橙酒

有日突然發酒瘟，好恨好恨飲有果味既酒。
行均啲大型超市，百雞，為康，騷GO，
醜樣唔敢買，好樣啲既又貴到死，
唯有搏哂命上網搵浸果汁資料，DIY算數。

最多人浸既係梅酒，但青梅每年清明當造，過咗就要等下一年，
浸梅酒既時間又長，而家先嚟發酒瘟，當然無清梅喇！
無青梅，繼續搵其他果類代替。

左揀右揀，決定一試浸橙酒。
橙平，米酒平，冰糖平，失敗既都係$30以內既成本，
成功就有得間中發酒瘟，試得過試得過．．．

一個橙，約半枝620ML既米酒，幾舊冰糖，
浸完先記得番睇人地既RECIPE，發現唔記得用鹽擦皮去蠟，
仲要無跟RECIPE份量，希望100日後試飲完唔會肚痛．．．

豬仔骨配薯蓉

上個星期焗完羊架，就成日心思思諗定下次焗咩好，
苦思兩日，就諗要整豬仔骨。

唔理三七廿一，買咗排豬仔骨($28磅，買左半磅多少少，盛惠$18個大洋)
先再諗用咩方法煮。
連續幾日上網搏命搵食譜，豬仔骨，豬肋骨，叉燒，排骨，燒排骨，金沙骨，連英文Baby Back Ribs都出動埋．．．
睇咗咁多個版本既食譜，卒之決定嚟個大兜亂。

醃料：
鹽，糖，胡椒粉，黑椒粒，豉油，茄汁，barbecue sauce，味醂。
向骨同骨之間界一刀，但又唔可以切斷，全部醃料搽均成排豬仔骨。
煮法：
醃幾日之後，成排放入焗爐，骨向上，250度焗30分鐘
拎出嚟反轉，再搽一層醃料向肉果邊，250度焗20分鐘
切開食得。

雖然未做到骨肉分離既效果，但唔算韌，味道可以，
雖然醃咗兩日，但都好似唔多入味，要諗諗再點整．．．．

基本上，拌碟薯蓉整法參考上次，
但今次用埋隔涼茶渣果個隔，再隔一隔啲薯蓉，再落啲蒜粉撈一撈，
效果更好，比上次綿同滑同香，無得頂呀！！
(又搵到位讚自己喇．．．)

香草羊架配薯蓉

又到煮飯日。

是日又扮大廚，今日既主菜係．．．
燈燈燈櫈．．．香草羊架。

一早落街市買紐西蘭羊架，$68蚊磅，買左1磅多少少，盛惠$83個大洋。

醃料：
鹽，胡椒粉，黑椒，蒜蓉，迷迭香。
全部醃料搽均成排羊架。
煮法：
醃幾個鐘之後，用平底鑊大火煎香表面，
唔落油，肥膏面落鑊

，自然出哂油．．．
再放入焗爐，250度焗30分鐘，切開食得。

拌碟薯蓉：
一隻焗薯(超市有賣，$9.9有5-6隻)，切粒大火滾水烚熟。
用匙或叉壓成蓉，襯熱落牛油，芝士，鹽撈均。
砌成圓形上碟，落啲芝士粉同蒜粉，攪掂。

我又嚟喇！深圳

上次行咗IKEA，諗住今均上去深圳行B&Q。
又係坐車去到落馬洲，再轉地鐵去世界之窗，再轉免費車，話咁快就去到。

可能已經裝修完，硬係覺得B&Q無咩啱使，
行行吓FING咗去隔離既生活本色睇家居用品，去廸卡濃睇運動用品。

竟然向生活本色買左個美亞平底鑊玻璃蓋 =__=||| 。
唔係前世未托過，但實在平太多，向香港永安賣緊$90，
深圳只係賣RMB38，唔買對唔住自己喇．．．

再FING去隔離廸卡濃，廸卡濃賣運動衫，用品，鍾意戶外運動，
簡直睇到唔捨得走，好多運動衫褲鞋襪，
單車，游水，足球，籃球，高球，行山，瑜伽，咩鬼都有．．．
一行五人，個個都有斬獲。

