2007年6月19日星期二

健行 - 井欄樹 往 慈雲山(2007/06/19)






幾個月無行山,一行返就不自量力咁行條三星路 - 井欄樹去慈雲山。
一開始都無咩野,一行三人仲一路行一路吹水唔抹咀,行左無耐就開始上既路往大老坳。

嘩! 死囉,攞我命咁!上極都仲未見頂,由平地上到五百幾米既山頂,行下停下,用左起碼四十五分鐘,途中起碼停左超過五次;上山既路,九成九都大大級泥 + 石級,人又矮腳又短,手腳並用,差唔多廿級到又要停一停,抖一抖,團友二號同三號話我行到面都青埋 (咪玩喇,我塊面不嬲都係青色架喎),但好明顯我真係唔夠氣,心跳急到好似一百米短跑,連自己都驚驚地,幾驚要叫飛行服務隊救我落山。

呢段辛苦既長命梯級終於捱過左,山頂既風景果然靚,下望蠔涌。穿過基維爾訓練營,跟住就開始一條無樹陰既斜路往飛鵝山道。
去到分岔路,人生既交叉點又黎喇。團友二號話一條比較長但係一定O岩既路,一條比較短但好大機會係SHORT CUT,向無異議之下,行左條SHORT CUT,但原來條SHORT CUT既目的地唔係慈雲山。

唔得喎,我地呢程既目的係為左沙田坳果樹既山水豆腐花同埋咖喱牛腩飯,行左大半先返轉頭,明明落斜變左上斜再落斜,比預計用多左四十分鐘先完成今日既行程。好在都仲有豆腐花同咖喱牛腩飯喫。

是日得著:
山水豆腐花,咖喱牛腩飯,紫背天葵,薑汁豆漿
仲有做人唔應該走捷徑,否則可能無牛腩飯食架~~