南北果洲

果洲群島呢個地方，小小實在一見鍾情，開一篇blog齋放相都值。

北果洲

殼仔排 (小小橫睇掂睇，硬係覺得殼仔排十足十隻豬仔)

小炮石

大灶口

月球崖，地獄岩，大炮石

關刀洞

南果洲

失而復得的南北果洲

(左：小炮石　右：殼仔排)

FULL？未FULL？無得去？有得去？
本來FULL哂無得去，突然有人退出有得去，HAPPY！
滿心歡喜出發，突然落哂大雨，
擔心出唔到海，落唔到艇，穿唔到山窿，上唔到岸．．．
最後陽光普照，中暑咁滯

果洲，我嚟喇！！

(大灶口)

(上：殼仔排　下：大灶口)

(大灶口前端)

(石室)

鳴謝STANLEY兄立於危地幫眾人影相

Rambler Cafe

溫書溫到悶悶地，個肚又餓餓地，又係時候搵食喇．．．．
(點解搵食都要咁多藉口？！)

上網摷摷摷，搵到呢間自助餐 - Rambler Cafe。
星期一至四，$88；星期五六日，$138。
$138有自助餐晚餐？！就試下咩質素．．．

訂座六點半，去到已經滿座，
walk-in的話，要等到七點，有人no show先有得喫。

坐低飲啖水，當然就開波巡場喇！！
單眼佬賣涼茶，一眼睇哂！！
冷盤有煙三魚，青口，蟹腳，熱盤有10款，沙律2款，
小食有花生雞腳？！中華沙律，意粉，
有麵包，中湯西湯，甜品5-6款，生果雪糕，
仲有個檔仔煎牛仔骨，餃子，蝦。

一嚟就掃冷盤，唔掃的話無得掃，呢頭放出嚟，果頭已經俾人拎哂咁滯；
掃完冷盤開始掃熱盤，呢期做緊避風塘風味，
差不多全部都係炸炸炸，炸雞翼，炸軟腳蟹，炸九肚魚，炸蓮藕，
焗蠔隔好耐先出現，一出現就無哂，
煎牛仔骨呀，蝦呀，要排先有(仲要頭幾位)．．．

試均所有冷盤熱盤（除咗意粉，真係試均哂！），就開始喫甜品。
小小未試過哂自助餐可以試哂全部甜品，
向呢間自助餐就試咗第一次 - 試哂全部甜品。

全部食物都唔係咩貴價嘢，全部都係平價食材，
款式都預咗唔多，以$138既自助晚餐嚟講，味道算係唔錯，
可能因為食物數量唔多，相對食客既比例較多，
好多時啲嘢食一放出嚟，就算啲人唔搶，一陣風已經無哂咁滯。

下次再想喫平價自助餐，小小會幫襯ESSENCE，都未必翻兜呢間。

橙酒

有日突然發酒瘟，好恨好恨飲有果味既酒。
行均啲大型超市，百雞，為康，騷GO，
醜樣唔敢買，好樣啲既又貴到死，
唯有搏哂命上網搵浸果汁資料，DIY算數。

最多人浸既係梅酒，但青梅每年清明當造，過咗就要等下一年，
浸梅酒既時間又長，而家先嚟發酒瘟，當然無清梅喇！
無青梅，繼續搵其他果類代替。

左揀右揀，決定一試浸橙酒。
橙平，米酒平，冰糖平，失敗既都係$30以內既成本，
成功就有得間中發酒瘟，試得過試得過．．．

一個橙，約半枝620ML既米酒，幾舊冰糖，
浸完先記得番睇人地既RECIPE，發現唔記得用鹽擦皮去蠟，
仲要無跟RECIPE份量，希望100日後試飲完唔會肚痛．．．

豬仔骨配薯蓉

上個星期焗完羊架，就成日心思思諗定下次焗咩好，
苦思兩日，就諗要整豬仔骨。

唔理三七廿一，買咗排豬仔骨($28磅，買左半磅多少少，盛惠$18個大洋)
先再諗用咩方法煮。
連續幾日上網搏命搵食譜，豬仔骨，豬肋骨，叉燒，排骨，燒排骨，金沙骨，連英文Baby Back Ribs都出動埋．．．
睇咗咁多個版本既食譜，卒之決定嚟個大兜亂。

醃料：
鹽，糖，胡椒粉，黑椒粒，豉油，茄汁，barbecue sauce，味醂。
向骨同骨之間界一刀，但又唔可以切斷，全部醃料搽均成排豬仔骨。
煮法：
醃幾日之後，成排放入焗爐，骨向上，250度焗30分鐘
拎出嚟反轉，再搽一層醃料向肉果邊，250度焗20分鐘
切開食得。

雖然未做到骨肉分離既效果，但唔算韌，味道可以，
雖然醃咗兩日，但都好似唔多入味，要諗諗再點整．．．．

基本上，拌碟薯蓉整法參考上次，
但今次用埋隔涼茶渣果個隔，再隔一隔啲薯蓉，再落啲蒜粉撈一撈，
效果更好，比上次綿同滑同香，無得頂呀！！
(又搵到位讚自己喇．．．)