東北追祭之旅 (DAY3) 角館，盛岡 - 盛岡さんさ踊り

31 Jul 2010 - 10 Aug 2010 東北追祭之旅 (DAY 3)

---

[Day 3] 02 AUG 2010 (八戸 > 角館 > 盛岡 - 盛岡さんさ踊り)

[早餐]：コンフォートホテル八戸
今日無尋日咁癲，呢頭喫完早餐，果頭喫燒海鮮。
即係話，理論上應該到午飯時段先有第二餐落肚，所以早餐要喫飽啲。
一諗到要喫飽啲，小小即刻劈咗兩個飯糰，炒蛋，麵包，菜絲，生果，仲劈多兩杯健美麥茶，一大朝劈咁多嘢，麥茶點健美都無用。

東北追祭之旅 (DAY2) 本八戸 - 八戸三社大祭

31 Jul 2010 - 10 Aug 2010 東北追祭之旅 (DAY 2)

---

[Day 2] 01 AUG 2010 (八戸 > 本八戸 - 八戸三社大祭 > 白銀 > 八戸)

[早餐]：コンフォートホテル八戸
酒店包早餐，當然要喫埋先出去玩。
呢間酒店個朝食都算唔錯，有飯糰，焗既麵包，蒸既麵包，
烚蛋或者炒蛋，湯，薯仔，腸仔，菜絲，即沖穀麥早餐，
橙汁，牛奶，咖啡，麥茶，仲有橙同西柚添。

以上朝食照片來自官網

東北追祭之旅 (DAY1) 香港，八戸

31 Jul 2010 - 10 Aug 2010 東北追祭之旅 (DAY 1)

---

[行程資料]
去程 : DL638 - 08:05
回程 : DL611 - 18:45
機票 : HKD 4340 (非團體機票) + HKD 495 (機場稅連燃油付加費)
PASS：10日東日本PASS，JPY32000 (打橫遊買，折實HKD2698
時差 : 日本比香港快一小時
交通 : JR，巴士

[Day 1] 31 JUL 2010 (香港 > 東京 > 八戸)

07/10/2010 - 07/11/2010 順德2日美食之旅

07/10/2010 - 07/11/2010 順德2日美食之旅

---

[行程資料]
去程 : 09:30
回程 : 18:00
旅費 : HKD418  (每天小費HKD50)
時差 : 沒有
酒店：駿濤酒店公寓
交通 : 旅遊車

[Day 1] 10 Jul 2010 (深圳 > 南沙 > 順德)上 次同CEO唔用腦咁玩得食得咁開心，當然又約吓班蝗蟲朋友又玩又食番兩日。

09:30 向深圳集合，坐車到南沙。
今日唔知整咩鬼，高速又塞車，普通路又塞車，
塞咗唔知幾耐，訓吓醒吓，到達第一個景點：南沙水鄉．．．隔離個天后宮。
11:45 一落車，小小已經認得上次條爛鬼一條街．．．向隔離。

南沙天后宮，雖然向爛鬼一條街隔離，但好睇好多，
起碼有廟有個天后像，有得行吓梯級。

睇完又上旅遊車，訓下醒下又塞下車咁，
由唔肚餓變極度肚餓，由唔使去廁所變急到要賴咁滯，
13:50 卒之到第一個開飯地點。

唔知係咪期望過高，原味民間菜二十度，無論樣，味道，都普普通通，
無想像中咁好食，最衰係啲服務，
一碟餸剛放低，即刻有另一碟上枱，正想起筷時，第三碟餸又嚟，
第四五六碟餸HER HER聲咁上，枱面啲嘢都未食得切，又趕住收嘢再上嘢，
想食番第一碟既時候已經唔見咗，個湯未飲哂又收走咗．．．．
蝗蟲開餐已經夠哂快，都唔夠人地收碟快，快得佢吖

睇相都覺得好迫好密好趕

各位肥蟲團友，食飽飯，又夠鐘上車喇！上到車又訓喇！！！
訓又咁上緊，聽到導遊姐姐話，下個景點到喇．．．
天佑城shopping mall。
肥蝗蟲堆一見到shopping mall就發癲，因為shopping mall有間好大既超市。
個個即刻師奶上身，入去買洗碗布呀

，洗頭水呀，調味料呀，零食果汁。
買得開心得滯，唔記得係tesco定costco，
除咗超市，個mall其他方都無行過。

買完嘢又上車去下個景點，17:25 又起身落車望下影下相咁囉。

呢個景點，叫樹生橋，樹根生得長過咗對面，村民乘機向隔離起條橋，
條樹根好似變咗扶手同橋底，咁就叫樹生橋。
小小對呢對橋無咩興趣，反而對啲o靚仔有興趣多啲，
啲o靚仔無嘢玩，連發泡膠都可以當船坐。

