健行 - 鹿頸往烏蛟騰，新娘潭(2009/02/22)

有人撩行山，心癢癢身痕痕，又想偷懶唔做功課唔溫書，
即刻乘機話要鬆一鬆，掹財政大臣衫尾去玩。

粉嶺火車站集合，再轉56K小巴往鹿頸。
經紅樹林，遠眺深圳，上小山坡，經啟才學校，落山，到烏蛟騰，全程約2.5小時。
到烏蛟騰，時間尚早，再去埋新娘潭影照鏡潭先走。

是日活動看似完結，其實先係戲肉既開始．．．

又嚟．．．丼

又嚟整刺身丼．．．
牡丹蝦終於喫哂喇！
2L帶子終於喫哂喇！！
皇帝蟹棒都終於喫哂喇！！

個雪櫃終於有番啲吉位，可以放吓燒賣，凍肉，雞翼，粟米喇．．．

HOMEMADE 丼

洗完邋遢慰勞自己，點可以咁虐待得松葉蟹柳蟹籽沙律咁少，
當然要整啲更多份量，更正既嘢。

洗咗三嘜米，拎一大堆”好嘢”出嚟溶雪；
有2L帶子，2S帶子，北寄貝，墨魚，皇帝蟹柳，三文魚籽，牡丹蝦，同馬糞膽。帶子有幾好味，北寄貝點普通，墨魚幾唔掂，
上次VS大餐講咗，今次講新嘢．．．

皇帝蟹腳 ($6條)：粗，厚，鮮，甜，仲正過松葉蟹柳 (使你講咩，睇價錢都知喇)
三文魚籽 (~$1.1g)：咸，鮮，財政大臣一堆放入口，然後哎：好咸．．．鬼咩，人地係醬油三文魚籽嘛，要配飯喫架
牡丹蝦 (~$9隻)：雖然唔係超大隻，但香甜既蝦，一隻接一隻放入口，你話幾咁感動呢，小小仲留起咗幾個蝦頭，過幾日買磚豆腐煲個蝦頭湯試吓掂唔掂先
馬糞膽 ($45板)：睇個樣唔多掂，食落都唔多掂，唔係難食，但唔係小小預期中既味道，亦唔係出面喫開既鐵秀味，講唔出咁古怪

呢餐兩條友大約喫咗$250，好似好貴，但呢碗嘢出街喫的話，應該要$500落樓。
所以又可以話，呢餐貴得嚟好抵呀～～～

松葉蟹柳蟹子沙律

年廿八唔得閒洗邋遢，留番年廿九做。

掃地拖地抹抽油煙機抺微波爐抹雪櫃抺廚櫃洗廁所洗企缸洗洗手盤；
換牀單換豆豆袋換被袋掉轉牀肉洗牀單洗豆豆袋哎呀原來無換被袋．．．
做完咁多嘢當然要喫餐好既慰勞是日咁辛苦洗邋遢。

即刻落街買枝溫室青瓜 $6.9，發現是日惠康可能買嘢唔使錢，
嘩！啲師奶阿伯阿姑阿婆，排哂長龍買生果買禮買米買廁紙，
平日無人排隊無人買嘢架嘛，攪到小小落街買條青瓜仔買咗成個鐘．．．．．．

用生水洗青瓜($6.9)再用熟水過一過，批頭批尾唔批皮成條刨絲，
放兩條松葉蟹柳(~$7 / 4條)，放一堆蟹籽(~$5)，
一碟蟹柳蟹籽律(~$19兩碟)咁就攪掂。

行山 - 城門水塘(2009/01/11)

襯剛開學，未忙功課，未忙溫書，拿拿聲去行下山。
咁耐無行山，揀條容易啲，一行四人，決定去城門水塘繞塘行。

一路影相一路吹水，講開打機，小小諗起聖誕節一班壞朋友帶咗隻L4D上嚟，
財政大臣打得好開心，半夜三更一路打一路大叫；
小小突然同財政大臣講：不如買L4D俾我玩．．．
財政大臣連同龍生呆一呆，跟手好興奮地諗去邊樹買GAME，然後加速快放，
拿拿聲完成行程，拿拿聲食個午餐，
拿拿聲買完GAME，再拿拿聲趕返屋企打機．．．．．．