2010日本東北追祭之旅 - 妄想加入行程 (7) - 食盡八戸

嚟緊既東北追祭之旅，因為唔想搬酒店同埋根本訂唔到想訂既酒店既關係，
將會連日向八戸打躉。

每日既行程就係倒塔咁早起身，坐車，霸位，等睇祭，半夜先返酒店，
密密麻麻兼連日既坐車霸位睇祭活動，令到個超級迫既行程迫上加迫，
連食飯既時間都唔知有無？！

日頭無時間食飯？！唯有夜晚返酒店附近食飽啲，好等第二朝有氣有力再衝過嘛！
返到酒店附近，斷估都差不多十點零十一點，
呢啲時間，香港地就話仲有大把嘢食，
去過日本都知道，八點零九點啲人好似消失哂咁，條街人影都無隻，
食店好早就LAST ORDER收舖，
最閉既係，八戸比較旺同埋多啲比較開得夜既食店向三日町果邊，
近本八戸駅而唔係八戸駅，
住八戸駅附近都唔知向邊樹搵晚飯食，宵夜更加唔使諗！！

真係有啲擔心，圓碌碌既小小，去完追祭會變咗排骨返嚟．．．．

希望連日既打躉，有啖食之餘，
貪心啲有埋宵夜呀通宵便利店呀通宵超市呀咁果啲，就好喇！！！

後話：stone大人一言驚醒夢中既白痴小小，小小向Lawson網站搵到八戸駅前有分店喇．．．有杯麵做宵夜啊！！！好感動呀!!!!

trattoria NOBILDUCA

又到一年一度人出錢我出命既日子，揀咗間意大利菜開刀。

免費既麵包，點吓醋點吓橄欖油，填吓個肥腩先。

HKD98 Caesar Salad - 凱撒沙律配野生蝦及香脆意大利煙肉
沙律菜普通，煙肉夠哂咸脆，隻蝦最正，夠大夠彈牙鮮甜

其實麻麻地想點飲品，不過財政大臣話好耐無飲過cocktail，咁是但喇．．
高杯：HKD68 Blue Sky 有咩酒咩料同橙，有啲橙味咁囉，
小小只係識飲啤酒梅酒，呢啲雞尾酒唔識分唔識飲
矮杯：HKD68 Kamikaze 有咩酒咩料同青檸，有青檸味咁囉．．．

HKD58 是日精選餐湯 - 南瓜湯：香，濃，少甜，小小最鍾意呢種杰撻撻既南瓜湯

HKD88 海鮮湯配雜菜絲：好鮮甜既海鮮味，啖湯夠濃口，有蝦，青口，帶子，鍾意海鮮既一定要點呢款湯

HKD148 Ravioli 鵝肝黑松露意大利雲吞：食過幾款菜都話有黑松露，
但到而家都係唔知黑松露係咩味，呢款雲吞有鵝肝陣膶味，
但一樣食唔到黑松露係咩味．．．．

HKD188 Veal Shank 燴牛仔膝配藏紅花意大利飯：
一上枱，同財政大臣你眼望我望，打哂眼色：好香呀！！！！
切開放舊牛仔膝入口，又唔覺得好香喎！！
點解咁神奇既呢？小小推斷香味全部來自啲汁

牛仔膝中間有把刀仔插大脾既物體，其實係隻小匙！！
隻匙要嚟做咩？要嚟畢骨髓架！！！！！！！
啱哂鍾意啜骨既財政大臣呀！

點菜時怕唔夠食，侍應先生建議點多個side dish，
介紹呢個HKD42 Button Mushroom 焗香草白菌：
白菌新鮮，加啲香草同欖油焗已經好好味

最後點少得一道甜品HKD78 Chocolate Flan 流心朱古力配香草雪糕及薄荷雪芭
朱古力夠流心，唔太甜，
薄荷雪芭陣味好似細個偷飲支薄荷酒咁味，
香草雪糕似為係普通雲尼拿味，但又唔太同喎，好香好滑唔死甜

