我出關喇！！

來來來，跟小小對住個門口 / 窗口 / 電腦 大叫十次八次：我出關喇！！

幾年無放過暑假既小小，準備咗一堆堆一籮籮既節目去隆重慶祝呢個期待以久既暑假。
包括游水喇，行山喇，window shopping喇，真係shopping喇，四圍搞搞震但又唔幫襯喇．．．等等等等．．．
第一炮當然係．．．．食食食喇！

訂咗間五星級酒店，喫餐出世以嚟最貴既brunch。
早到未夠鐘，坐向樓底極高既大堂酒廊，
曬下太陽，影吓啲刀刀叉叉交吓差先，
廢事陣間掛住食，咩都唔記得，跟手返歸無嘢拎嚟曬命

。

夠鐘，開波！
巡完一圈，首先跑出既係全場頭幾名貴價嘢：魚子醬，帕瑪火腿

人生第一口既魚子醬，味道咸鮮，但未至於有名食家所講，死前要喫一次咁誇張，可能呢啲魚子醬唔係靚貨？定小小喫唔慣貴嘢？
考完試唔好再諗呢啲咁深既問題喇

，繼續喫！

帕瑪火腿：廚師先生即席片出嚟，唔係求其搵啲其他劣貨放上豬脾上面，
無臭豬脾味，咸香，yummy
沙樂美腸：拎帕瑪火腿時要排隊，條隊又長到剛剛拎到沙樂美腸，求其每樣拎嚟試試

第二樣跑出既，當然又係頭幾名貴嘢：鵝肝，又嚟魚子醬
鵝肝：油，香，果陣膶味．．．．正
唔係自己讚自己，小小煎得靚啲脆口啲同埋無咁油，財政大臣都係咁話
有相為証，件肝瀉哂油，係咪小小煎得靚啲呢？！快啲讚我！！

再試魚子醬：一次試唔清楚，再試再下定論．．．．
結論係．．．．．小小都係唔係好識食，硬覺得日本魚生飯啲魚子好味啲

跟手當然係鮮甜既嘉菲蟹：同上次萬豪咖啡室既嘉菲蟹一樣，肥美鮮甜
凍蝦：夠大夠肥，但味唔夠甜
刺身：試咗油甘魚同鮑魚，鮑魚刺身好味，油甘魚麻麻地

再嚟係龍蝦：味道可以，但細隻過上次

跟住到唔同味既煙三文魚，蒜橙，茶味，檸檬味．．．都係原味最為小小接受

跟住當然到小小最愛既甜食

荔枝果凍

黑森林蛋糕，布朗尼

喫咁多肥嘢，要喫埋啲草平衡下

清完個口，可以繼續喫甜嘢喇

試完西式再試中式，煎堆仔，老婆餅

咁多款甜品，最好味係士多啤梨拿破倫，其他都普普通通

涼住冷氣曬太陽，喫得飽飽既時候，小小心諗：嘆番杯意大利咖啡就好喇．．．．．．
點知侍應姐姐話餐飲得得揀cappuccino，latte，普通咖啡．．．等
嘩！！實在太好喇，拿拿聲點杯cappuccino喇

一杯cappuccino，唔太曬既太陽，一張可以坐到成pat嘢既高背椅，
小睡十五分鐘 (喫自助餐喫到可以訓覺

)，
三個半鐘既brunch，咁就畫上完美句號。

畫完完美句號，當然係俾錢既時候

盛惠$520 x 2，加一再中銀白金卡八折，$936個大洋
呢餐可以話好貴，又可以話好抵．．．
因為一餐喫埋當三餐

，係咪好抵呢

芝士煙肉漢堡拼洋蔥圈格格薯

為咗用下啲存倉漢堡扒，整咗場大龍鳳。
睇見漢堡扒，自不然諗起漢堡包，諗起漢堡包喎，又自然諗起格格薯；
咁財政大臣就動議喫番餐漢堡包餐。

材料：
1. 麵包，蕃茄，洋蔥，西生菜，芝士，格格薯，漢堡扒，煙肉

做法：
1. 煎熟漢堡扒，煙肉
2. 洋蔥浸暖水去辛辣味
3. 麵包，生菜，番茄，芝士，煙肉，漢堡扒，生洋蔥曐起
4. 炸脆格格薯
5. 禮成

睇落好簡單之嘛，做咩講到大龍鳳咁誇張姐．．．
有所不知喇．．．．
為左果兩片番茄買左兩個蕃茄 (買一個會俾街市阿姐屈住架)
為左兩片生菜買左一個生菜 (無兩片賣架噃！)
為左兩圈洋蔥，買一個洋蔥 (無兩圈賣架噃！打麻雀就有兩圈)

兩個蕃茄淨一個，仲諗緊點算；
成個西生菜要兩片，淨番成個明天喫；
一個洋蔥切開變成盤，正苦惱之際，財政大臣隨口講：整洋蔥圈囉．．．

就係呢句嘢，小小立即打蛋，開麵粉，將成盤生洋蔥浸蛋汁再浸麵粉，
炸完格格薯再炸洋蔥圈．．．．

一個老麥廿蚊餐，加多幾蚊有burger皇洋蔥圈，但向屋企整一整就攪到七國咁亂，咁係咪大龍鳳吖．．．

とん吉

話食話食，話極都未食，因為早到未開，太遲又閂，時常長龍．．．
襯復活節得閒，就準時出去排隊，試下とん吉既吉豬，炸蝦，炸蠔

晚市18:00 - 22:30，18:20到，等左10分鐘有位。
望到個餐牌，小小選擇困難症又發作．．．．．
又想喫炸蠔，又想喫吉豬，仲想喫炸蝦，樣樣都想喫，都唔知點咩好

