[Day 7] 06 AUG 2010 (秋田 > 田沢湖 > 仙台 - 仙台七夕まつり)
[早餐]：星巴克 Starbucks
唔好講笑，Starbucks 進駐咗香港咁耐，都未試過去喫早餐，竟然去到日本喫咗第一次既Starbucks早餐。
無計喇，經尋晚一役，小小怕LOTTERIA 個早餐都似兒童餐，無謂冒險喇，
唔冒險，呢頭睇嚟睇去得Starbucks，唔喫佢仲喫邊個？！ (但入番秋田駅先發覺原來入面有cafe有早餐 =__=) 1560円
除咗睇祭之外，今日既行程亦係小小最期待既一日，就係去田沢湖踩單車。
10:04 - 11:02 秋田 > 田沢湖
去到田沢湖駅，即刻衝出門口睇睇得兩個既大locker有無人用。
天呀！兩個locker都有人用！咁隻27吋喼點算？
財政大臣當機立斷咁，衝番入案內所，諗住問仲有邊度有locker，
點知案內所小姐問我地幾點番嚟，佢可以接收我地隻大喼，但閂門之前要拎番走佢地，當然無問題喇！
Lucky！預咗既locker錢都慳番！
11:30 - 11:42 田沢湖駅 > 田沢湖畔 (巴士 350円 x 2)
預咗成個下午响樹踩單車環湖一周，他他條條咁fing去搵單車租喇。
本來以為呢啲咁大太陽既天氣，啲人都應該去哂游水，無人會租單車，
點知有對由台灣嚟既母子，都租單車踩喎。
揀咗1200円，五小時以內，三段至五段變速單車。
五個鐘慢慢踩，20k，咩都踩完喇！
其實有兩個鐘租，但預咗半日時間响，無謂咁趕嘛。
12:00 開始租，17:00 前還車就得，老闆仲借咗張過膠地圖我地，
教我地順時針踩，大約5k之後會 up down up down咁，叫我地踩另一條分岔路。
OK，明哂！出發！！！
未出發之前，係咪有個疑問呢？早兩日小小先唔夠高踩人哋弘前既無料單車，點解呢樹又夠高踩到呢？小小對腳突然長咗？
咪癲喇，啲女星就話胸部可以一夜之間N度發育，未聽過腳都可以喎。
弘前果啲係無變速，無款揀，唯一一款既淑女車，張櫈較到最低都唔低。
呢樹就唔同喇！人地專門租單車嘛，有變速，有大有細，有高有矮喇！
啲變速車，張櫈可以較到好低好低，啱哂短腳小小，唔啱我又點會俾錢租喎。
好喇，研究完N度發育問題，出發囉！！
小小只係試過响單車公園呀，單車徑踩單車，未試過踩出馬路。
第一次响馬路上面踩單車，就响田沢湖呢樹發生，
呢度無單車徑，人行，車載，定踩單車，全部响哂馬路。
向單車徑撞極都係路牌呀，單車呀，頂多咪損手爛腳，
踩出馬路，撞起上嚟就係私家車，分分鐘命都無架！！
其實初初都好驚架，但發覺最高車速大約30 - 40，啲私家車同大巴仲驚過你，
老遠見到你已經切過對面線避你，只要控制好架車，唔好fing左fing右就OK喇！
踩咗一陣，已經見到好靚既風景，有山有水有花有草，熱愛呢類環境既小小同財政大臣，唔理頭頂個大太陽，不斷咁上車落車燒菲林。坐一週線巴士無可能滿足到呢兩條戊利。
踩踩吓，有個熟口熟面既字出現 - 潟分校。咁多時間，就叫財政大臣轉入去睇。
一入去，自動自覺奉上 400円 (200円 x 2)見学料金作維持管理費。
準備四圍參觀之際，唯一一個既管理員小姐，奉上兩杯冰凍既麥茶同兩塊米菓，
邀請我地入去課室坐坐抖抖。
咁熱咁曬既環境下，去參觀順道遮吓蔭已經覺得好開心，胖胖既管理員小姐仲請我地飲冰凍既麥茶，果刻真係好驚喜。
坐响呢啲矮矮細細既木枱木櫈，飲住杯冰凍既麥茶，窗外綠油油既樹景，
一陣又一陣既微風．．．唔．．．．我好鍾意呢度！！
行吓摸吓坐吓，竟然向呢咁細既學校逗留咗兩個鐘！！
喂！仲要趕下場架，20k先踩咗大約5k，仲有15k呀！
騎上戰車，向辰子像出發。
出番村，即刻發覺單車店老闆教我地踩既分岔路就向對面，