埋單連加一HKD920，多謝財政大臣出錢，鳴謝小小出命

，
嘆咗一餐人生第一餐正式意大利菜。

拉大隊喫貴價菜

是日去新羅寶喫貴價韓國菜，點咗兩個四人餐。

是日餐粥：南瓜SOUP，好香好濃

雜菜炒粉絲：粉絲煙煙韌韌，好味

六小碟：最鍾意泡菜，蘿蔔，芽菜，其他對小小嚟講太辣喇

蠔仔煎餅：又係煙煙韌韌，熱辣辣

煙牛肉脊片拌雜菜 (前)，烤特級雪花肥牛 (後)

烤特大牛排骨

送既蒸雞蛋：太耐無喫過有蛋香既雞蛋，一盤簡單既蒸蛋，個個都話正

烤鮮大蝦：普普通通，單點就唔值

石鍋雜綿飯

鮮牛肉鍋自製麵

紅棗湯：呢個凍既紅棗湯，唯一一碗喫唔哂既嘢，因為小小唔鍾意凍既紅棗水

有喫過韓國菜，都估計到呢餐唔少嘢，
我哋仲點咗兩個四人餐，係咪以為我哋發咗達？？

非也，呢餐每人二百蚊有找，因為．．．．．
上咗深圳喫呀，一個四人餐RMB740，已經平過香港一截，
做埋VIP仲即場有折，所以咪二百蚊有找囉．．．．

京蔥炒羊肉

小小出關之後，除咗出街玩，出街喫好嘢之外，都仲記得煮飯

。
太耐唔煮飯，啲米會生牛，飯煲會生秀，隻鑊會發霉，最閉會俾人投訴！

作為一個扮哂精明又鍾意偷懶既師奶，
閒時逛超市，見到啲未到期又有特價既凍肉，就要買定嚟存倉，
戚起條筋要扮哂嘢煮下飯，打開個雪櫃都有餸嘛！

早排買咗包特價$29.9既小肥肥羊肉，近排又見到有京蔥$2，
即刻買一條京蔥就可以返歸開工。材料：
1. 小肥肥羊肉一包
2. 京蔥一條打斜切成小段
3. 蒜頭，乾蔥，，豉油，糖，鹽，酒呀．．．．鍾意落咩都得

做法：
1. 丁丁油，爆吓蒜頭呀乾蔥呀咁
2. 成包小肥肥羊肉倒哂入去
3. 炒到羊肉出哂油，將羊肉撥埋一邊
4. 用羊肉標出嚟既油爆京蔥
5. 最後將撥埋咗一邊既羊肉同爆香既京蔥兜番哂一齊，調吓味
6. 禮成
影呢幅相時都唔覺有咩，家陣睇番真係唔多掂。人地啲真正精明師奶，影啲餸相好靚架嘛，打哂燈，靚杯靚碗靚碟，
背境仲有花有草幾咁優雅，．．．．

你睇你睇，張相用報紙舖枱，飯枱有個環保袋，仲有啲環保紙，
隻裝餸碟又娘，連個飯碗都咁娘，腐乳通菜碗腐乳醬又走咗出嚟，
又影到個筷子頭．．．．．唉．．．係咪要收番埋張相好呢？！

飯腳們，Long Time no See!

早排係咁測驗，考試，做功課，溫書．．．好耐無見過班飯腳喇！
出關之後，當然要約下啲飯腳，食吓飯吹吓水先得架嘛！！

今次揀咗大中華飯店聚頭。
點咗九樣餸，坐咗兩個鐘，飲咗三枝朝日，幾罐汽水，埋單HKD630。
老實講，食物咩味道真係唔係好記得，只係記得同班飯腳吹水吹得好開心，
一餐開心既飯，食物係其次，同咩人喫先係重點。