店員見小小發哂矛，為免揭爛個餐牌，介紹咗個二人餐過我地。
二人餐$488
兩碗麵鼓湯
小吃炸軟殼蟹
一件炸豬扒
兩件炸豬柳
兩件炸蠔
兩件炸蝦
白飯椰菜 (任吃) 配一碗咖喱汁
飲品及生果

未開餐，奉上一壺茶，茶壺咁精美，拼埋張紙巾同筷子影個合照先

飲品除咗清酒外，其他任揀，小小又嚟選擇困難，左望右望，左揭右揭．．．
財政大臣點咗朝日啤，小小唔執輸又唔使煩，隨即答咀：兩個唔該

店員望一望：啤酒嚟架喎？！
小小：係 (心諗，小小個樣似唔得飲啤酒？定係驚飲醉咗俾財政大臣捉咗去？)
喫啲咁鬼熱氣既野，飲下番鬼佬涼茶都好嘛

小吃炸軟腳蟹，熱辣辣，心急小小仲辣親個櫻桃大咀

喫完小吃，時間剛剛好，成碟主菜一次過上枱。

吉列豬排：炸粉鬆化金黃唔死實，豬扒鬆軟唔韌，GOOD呢
吉列豬柳：比豬排更鬆軟，少少肥有肉香又有肉汁，仲GOOD GOOD
炸蠔：蠔靚，夠香有汁唔鯹，炸蠔有汁之下，炸粉依然鬆脆，掂
炸蝦：炸粉同蝦貼到緊一緊，無甩皮甩骨既情況出現，蝦亦相當大隻，唔係得只見炸粉不見蝦

不得不讚係，小小對炸野既油好敏感，萬年油同有古怪既油，一食會作噁作悶，向とん吉喫咁多炸野，完全無呢啲不良反應

食哂啲炸野已經飽到飛起，但配住小小最鍾意既日式咖喱汁，嗌住飽都喫哂碗飯，
仲添咗啲椰菜，加丁丁柚子汁，又喫；再加紫菜汁，又再喫；
喫哂嘢，先發覺未飲哂杯朝日啤，唔想浪費嘢之下，又乾番杯啤。
個褲頭鈕就嚟爆開咁濟呀！！

爆褲鈕都仲要喫，因為有生果呀，食得唔好嘥！！

雖然呢餐貴少少，但喫得咁飽，又滿足又美味，個心又覺得佢抵抵哋喎
炸野唔可以成日咁食，但一年先一次半次，無問題喇！

啋呀！梅酒

舊年戚起條根要飲水果酒，青梅過咗造，要改浸橙酒；
浸緊橙酒時等唔切，結果要買貴貴梅酒飲。

梅酒飲哂，橙酒剛剛浸好，滿心歡喜開封，一飲之下．．．．．
嘩！正如師奶所講，好以飲酒精咁，雖有橙香，但米酒味依然強烈，
飲開低酒精度既小小頂唔順，唯有放棄。

等咗大半年，清明快到，青梅當造期又嚟喇！！
拿拿聲向櫃底拎番枝白酒出嚟，再拿拿聲落街市買青梅。
洗乾淨青梅，抺乾，去蒂，開枝白酒，放哂啲梅入去，攪掂！！！！！

人人用米酒，點解小小用白酒？
因為．．．．．上次米酒浸橙既米酒味太強烈列喇，
仲有．．．．．呢個白酒樽樽口夠哂大，一開即放入梅，
啱哂小小呢啲懶鬼，連消毒玻璃樽都慳番

啋呀梅酒，快啲浸好，咁小小就唔使再買CHOYA梅酒喇！

燒味單拼之叉燒．．．

無錯，呢舊好似係普通不過既叉燒，但係好似普通得嚟又有啲唔普通喎！！

登登燈櫈！！！
小小學識整叉燒喇！！！
無錯！！！呢舊係小小整既”假”叉燒！！！！
最鍾意叉燒既叉燒學識整叉燒．．．．．．

點解係”假”叉燒？呢舊又唔算得上係真正既叉燒，正統叉燒係燒出嚟架嘛，
但呢舊叉燒係燜出嚟，咁仲算唔算係叉燒？個樣似叉燒就當佢係喇！

材料：
1. 梅頭豬肉
2. 豉油，糖，水

做法：
1. 平底鑊開中火
2. 兩個飯碗水煲滾
3. 落豬肉，豉油，糖
4. 再滾起收細火，燜到收汁，禮成跟據小菲菲俠大人既原著，呢舊假叉燒叫甜肉，但唔知點解小小抄考完幾個類似既食譜，整出嚟變到成舊叉燒咁款．．．．

是但喇，真豬肉，無色素，無味精，唔係黑心豬，唔係病死豬，假叉燒就假叉燒喇，唔使再向街買啲叉燒平過豬肉，想喫又要驚既”真”叉燒囉．．．