新粵穆斯林餐廳

無無聊聊，唔願做功課，唔願溫書，懶懶閒閒．．．．
財政大臣都唔知係咪見小小懶得滯睇唔過眼，無情情動議返深圳。

好！返深圳好呀！有得行街，有得按摩，仲唔使煮飯添呀！！

即刻執嘢出發喇！
兩點鬆戚起條根，四點鬆就上到深圳，五點唔夠已經按摩緊，
突然覺得火車係偉大既發明呀～～

招呼完條蘿蔔腿，係時間招呼吓個月巴腩入面既胃！！
坐地鐵去科學館站，行幾分鐘，就到新粵穆斯林餐廳。
揭揭餐牌，樣樣都想喫，但得兩條蝗蟲，幾大食都唔可以點太多嘢。

兩條香酥羊小脾 (RMB18只) - 渣住羊脾好似雞脾咁咬，見到都覺得興奮
味道一般，唔太酥，但香口

沙漠羊排 (RMB48) - 味道唔錯喎，餅底好似喫緊好多洋蔥既羊肉PIZZA咁，
又香又酥，正！

羊肉水餃 (RMB 12) - 普普通通喇

拍黃瓜 (RMB3) - 碟碟炒菜都要幾廿蚊，炒青菜都十幾蚊，呢碟特價中既拍黃瓜價錢太吸引所以點咗

喫咁多羊肉，間中喫舊青瓜中和吓，唔錯唔錯

烤羊肉串 (RMB10) 金牌烤羊排 (RMB 18 兩條 )
普通烤羊肉串RMB3，呢條高級羊串要RMB10，但唔覺有咩咁突出
金牌烤羊排有啲肥肉，燒起上嚟標哂油，喫落又酥又脆

茶錢RMB1位，無加一，埋單RMB129。
望望鐘21:30，員工開緊飯，櫃台埋緊數，又係時間走人。