毛巾呀，底橫呀，匙扣呀咁咩都啱，
但今均樣樣都熟口熟面，上兩年既貨，換咗條唔同顏色既繩又扮新貨，
同一款毛巾，底色轉咗又份新貨，匙扣換咗舊毛毛變咗個噹噹又係新貨，
咁呃秤真係買唔落手，結果只係買左兩樣嘢就走人。
財政大臣聽朋友講話中野都有嘢睇，雖小小唔知果樹有咩睇，
恃住有東日本PASS，用埋今日唔好嘥，就去望吓喇。
因為無做過東京既資料搜集，完全唔知中野北口出先有玩具漫畫果啲，
結果烚烚吓，fingfing吓，撞來撞去都搵唔到，唯有撤退喇。
撤退無嘢好做，又唔知晚餐喫咩，咁不如去番新宿，
上去100円店shopping，shop完先再諗喇。
shop完都唔知喫咩好，結果去咗幾年前喫過既博多天神喫拉麵。
[晚餐]：博多天神 一番街通り店
叉燒拉麵，味噌拉麵 (1400円)
頭先講過，印象中既宇都宮みんみん好好似好味啲，
再食博多天神又係同一感覺，又係以前既博多天神好味啲，
同山形果日既山之助比，更加係山之助好味好多。
下次再嚟新宿諗唔到喫咩，財政大臣千要提小小，唔好再嚟博多天神。
[住邊]：ホテル レインボー
次次去上野都係住ホテルサードニクス上野，本來今次都唔外架，
但去到出發前大約兩星期，搵到另一間大啲平啲又近啲，咁咪試吓囉。
睇佢個外表殘殘地，front desk仲向3/F，以為唔多掂，但實質又ok喎。
房夠大，分兩邊，一邊係床一邊係櫈同茶几仔，窗都有兩邊，
最正係廁所有浴室分開，沿室仲有分浴缸同擦背位，仲有埋即棄海綿添，
唔計佢舊的話，都住得過架。
[是日消費]早餐：0YEN
午餐：1600YEN (宇都宮餃子)
下午茶：1040YEN(松屋)
晚餐：1400YEN (博多天神)
住宿：7,800YEN
－－－－－－－－－－
總共：11,840YEN
註：
- 宇都宮駅入面既宇都宮みんみん執咗，唔好信自己，千萬要做資料搜集
- 下次可以唔去秋葉原，試吓睇中野
- 唔再去博多天神
沒有留言 :
發佈留言