[Day 10] 4 Jul 2024（紅海 > 樂蜀 > 尼羅河畔 > 卡奈克神廟 > 盧克索神廟）
導遊好自豪咁介紹，埃及其實有好多種類既樹，夏天仲會開花。
呢棵樹咁熟口熟面，咪就係屋企附近果啲鳳凰木？！🤔
卡奈克神廟模型。
離遠睇已經好壯觀。
入口成排羊頭獅身。
低抄角度，人變7呎高😎，入口更壯觀。
方尖碑 Obelisk。
好難想像當時既埃及人幾咁叻，利用沙同角度計算，將條超過20米高，百幾噸既巨柱，不偏不倚咁立喺指定位置。
方尖碑唔係得1條，係有好多條，仲係原地豎立既僅餘4條就喺卡奈克神廟呢度。
神廟入面好多壁畫。
卡奈克神廟除咗方尖碑出名，134條石柱都好出名。
正中間呢度係花園，起咗12條石柱扮花，12條石柱頂部全部係花型，通頂係最早既採光設計。
拉美西斯二世 Ramesses II接手擴建，成為最大、用134條石柱支撐既神廟。
埃及既法老，全部都相信死後既世界同生前世界同樣重要，所以在生既時候，窮一生時間去起神廟同墓穴，準備迎接死後既世界。
條條石柱上面都有壁畫，仲有顏色。
導遊話無後期加工，全部都係幾千年前既，佢哋只係人手慢慢一層層清除表面既泥，呢2年先重現到部分畫同顏色。
聖甲蟲同斷咗截既方尖碑，本人高度問題🥲，影得有啲衰。
聽聞圍住聖甲蟲行7圈有愛情，8圈會發達，但我已經上岸🤣，呢刻好無大志只係想要汽水同冷氣😂，咁曬咪攪我。
聖湖，引入尼羅河既水。
沒有留言 :
發佈留言