勁呀！梅酒

唔使多講，一睇就知呢啲咩嚟喇！！
無錯，係梅酒，
但唔係普通既梅酒，係自家浸兼有名堂既〔勁呀！梅酒〕

最初浸既時候，好有心機咁隔兩個星期轉吓拎吓，
三分鐘熱度過後，隔兩三個月先望吓，
早排，直頭唔記得呢幾枝嘢添

臨近清明，先醒起呢幾枝嘢，
跟住試吓味喇，夠哂梅香但係酸到無朋友，拿拿聲加冰糖，
加完過幾日又試味，再加冰糖，加咗兩三次，終於啱口味，
一枝獨一無二既自家浸〔勁呀！梅酒〕，就咁誕生！！

郊遊 (2011/04/09)

陽光，草地

椰林，樹影

小小無去外旅，只係郊遊．．．．
見到呢個景，去過既都應該估到，小小去咗邊樹郊遊

仲未估到？

睇到呢度，估到喇卦？！
無錯，就係廸廸尼．．．．．隔離既廸欣湖

呢樹草地夠哂多，樹同太陽都非常多，
最適合帶張膠蓆嚟野餐曬太陽。

曬夠太陽，過埋廸廸尼隔離既碼頭影吓相，再入埋酒店兜個圈，
今日散夠心，又夠鐘返歸。

濕地公園．．．門口 (2011/03/27)

買張西鐵$21全日通，進軍大西北。
由美孚去兆康，兆康去元朗，元朗去天水圍，天水圍去濕地公園，
濕地公園去天水圍，天水圍去流浮山，流浮山去元朗，最終返去美孚．．．

唔好講笑，自己睇都有啲眼花，$21車錢咁樣玩大西北，真係抵到爛
濕地公園開咗都一段日子，但仲未去過，就襯買咗全日通，
明知過鐘無得入場都照去門口影相。 

士林台灣麵

上回大西北一日遊，只講咗玩，未講食，繼續．．．
大西北非我地頭，焉知有咩正嘢喫？唯有求openrice神指點明燈。

根據openrice神網上顯靈，大坑渠附近有間多人均求得好籤既士林台灣麵，
就去試試喇。

先嚟排骨乾拌麵，排骨，即炸豬排也。
味道，無咩特別，唔算好食，亦非難食。
乾拌麵，如圖，無湯既麵加柱仔青瓜絲，加啲豉油，拌均食。

紅燒牛肉麵，較排骨乾拌麵出色，
牛肉腍，比坊間一般台灣牛肉麵更似台灣牛肉麵，可吃

豬手，普通過普通，可食可不食。

埋單唔使加一，喫飽飽，繼續用埋是日最後一程全日通，返歸。

真君寶誕就嚟到喇

想喫街頭小吃？想向戲棚睇大戲？唔想俾錢純綷想裝吓？
得得得，因為．．．．．

今年既真君寶誕就嚟到喇，喫嘢裝嘢既機會又嚟喇！！
(2011/04/14 - 2011/04/18，農曆三月十五)