七戸十和田

去十和田湖，除咗由八戸 / 青森坐JR巴士，
掘掘吓又搵到由七戸十和田駅出發。

運行期間：2010/11/11 - 2011/03/31

八王子拉麵館

都唔知係忙得滯定懶得滯，連早排去咗間八王子拉麵館喫過飯都唔記得。
早排呢．．．．即係呢．．．．都中秋之前既事囉．．．．
聖誕都嚟緊，仲講番中秋前既嘢。

廚師推介既牛骨湯拉麵，實在喫唔出係牛骨，
叉燒味道普普通通喇，唔係好好味又唔係難食果隻；

粟米濃湯拉麵，未上枱之前粟米精小小好期待有好多好多好鮮甜既粟米，
可能係新鮮粟米剝落嚟，又或者係唔知邊樹特別地方既粟米，
點知都係普通粟米 (但係粟米可以有幾唔普通呢？！)，
再有個金寶粟米湯既湯底浸住拉麵。

個湯底真係有啲雞肋FEEL，食之無味，棄之可惜，
飲又飽滯過頭，唔飲又好似好浪費．．．．

讚既係，呢度既味玉做得唔錯，雖然唔及橫綱個味玉，但相對其他拉麵店，
係做得唔錯。

四十零蚊個拉麵，唔使加一味道OK，老實講，好過去啲要加一既拉麵店。

風林特式燒烤專門店 Ken's Barbecue Kitchen

咁啱咁橋夠期捐血，順道去旺角捐血兼吸啲"新鮮”既空氣

。

假日既旺角，商場街舖，度度都係人；
好食唔好食既食肆，總之係呢區就全部都要排長龍。

要避開啲長龍，一係提早喫飯，一係行遠啲。
今日就搵咗間離大型商場遠少少既
風林特式燒烤專門店 Ken's Barbecue Kitchen，
仲要六點未夠，一定唔使排長龍。

六點未夠，連晚市餐牌都未換，小小同財政大臣就坐低咗。
揀咗個二人餐，HKD168，有沙律，餐湯配蒜包，焗蠔，燒豬肉眼，天使麵，甜品同餐飲。

沙律：以為係得少少生菜水果搭多多沙律醬既沙律，點知係有芝麻味既胡麻醬，啲菜仲好fresh，仲有幾條咸肉，Good喎！
一嚟個沙律有啲驚喜，即刻好期待跟住落嚟既菜．．．

是日餐湯羅宋湯，普普通通不過不失，但蒜包焗得夠熱，搭丁丁香草，即刻加番分。

焗蠔：少少辣，好開胃，雖然唔大隻，但味道唔錯，最鍾意佢搭兩條蘿蔔苗過小小當草咁喫

燒豬肉眼：一路燒一路飄嚟肉香，面頭有丁丁焦香，但豬肉僅熟唔韌唔過火，又係少少辣多多趣，好味，但份量多丁丁就更好

吞拿魚露筍天使麵：睇佢細細碟，食落都夠飽

個二人餐包歐陸甜品，財政大臣同小小都以為得果啲芒果布丁呀，啫喱果啲，點知唔係，是日甜品有三款揀：炸朱古力布朗尼，杏仁奶凍，焦糖布丁。齋聽到唔係啫喱同芒果布丁已經開心，仲要有三款揀，仲開心

炸Brownie，又脆又熱，Brownie既味道但唔係Brownie既質感

杏仁奶凍無杏仁味，但奶味好濃，可惜唔夠滑

唔知係地點問題，定時間關係，呢度食物唔錯，
價錢合理，唔使加一，但極少人，
由18:00 坐到19:30，計埋只得四枱人，
下次再去旺角，希望呢間風林仲撐得住，等小小再有機會幫襯。

風林特式燒烤專門店 Ken's Barbecue Kitchen
地址：太子砵蘭街434號地舖
電話 : 2789 8020

Oyster and Wine Bar

懶咗差不多十個月，尋日無情情去行山，你估真係咁有心去減月巴咩？
只不過係為咗今日喫BRUNCH，減低丁丁罪惡感。

本來想去萬豪個brunch，但無咗生蠔，好似爭咁啲，
為咗喫好耐無喫過既生蠔，咁去試吓有生蠔既Oyster & Wine Bar。

去到喜來登坐lift上17/F，要行一層先上到去18/F，即刻諗起泰國間Sky Bar。
去到18/F，行到最入先見到間Oyster & Wine Bar，
雖然個BRUNCH由12:00 - 15:00，怕蝕低既師奶小小，通常早少少會到，
諗住坐向入面飲啖水一夠鐘就衝去搵食，點知呢樹未夠鐘唔得入，
要坐向出面等夠鐘排隊入坐。

唔知係太過早訂位既關係 (差唔多成個月前)，
定係全場得我哋係二人枱既關係，個位編响門口個屏風隔離，
張枱仲係臨時加建果隻，摸到係張細枱，放塊摺板上去加大果啲，
感覺上差咗丁丁。

