[Day 6] 23 JAN 2008 (松島 > 仙台 > 田沢湖 > 乳頭溫泉)
[早餐]：ホテル松島大観荘 - 朝食
一早五點半就起身，五點半起身做咩？咪就係睇日出囉。
等來等去，只見天光，唔見太陽，嘥心機。
唔好浪費時間，去多次大浴場，跟住喫個早餐。
食飽又係時候撤退，今日坐番巴士 (100YEN X 2)，唔行落去喇～～～
下一站去邊？就係去乳頭溫泉，出發！！
由仙台坐JR去田沢湖，大約75分鐘。
田沢湖坐羽後巴士去乳頭溫泉 (740YEN X 2)，巴士飛向田沢湖駅有得買。
今日天氣未算好好，但起碼無落大雪，巴士經過田沢湖時，仲影到相，見到對面岸。
[午餐]：妙乃湯 - 烏冬 (800YEN + TAX)話咁快就去到妙乃湯，CHECK-IN完後，問歐巴桑有無午餐，歐巴桑好緊張咁話，午餐去到13:00，而家已經13:15，叫我地快啲去食事處，佢幫我地跑去廚房請廚師煮兩碗烏冬。
食飽 (其實一啲都唔飽) 就返去執野，準備去浸溫泉！
先嚟去蟹場溫泉，放低 500YEN X 2，就即刻向露天風呂出發。
蟹場溫泉有外湯混浴 X 1，內湯 X 4(岩風呂，木風呂)。
經過一條雪道，落幾級樓級，一間屋仔出現於眼前，望真啲已到露天溫泉，間屋仔原來係更衣室。露天溫泉無任何沖身設備，唯一向風呂附近有木盆，裝啲水求其沖下就跳入溫泉，因為零下幾度除衫真係好 XYZ!@#$ 凍 。
點解小小咁大膽咁快除哂衫跳入呢個露天混浴？因為無人嘛，哈哈哈哈．．．
呢樹景觀普通開揚，個混浴都算大，望雪同樹景，果然係雪見溫泉。
同老公大人影左幾張出浴照，先見到一對公公婆婆入嚟，呢個時候我地就撤退喇，再去蟹場個內湯。
浸完蟹場溫泉，即刻向孫六溫泉進發！
孫六溫泉有秘湯之稱，因為佢位置較隱密，要行0.8K先到，好在平日訓練有素，0.8K話都無咁易就到。
去到孫六溫泉，放低 400YEN (400YEN X 2)又去玩。
孫六有外湯 X 2，內湯混浴 X 1，外湯女浴 X 1，內湯男女各一。內湯同外湯有分女士專用，唔似蟹場咁得一個混浴露天風呂。
派老公大人視察過混浴果邊無人，小小拿拿聲由女湯跑去混浴，同老公大大一齊嘆溫泉。孫六啲泉水比蟹場熱好多，有啲辣PAT PART，望河景，好開揚，但混浴較細。
浸到成個人熱辣辣，天又開始暗，係時候返歸，浸返妙乃湯。
妙乃湯內湯男女各有金湯同銀湯，外湯則混浴，連同貸切風呂都望到瀑布景。
小小浸完金銀二湯，一鼓作氣衝出混浴，點知無人，LUCKY。
[晚餐]：妙乃湯
浸得溫泉多覺得特別肚餓。習習聲就喫哂呢餐夕食。
食完飯當然又係溫泉時間喇，每晚20:00男女內湯都會交換，呢個時候當然又係浸完內湯再浸外湯。除左小小同老公大人，外湯又係無人，無綠見到光脫脫既靚仔。
浸浸下有個後生仔入嚟，可能見小小浸緊外湯金之湯，佢唔好意思咁浸左陣銀之湯就走鬼左，結果外湯好似私人風呂咁，得小小同老公大人。
[住邊]： 妙乃湯
妙乃湯以溫泉做賣點，內外湯都有金銀二湯，外湯同貸切風呂都望到瀑布景，正 (28,300YEN)。
[是日消費]開餐：3,616YEN
交通：1,680YEN
住宿：28,300YEN
－－－－－－－－－－
總共：33,596YEN
註：入住妙乃湯可以免費用貸切風呂一個鐘，咁就唔使怕同其他人一齊混浴又有得望住瀑布景
沒有留言 :
發佈留言