Paisano's

上次去西貢游完水，已經想嚟呢樹開餐，
但去到門口時，見到間舖又細，門口又一堆人，
天口又熱又要坐門口，最終當然無食喇．．．．

今日行完山坐番巴士出西貢只係四點鬆，
最重要係門口張枱就喫完，當然企向樹等位喇！！！

十條戊利坐向門口等喫下午茶，叫咗一客廿四吋批薩，
無錯，你無睇錯我無打錯，真係廿四吋

order完即焗，等半個鐘，等喫批薩既時候，
再望吓有咩小食，結果無嘢啱食，
但十個人喫一個廿四吋批薩邊夠？再order多一個廿四吋批薩！！

即係前後兩個廿四吋批薩！！！！

一上枱．．．嘩！嘩嘩！！嘩嘩嘩！！！
好大呀．．．．．除咗十條戊利，啲路人行過都話：嘩！好大呀！

就向一次又一次既驚訝聲中：好大呀．．．
十條荗利一齊出動，一陣風咁chur哂成隻批薩

好在前後order咗兩隻批薩，等咗一陣，第二隻批薩都焗起
當然又係一陣風咁，又chur隻批薩

雖然要等30分鐘，但即叫即焗熱辣辣，
行完山又特別肚餓，十條戊利一齊喫，覺得特別好味。

HKD220一個，兩個HKD440，唔使加一，除番開都只係HKD44蚊，抵呀。


Paisano's
地址 :    西貢親民街27號地下
電話 : 2791 4445

行山 - 大浪灣赤徑 (2011/01/01)

相隔四年幾，又番兜行大浪灣赤徑。
上次二人行，今次十人行

西灣亭 > 吹風坳 > 西灣 > 鹹田灣 > 大灣 > 大浪坳 > 赤徑 > 北潭坳 (12K，約4小時)

元旦日既彌敦道俾大陸同胞攻陷，元旦日既西貢則被港人攻陷，
成個西貢人頭湧湧．．．．

行咁多次山都未見過咁多人排隊等車去西灣亭．．．
由西貢麥當當坐青的去西灣亭，約HKD85，咁齊人當然唔等29R，拿拿聲跳上青的。

西灣亭落車，放低幾兩先開波都等咗好耐，個流動廁所好日都唔會咁旺場，
成條人龍等交水費．．．．

好，開波！！元旦日特別多人行山，仲要係．．．
今日既行山人以為自己行緊彌敦道，條咁窄既山路都要兩三人一字排開咁行，
後面腳程快既人則行吓停吓排埋隊等前面讓路．．．．
行山無人介意各遊人行得慢，但介意一字排開阻住後面腳程快既人，
仲要明知後面有人都唔讓路，唔明點解啲人咁鬼自私既？！

塞吓停吓，終於落到西灣。
西灣亭落斜，財政大臣話菠蘿蓋位痛，睇嚟都係時候要買定啲七海健Ｘ．．．

不嬲無咩人既西灣，今日非常熱鬧，連幫私人男模特兒影張大頭相，
都要排隊就位避人。

今日既行山人士，好明顯好大部份都無做資料搜集。
一見到有士多，就停哂向樹喫早餐，補給，喫豆腐花；

點解小小咁大膽話人唔做資料搜集？
因為呢樹連續有幾間士多，
好多人迫哂向第一間士多，第一間既豆腐花HKD6，排哂長龍等食，
轉個彎第二間，豆腐花HKD5大把吉位，
轉多兩個彎第三四間，豆腐花HKD3無人問津，
向第一間喫完豆腐花既行山友，行到呢個位見到HKD3後，個個呻笨。