上次喫萬豪無飲香檳，今次就向呢樹喫有香檳既brunch。
老實講，唔飲呢啲嘢既小小，又邊識分靚唔靚？係咪貴嘢？
只係分到易唔易入小小個大口，味道都ok。

嚟呢度為咗生蠔，第一樣要喫既嘢當係就係生蠔喇！
今日有五款生蠔供應，有三款美國兩款澳洲，
唔識食既小小根本唔識分邊隻打邊隻

，
只係喫到邊隻鹹啲邊隻無咁鹹，唔識咩creamy果啲。
喫完第一轉，第二轉encore時，同大廚講，我要無咁鹹果三隻

。

生蠔隔離有魚生，唔知幾時開始，小小唔係咁鍾意自助餐既魚生，
總係覺得唔好味，所以一舊都無食，
財政大臣本住咩都試，點都拎丁丁試吓，結果都係麻麻地，
仲要話個太卷仲好味過啲魚生，WELL．．．．．

呢樹brunch要自己去拎既唔多，生蠔點完開完送去你枱，
主菜，餐湯，焗蠔等，係睇餐牌點，都係送去你枱，
個場只係有啲甜品，沙律，魚生蟹蓋蟹腳凍蝦，小吃，威靈頓牛等你自己去拎。

未點主菜，拎件威靈頓牛喫吓先，味道唔錯喎，
酥皮包住層煙肉定火腿，再有層膶，再包住牛，
酥皮唔漏，膶香，牛有牛味。

自己拎得既嘢試完，試餐牌入面既嘢，龍蝦湯。
龍蝦湯先上蝦肉雲吞，再用湯壼倒湯俾你，熱辣辣，香濃，足料。
再俾份麵包，條麵包又硬又凍，老實講擺出面小小一定唔拎，
但佢送到上枱面，咁試兩啖囉。

等喫主菜期間，又去巡吓有咩小吃，龍蝦咯嗲，蝦咯嗲，凍肝，
水牛芝士番茄，火腿。
嘩，個火腿痴住條酸瓜，攪到條火腿成條都係酸瓜味，唔好食；
個凍肝普普通通，就咁食有啲漏，用嚟搽頭先條麵包都OK；
蝦咯嗲麻麻，反而龍蝦好味喎；番茄仔好鮮甜。

主菜仲未出現，去喫吓甜品喇，款唔係太多，但件件賣相都好精美，
個樣望落樣樣都好好味。

喫完甜品仲係等緊主菜，等等吓又放碟菠菜雲吞落嚟，咁又試吓囉。
唔係唔好味，芝士香濃，但雲吞入面啲芝士仲濃，好漏，
咬咗兩啖放棄。

等鵝肝期間，見咁耐都未上，咁再叫個蟹肉MINI BURGER喇，
點知個BURGER仲快過件肝，好明顯成場都叫鵝肝，所以有排輪。

MINI BURGER有幾MINI？用小小隻肉手一拼咪睇到喇！

個樣又係好精美，味道唔錯，啲薯條炸得夠脆夠乾身，
連個心都有丁丁脆，唔同老麥BURGER皇肯叔叔啲薯條。

鵝肝終於上場，煎得夠香唔潟油，配埋個唔記得係提子定蘋果定梅，
酸酸甜甜，加理個酥皮底，好味，呢件肝正過萬豪果件好多。

個BRUNCH除咗包香檳，仲有紅白酒，咁試埋喇，雖然都係唔識飲。
飲飲吓見到隔離枱個主菜有鱸魚喎，個樣又靚，又試吓囉。

皮脆肉嫩，好味。可惜個胃唔夠大，否則可以喫多件。
臨尾，叫埋餐牌入面既梳乎厘，味道都唔錯。

喫咗三個鐘，食物賣相精美，味道唔錯，服務周到，
唔識字既小小同財政大臣問經埋先生個英文餐牌入面果啲係咩，

都好樂意解釋又唔會笑我地，唔識飲酒又問侍應邊款易入口，
又好樂意答，感覺好好。
但樓底矮，感覺上唔夠舒服，價錢唔平，$628 x 2 加一，
若果唔係為咗食蠔，都係揀番萬豪，
始終樓底超高，張懶人櫈坐得實在太舒服。

行山 - 烏蛟騰 三椏灣 (2010/10/16)

對上一次行山，已經係1月1日既事，上次其實都唔係行山，影相團似啲．．．
懶到出汁既小小同財政大臣，卒之再動身去行山，
駝住一身肥肉，坐車去大埔，再轉一個鐘一班既小巴，
呆呆吓咁去到烏蛟騰。

是日行程：烏蛟騰 > 犁頭石 > 三椏村 > 三椏灣 > 上苗田 > 下苗田 > 烏蛟騰

條路唔辛苦又唔太長，咁耐無行山都應付到，風景仲唔錯添，
向三椏灣仲見到人地玩浮潛，下次帶埋啲浮潛玩具嚟玩都好，
但玩完要醃住行番山出去，再等一個鐘一班既小巴，
唔知頂唔頂得順呢？