健行 - 花山 (2011/03/26)

又隔一輪無行山，難得有人諗埋兼提議埋去行花山，
襯住剛小測完未到大考，就去行吓山影吓相影吓model。

本來諗住由藍石開始，上山落山，睇破邊洲，跟手落撿豬灣，
再劈番上花山再過白腊，點知．．．．．．

上山無耐就開始狂按快門

見到六角柱石又開始擺model陣

狂浪拍岸拍得咁開心，擺個model等浪，細浪唔夠靚，大浪又要走佬，
又怕濕身濕腳又要影浪花，真係麻煩。

咁樣擺一擺陣，等吓浪轉吓姿勢，咁就攪咗成個鐘，
急上番山轉陣地去睇破邊洲既風琴壁。

上到高地，當然又開檀擺陣影model，又大風又凍，吹到流鼻水又吹跌model．．．

影完model抖抖，回望頭先點過嚟
剛才就係走過下面張相右方中間堆亂石，再行？條似路非路既山路過嚟
剛才落山，短腳小小要座低身落床咁既姿勢落山，
陣間上山．．．．爬？擒？．．．．都唔知點上番去

唔理咁多，再落檢豬灣

一個風琴壁，一個檢豬灣，咁就逗留咗三個鐘，
兩點半先開始行，三個鐘已經五點幾，個天都黑黑地，
要趕天黑前走，就趕唔切再上花山再落白腊，唯有原路撤退，
擒番上頭先堆亂石，去番藍石，再坐車走。

下次，一定會再嚟，行埋未完成既花山。

新MODEL (2011/03/13)

尋日花展太多人，影得唔夠開心，
襯今日有太陽，落公園影番夠本

香港花卉展覽2011 (2011/03/12)

第一次去花展，第一次帶女model去花展，第一次帶女model出街影相，
效果．．．普通喇，
花展實在太多人，擺耐啲pose，都覺得唔係幾好意思
尤其鬱金香果個位，相多兩張相，都覺得有如千枝毒箭既眼光從後射出
難為有人唔介意呢眼光，坐哂向樹，慢慢較腳架，慢慢影，慢慢坐．．．
爭在未拎杯咖啡出嚟慢慢嘆．．．
好似唔記得咗，後面仲有成村人排緊隊等影相。

如果要慢慢影，真係要揀星期一至五，
星期六日，莫講話影相，齋睇花要有排迫．．．．
下次都係去番海濱公園，香港公園同動植物公園啱我啲

豚王

日賣二百碗，喫一碗麵要排上兩個多小時，值與不值，見人見智。
但未試過咩味，為食小小點都唔甘心點都要排一次，
試一試呢碗．．．豚王！！

上次三點半到，以為唔使排隊，點知係賣哂，所以無人排。
今次十二點半到，以為排一陣，點知一排就係兩個半鐘。
明明唔肚餓，等到好肚餓，再由好肚餓，餓到唔識餓．．．

點咗一碗豚王 (HKD75)，一碗黑王 (HKD88)，加底HKD10。
無錯，死都要加底，排咗咁耐，加底好似食得耐啲坐得耐啲感覺抵啲。

黑王 (HKD88)：一上枱，一陣似麻油味既香油味直竄入鼻，
中間黑色一團既物體，應該係加咗墨汁既肉末，中間有啲啲肥肉，
如果唔係果啲既肥肉，真係食唔出呢堆係咩

豚王 (HKD75)：都好香，但無黑王香得咁濃烈
叉燒大塊超薄，蔥香湯頭濃，因貪心要多香油，所以望落肥膩，
拌均香油就剛好

鍾意食比較硬既麵條，建議揀超硬或者硬，
因為湯底熱而麵條幼，浸咗陣既麵條入口剛剛好，
揀軟或普通，浸咗陣會變得過冧無咗咬口；

加麵的話，要普通就可以，
因為你差唔多喫哂麵先加麵，唔係一早加定，
湯底喫咗一輪已經無咁熱，加入後加麵條唔會浸冧哂就剛剛好。

食後感：
暫時向香港喫咁多間，計美味度同正宗度，
向小小本香港為食手記入面，豚王都應該穩佔第一位 (暫時)，
但要排兩個幾鐘腳都斷先有得食，仲要過海添，就唔係咁值，
小小呢啲九龍人，去喫橫綱著數啲。
不過咁啱要過海，排隊向一個鐘以內都可以再喫既．．．