睇完條爛鬼橋又上車，頭先果餐都未落格，導遊姐姐話而家開車去食晚飯。
雖則我地係一班肥蝗蟲，但都要時間消化下架，
收集眾團友意見，個天未黑頭先餐飯又未落格，不如去埋聽日個景點先去食晚飯，
咁聽日又可以訓晏啲先起身。

18:15 眾團友舉腳讚成下，去埋個順峰山牌坊，遊咗半個鐘先再去喫飯。

18:45 睇完咪又上車去喫飯，是日晚餐，去咗間叫〔有骨氣〕既餐館。
雞有雞味，魚有魚味，豬骨粥好味，OH，sorry，小小怕魚骨其實無喫魚，
唔肯定係係咪真係魚有魚味。
呢餐同午餐比，好味好多，服務又好好多，最緊要係食得開心好多。

食飽，唔使講都知又係上車訓訓訓，訓到酒店門口落車喇！
20:10 上到酒店，放低啲行李，抖陣，又落街搵宵夜喫喇！

嚟到順德既大良，當然去要行步行街！
行步行街之前前，經過商場又未閂，當然去運吓桔，
運桔之前，經過間便利店喎，財政大臣見到喫開果隻雪糕有特價，即刻買嚟喫喇！
肥蝗蟲團友，見到人買佢地又買，結果十隻肥蟲齊齊喫雪糕。

喫哂雪糕行哂商場，當然去步行街行吓喇！
行行吓，其中一條蝗蟲話要喫大良出名既雙皮奶，
22:00 蝗蟲們大把貨，個肥腩大把位，呢啲飯後甜品，濕濕碎喇。

結果又一人一碗雙皮奶都不突止，仲加多個蘿蔔糕添。
碗雙皮奶．．．．唔．．．麻麻地姐，層皮又厚又鞋，好似趙擦膠咁，
係咪呢樹啲雙皮奶興咁厚皮呢？[Day 2] 11 Jul 2010 (順德 > 南沙 > 深圳)

導友姐姐話，呢幾日好多團嚟玩，團友們要喫早餐既話，就要早啲。
小小咁聽話，08:00就落去喫早餐。
住祖國既酒店，都預咗酒店早餐麻麻地，得啲怪味麵包呀，粥呀，怪味橙汁怪味奶果啲，點知呢間酒店既早餐又唔錯喎，有煙肉，蒸饅頭，沙律，西瓜，沙律生菜，
小小喫咗好多好多西瓜，蒸饅頭做早餐，喫早餐都喫咗成個鐘。

11:40先出發，今日既景點尋日去咗，一上車，當然又去開餐喇！
今日午餐喫口了口能私房菜。
12:15 呢間私房菜隻燒鵝真係好正，豬肚湯又好飲，
個苦瓜炒黃魚春啲魚春好甘香，最過份係有煎糉，小小已經鍾意喫糉，
仲要煎埋，唔肥都唔得喇呢均．．．

喫飽，上番車去最後一個景點，步行街，尋晚自己行咗，今日再行，
因為呢個團包一碗民信既雙皮奶。
無錯，呢頭喫完飯，果頭又喫雙皮奶。
14:15 除咗雙皮奶之外，仲加咗餃子，炸鮮奶，唔知仲以為我地未食飯。
民信既雙皮奶，一比之下，好味過仁信好多。

民信碗薑汁雙皮奶，滑身同埋香好多，層皮唔會厚到死，
啲薑汁又夠濃，咁先似樣架嘛。

喫埋雙皮奶，眾肥蝗蟲上返車，返去圳解散，
呢兩日既食完又食既美食之旅咁就曲終人散囉！！

遊水 - 浪茄 (2010/07/04)

見到呢個咁靚既景，就知道小小又去咗浪茄玩喇！
本來上早兩星期已經話要去玩，點知逢假期先嚟落大雨，
仲行雷閃電，小小做埋咁多衰嘢，出街怕被雷劈架嘛，
落咗成個星期雨，卒之放晴喇！即刻約齊人去玩喇！！


落咗成個星期雨，啲塵呀微粒呀，洗走哂吹走哂，
個天都清啲，好耐都無見過咁藍既天，咁白既雲

經過破邊洲，萬宜水庫，行行行．．．．

親愛既浪茄，我又嚟喇！！！！

今日啲水好清，又超好太陽，間中吹吓海風，
攬住水泡浮浮吓真係好過癮
攬夠水泡又去浮潛睇魚仔，海膽，墨魚仔
某幾個角度睇，仲以為自己去咗馬爾代夫添呀
上幾次去啲水都無今次咁清，今次真係揀啱日子去玩，
玩得幾咁盡興，希望下次再可以揀啱日子去