小小係聽教聽話既小朋友，當然跟指示做喇，
我唔想踩果啲up up down down既路，一up 就要落車推架喇。
呢條路，風景係唔錯，但樹蔭下，好多飛蚊飛蟲圍住個頭，
不停咁向耳邊嗡嗡聲，財政大臣最怕呢嘢，踩快兩步避開啲小昆蟲，
小小呢個白痴，一路踩一路fing頭，諗住避開啲蟲仔，唔記得咗自己踩車技術幾咁掂檔，顧住fing頭，搞到爭啲炒車，好在財政大臣踩快咗睇唔到，否則有排俾人笑。
話咁快就踩到去浮木神社，一堆遊人堆住辰子像，兩條戊利唔趕時間，影完浮木神社先過去影辰子像。點知一堆人走咗，又有一架旅遊車到，另一堆遊人又補上，沒完沒了。戊利卒之忍唔住，唔理水位高漲，行落湖邊浸哂水既岸邊小路去燒菲林，唔使同馬路上既遊人迫。
嘩！爽呀！湖水好冰涼，啲又肥又脹又熱既腳趾仔即刻舒服哂！！
影完辰子像，再向御座の石出發。
踩單車中途見到山水位，同行山果陣見到山水位一樣，
用凍到手指都彊埋既水，沖吓啲曬到發滾既手手腳腳，果種爽法，大熱天時行過山既人就知道。
途中再嚟見到個山水位，呢個水位較高，水量仲勁，
財政大臣咩都唔理，塞個頭埋去沖，一路叫：爽呀！
由頭濕到落腳，一路踩車一路滴水，再向蓬萊の松進發。
影埋蓬萊の松蓬來之松，今日既單車環湖終於完成喇。
[午餐/晚餐]：伊達の牛たん
12:00踩單車，16:30還車，期間唔覺肚餓，還完車諗住响田沢湖畔間手信店入面喫少少嘢，點知食店營業時間至16:30，結果無得食。
無得食就買吓手信，分散吓注意力。
坐巴士番田沢湖駅 (350円 x 2)，拎番件大行李，17:31 - 18:52 田沢湖 > 仙台。
19:00 離遠見到JR駅既牛舌通入面排哂長龍，唔理喇，照排喇，越唔排越遲有飯開，就嚟餓死喇．．．．
一坐低，即刻叫兩份1.5人前既餐再加個牛舌肉捧，無錯係兩份1.5人前。
實在太肚餓喇，好在白飯任裝，否則兩份1.5人前加埋碗湯都唔夠呀。
(5300円)
1.5人前厚切芯たん定食<塩味> (2020円)
1.5人前極厚芯たん定食(2650円)，牛たんつくねピリ辛味噌焼き(630円)
喫飽去酒店放低行李，當然走番去襯吓熱鬧喇，話哂今日係仙台七夕まつり第一日。
[住邊]：ホテルパーク仙台II
距離JR駅大約10-15分鐘，唔算遠但推住件大行李都幾辛苦 (辛苦哂喇財政大臣)；
check-in時都唔覺有咩問題，只係覺得舊少少，lobby仲有免費咖啡添。
小小向來唔怕舊唔怕殘，只係怕污糟，入到房都未覺異樣，
直 至沖完涼出嚟見到地下有薯片，財政大臣話連張床都有，仲有佢著完酒店既拖鞋覺得有嘢咬之後，最怕地方污糟既小小嚟料喇，將唔要既衫呀，褲呀，膠袋呀，紙 呀，舖滿一地，避免踩到地毯，小小總覺得，條地毯仲污糟過今日踩車索哂臭汗既衫呀，情願踩自己件污糟衫，都唔要踩到地毯。
個冷氣又唔夠涼，開大少少就隆隆聲咁響，攪到財政大臣成晚撥扇，連不嬲怕凍既小小都流汗(4000YEN)。
死喇，仲貪平book咗後日添，點算．．．．．
呢間酒店無相喇，小小驚污糟驚到黏手黏腳咁行同企，仲邊有閒情影相。
[是日消費]早餐：1560YEN
交通：1400YEN (350 x 4)
入場：400YEN (潟分校)
晚餐：5300YEN (伊達)
單車：1200YEN x 2
飲料：662YEN
住宿：4,000YEN
－－－－－－－－－－
總共：15,722YEN
註：
- 田沢湖風景好靚，鍾意呢類風景，有心有體力既建議單車環湖
- ホテルパーク仙台II，事後小小向酒店反映薯片一事，酒店回覆可能係一時大意，所以有薯片留向度，佢地會改進，雖然咁話，但因腳程較遠同冷氣唔夠既關係，應該唔會再住亦唔會推介俾任何人
沒有留言 :
發佈留言