行完之後再去隔離IKEA，今次做足準備，格哂價先上嚟，
一入去就目標為本，喫個下午茶，就掃貨，狂買焗爐碟，最少平十蚊

買哂嘢，當然又到每次北上既主菜，喫好嘢喇！！
本來諗住去D21，但二等兵報料壞冷氣，即刻轉地點。

死諗爛諗，就去四海一家喫自助餐。
之前已聽聞四海一家好鬼大，親身去過，就知所言非虛。

點大法？成場分幾個區域，迴轉壽司，海鮮，巴西燒烤，蒸海鮮，
避風塘小炒，韓國泡菜，鮑羅萬有，沙律，甜品，雪糕，生果，花茶．．．

路癡小小頭幾次拎嘢食，拎完之後唔識路返埋位
路癡唔緊要，呢樹照顧周到，枱面張餐紙係一張地圖，
小小拎完第一轉嘢食，一路喫一路睇地圖，
睇下陣間去邊拎嘢食，拎完嘢食點返埋位。

周五至周日，晚餐RMB178無加一，當月星座生日有8折。
入場送兩張券，可以換領鮑魚湯一客同哈根打雪糕一客，
其他全部任喫。

最受歡迎有酥皮魚翅湯，燒蠔，晚餐限定燒鵝肝，燒魷魚，
燒全羊，燒牛肉，各式蒸海鮮，鮑羅萬有區入面，
有鱷魚湯，蛇碌．．．

七隻蝗蟲，由18:30喫到21:30，個個捧住個肚出門口。
呢個月，睇嚟要喫多啲麥皮，降下膽固醇同脂肪先得囉．．．

繼續玩．．．焗爐

買咗新玩具，當然搏命玩，玩到厭為止。

尋晚放學吹水問二等兵，用焗爐整咩好，二等兵：焗薯吖！！
小小是日即刻身痕，响超市買一包$9.9美國焗薯，返歸開波。

一包$9.9美國焗薯有四個，揀兩個出嚟做焗薯，剩番兩個攪攪震。

第一攪攪震：芝士煙肉薯條
1. 洗淨薯仔，唔批皮，切條
2. 用油撈撈薯條，平均放上焗盤，用200-250焗十幾分鐘
3. 反一反，再焗十幾分鐘
4. 薯條熟哂後，放入焗爐用碟，加芝士煙肉，再焗到芝士溶
5. 攪掂，襯熱喫

第二攪攪震：低油低鹽薯條
1. 洗淨薯仔，唔批皮，切條
2. 用少少油撈撈薯條，平均放上焗盤，用200-250焗十幾分鐘
3. 反一反，再焗十幾分鐘
4. 薯條熟哂後，落少少低鈉鹽
5. 攪掂，又係襯熱喫

第三攪攪震：咸牛肉芝士焗薯
1. 洗淨薯仔，搽油搽鹽落薯仔面
2. 用錫紙包實成個薯仔，200-250焗廿分鐘
3. 反一反，再焗廿分鐘
4. 用叉吉下薯仔，試吓熟未，熟透應該好易吉得入
5. 取出焗薯，向中間界開，搽牛油，塞咸牛肉，塞芝士
6. 再焗5-10分鐘
7. 攪掂，都係襯熱喫

無事搵事做之作：蒜蓉法包
1. 早兩日喫剩啲蒜蓉，用橄欖油撈撈佢，搽上法包
2. 襯焗薯需時咁耐，偷上火焗埋蒜蓉法包

3. 唔知焗幾耐，見法包變脆即刻拎出嚟喫

驚死唔夠飽之作：芝士咸牛肉粟米意粉
1. 炒好意粉底，放上咸牛肉粟米芝士，又隊入焗爐焗10分鐘
2. 諗住唔夠飽用嚟打底．．．點知．．．
實在太飽，一啖都喫唔落，碟意粉要留番聽日做午餐