又係塞人行吓停吓，又到鹹田灣。

鹹田灣指定影相位，條木橋多人到飛起，每隔幾分鐘就成條人龍排隊，
咁鬼多人，都無心機幫男模特兒影大頭相。

快放一輪，終於同其他人拉遠丁丁距離，無咁塞人。
唔覺唔覺又衝到赤徑，上埋最後一個上斜，元旦日行山向四個鐘內完成。

紅山泰國菜館

2010年既最後一餐，當然要喫好啲。
又約埋班食得之人，去咗荃灣三陂坊既紅山泰國菜館開飯。

先嚟兩客蒜蓉包 (共12件)：熱辣辣，好香蒜味，每件四條邊都包哂蒜蓉，正

海南雞一隻 (呢張相係半隻)：唔肥，無咩雞味，普普通通

明爐魚：唔多鍾意食魚都係咁依喫咗幾啖，酸酸哋咁囉，無意見

燒豬頸肉：份量較少，但都算燒得唔錯

串燒 (豬牛雞每樣半打)：三樣都ok，唔韌，沙嗲醬好味

炒金邊粉：OK OK，但再炒香啲會再OK啲

香辣肉碎炒飯：濕得滯，油較多，但都可以

送既甜品：唔太甜，可以呀

芒果糯米飯：芒果唔太甜，但唔酸都偷笑，若果係黑糯米更好

7條友仔喫，喫到咁飽都只係每人HKD96，抵呀。

地址 : 荃灣三陂坊26號地下A舖
電話 : 3486 2328

銀座梅林

一睇相唔使多講都知，小小去咗喫銀座梅林。
試吓呢間昭和二年創業既吉豬，同とん吉比較吓，睇吓邊間好味啲，
順手慶祝埋n周年紀念日。

荒死好多人，一收工即刻碌去開飯。
18:10 去到，人影都無隻，侍應講明19:30還枱．．．．
是但喇，兩丁人，個半鐘夠哂食。

餐廳入面黑麻麻，發雞盲小小睇餐牌睇得好辛苦，
有散光既同類就明白，光線一唔夠，睇嘢就懞查查，財政大臣話呢啲叫氣氛喎．．．．

點咗兩個定食，一客黑豚豬柳，一客吉烈黑豚，加多客人人話必食既吉豬三明治。

豬扒三明治HKD68：麵包算鬆軟，但可以更好；配少芥茉味既醬，味道OK；
吉豬唔脆但熱，但無想像中好，
預期會有外層鬆軟既麵包，包住脆卜卜既吉豬，以為一啖會有唔同層次既口感，可惜無．．．．有啲失望，非必食item


黑豚豬柳定食：有飯有湯有椰菜絲有醬菜
飯：日本米要黏口唔爛，呢碗飯唔止黏兼仲好爛，唔合格
麵豉湯：有白蘿蔔紅蘿蔔魔芋，可以
黑豚豬柳：外脆內軟有肉汁，OK OK

黑豚吉豬定食：一樣有飯有湯有椰菜絲有醬菜
飯：一樣爛，唔合格
黑豚吉豬：OK OK，但同豬柳一比，明顯較乾同鞋，要食較嫩既豬，喫豬柳好啲

埋單HKD433，下次再食只會點黑豚豬柳。

THE Lounge

一見到呢張咁hea既櫈，都應該估到．．．．．
小小又去萬豪喫大餐喇

收到白金咭有折既消息，即刻班齊人馬去擦餐勁喇

！
集齊五個人有七五折

，
本來麻麻地香檳，但咁高興又有班食友一齊，又忍唔住要飲喇！

未夠11:00未開得波住，飲住香檳吹吓水先

夠鐘！開波！加菲蟹，大龍蝦，細龍蝦，魚子，咸豬髀，沙樂美腸腸，鵝肝，芝士，沙律，曲奇餅，蛋糕，雪糕．．．．．．

同班擦得老友一齊，邊喫邊吹水，唔覺唔覺喫得特別多，
唔覺唔覺又飲得特別多．．．．香檳，白酒，紅酒．．．．

以為喫好耐既brunch，眨吓眼向吹水之間就喫完，
飲埋杯cappuccino，又夠鐘埋單走人。

HKD640，75折，加一加原價，盛惠HKD544一人。
一餐喫得開心，吹水吹得開心既早？午？晚餐？HKD544絕對值得。