大埔海濱公園 (2011/02/05)

恭喜發財，龍馬精神，身體健康，心想事成！

八戸屋和食料理

年初三赤口，當四周圍既茶餐廳坐地起價，
無HKD19既平民早餐，得HKD28既上等人BREAKFAST；
無平民下午茶，上等人麻煩番屋企叫工人煎幾件過百銀既蘿蔔糕；
咩話？加咗瑤柱？咁你舊蘿蔔糕可以賣二百銀

無平日賣HKD30既包熱飲午餐，
只得喫咗幾日兼幾廿餐既發財好市，橫財就手午市套餐．．．．．
盛惠HKD38-40。

天呀！小小情願喫麥記都唔要再喫髮菜蠔豉豬手．．．．

隔離間日式餐廰都仲係用番平日既餐牌兼唔係喫髮菜蠔豉豬手，
唔使問阿貴都知點揀。

個肚餓到打哂鼓，即刻碌入去，舉手叫個滑蛋豬扒飯定食HKD40，
財政大臣點咗燒鯖魚定食HKD42。

買咗新玩具，即刻試玩。
D90 + 定焦鏡 + AUTO MODE，隔離枱大叔麻煩笑果陣唔好咁大聲，
要知道，唔識玩相機又要玩，當然係用AUTO MODE喇！
陣間扮勁較啲咩光圈咩快門，較得嚟個飯凍哂，
無人會免費換過俾你。

滑蛋豬扒飯，跟麵豉湯，小碟同一杯凍柑桔檸檬飲品，HKD40雖然要加一，
但唔係蠔豉喎！唔係豬手喎！無坐地起價喎！
味道仲要唔錯！！蛋滑豬扒OK，珍珠米夠哂多！

鯖魚定食一樣有湯有小碟同飲品，
燒鯖魚夠肥美，白飯細碗咗啲．．．．唔緊要
小小碗滑蛋豬好多飯，財政大臣可以過嚟添飯，仲有蛋汁添

呢餐加埋一HKD90，論味道食物種類收費座位舒適度，仲點會揀茶餐廳。

地址 : 大埔富善邨商場地下G017號舖
電話 : 2666 6800

馬哥孛羅咖啡廳

一見到啲生蠔呀，凍蟹呀，凍蝦呀，唔使問阿貴都知．．．．
小小又去喫自助餐喇！！

今次去馬哥孛羅咖啡廳喫！17:30開始，當然又係17:15就去到喇！！

因為無人既關係 (除咗我地一行十一人既蝗蟲軍團)，
唔使同人爭食 (但要同蝗蟲爭

)，拎嘢食之前，影吓相先！

凍海鮮：有生蠔，凍蟹，凍蝦，青口
燒味：有乳豬

！！！燒鵝，叉燒，雞，燒肉
沙律：撈定既豆豆沙律，雜菜沙律，螺絲粉沙律．．．有羅馬生菜呀，火箭菜呀，鬼佬菜既即撈沙律

有即煮粉，麵，飯，鐵板海鮮，鐵板豬牛羊

當然仲有甜品區喇：雪糕，蛋糕，曲奇，生果．．．

影哂相交功課，當然要開餐喇！
先嚟怒劈乳豬，好味，係肥咗少少姐，咩咩沙樂美腸，普普通通

即場鐵板燒海鮮：龍蝦，正，encore再encore，喫到師傅無停手
(十一隻蝗蟲車輪叫，想停手都難

)
鐵板牛呀羊呀魚呀，相比就普通咗啲，都係繼續叫海鮮，主打龍蝦
除咗鐵板，仲有蒸聖子呀，貝類呀，蕃薯呀，都ok好味

反兜諗住再喫乳豬，點知就係得掛向樹果一隻，咗兩轉就俾班蝗蟲喫哂．．．．

開始亂喫，生蠔，刺身，甜品，沙律菜，雪糕，曲奇，海鮮，燒味
擔擔麵一碗幾人喫，個麵竟然幾好味喎，
黃鱔煲仔飯麻麻地
大部份食物都OK，只係甜品比較普通

講咁耐，咁多嘢喫要幾錢？
$218唔包飲品，$258包任飲 (紅酒白酒都包)，再加15巴仙服務費
十人買餐卷只需$2500，仲包任飲同服務費，當然買餐卷抵喇！！

晚餐都只係$250？！馬哥孛羅喎？！
係呀，係馬哥孛羅，但係係深圳既馬哥孛羅，$250係人仔，
兌返港紙，都係HKD300，五星酒店自助餐，無人爭食，抵！

马哥孛罗咖啡厅
地址 : 福田福華一路马哥孛罗酒店

IKEA 晚餐

去IKEA敗家，點可以唔去埋IKEA間餐廳開飯？！話哂係沙田區既人氣店喎。

燒牛肉 (HKD39)：唔老唔韌，OK喎，以HKD39既價錢，抵過哂兼好味過哂所有快餐店既扒餐，仲有薯仔蛋同幾條菜仔伴碟，簡直係超值
呢碟燒牛肉放向果啲要加一既西餐廳賣，絕對可以標價HKD88 - 108

肉醬花瓣麵 (HKD15)：咁既價錢無諗過有咩水準可言，但食落口，味道比好多賣成三十幾蚊碟既肉醬意粉好味好多，抵食！

意式茄醬藍青口 (HKD19)：無數到幾多隻，雖然比較細隻，但肉質同味道唔錯呀，
個意式茄醬汁有蕃茄肉，食哂藍青口仲可以用啲汁撈埋頭先個花瓣麵

呢餐只係HKD73，非常抵食

西貢海鮮

新一年既第一餐晚餐，當然要喫好嘢喇！！
(總係搵到借口俾自己喫嘢

，2010最後晚餐，2011第一餐晚餐．．．)

去完西貢行山，次次見人响艇仔買海鮮買得咁鬼開心，
今均輪到自己買好嘢返歸喇，YEAH～～

HKD150份花蝦 (呢份有5隻)：
份蝦咁貴有幾大隻？唔．．．．．呢隻蒸蝦用既碟，直徑有10吋，咁你估吓隻蝦有幾大？
由西貢返到屋企個半鐘，仲未肯C，你話呢幾隻嘢幾咁生猛
肉爽味甜，除開HKD30隻新鮮生猛大海蝦，唔算貴囉

HKD每隻10，元貝，貴妃蚌：呢幾隻嘢就普普通通喇，都鮮甜既，但下次唔使托咁遠囉

兩碟嘢夾埋HKD190，新一年既晚餐，夠哂滿足